ပရိသတ်အချစ်တော် နာမည်ကြီး သရုပ်ဆောင်မင်းသမီး ၀တ်မှုန်ရွှေရည်ဟာ ကိုရီးယားနာမည်ကြီး သရုပ်ဆောင်မင်းသားတဦးနဲ့ တွဲဖက်ပြီး ရုပ်ရှင်တကားကို ရိုက်ကူးဖို့ ရှိနေပါတယ်။

ကိုရီးယားနိုင်ငံ SBS TV Channel နဲ့ ပူးပေါင်းရိုက်ကူးမယ့် ဒီအစီအစဉ်ဟာ မြန်မာ -ကိုရီးယား နှစ်နိုင်ငံပူးပေါင်းပြီး ခရီးသွားကဏ္ဍ ဖွံ့ဖြိုးတိုးတက်ရေးနဲ့ မြန်မာနိုင်ငံရဲ့ ပုံရိပ်ကို ရုပ်သံရိုက်ကူးမှုနဲ့ တဖက်တလမ်းကနေ မြှင့်တင်ပေးနိုင်စေဖို့ ရည်ရွယ်တယ်လို့ ဆိုပါ တယ်။

    ခုလိုရိုက်ကူးနိုင်ဖို့ နှစနိုင်ငံ ဆွေးနွေးတဲ့ အခမ်းအနားကိုတော့ ဖေဖော်ဝါရီလ၁၁ ရက်နေ့က နေပြည်တော်က ဟိုတယ်နှင့် ခရီးသွားလာရေး ၀န်ကြီးဌာနမှာ ကျင်းပခဲ့ပြီး ပြန်ကြားရေးဝန်ကြီး ဒေါက်တာဖေမြင့်၊ ဒါရိုက်တာ စင်ရော်မောင်မောင်နဲ့ တာဝန်ရှိသူတွေ တက်ရောက် ဆွေးနွေးခဲ့ကြတာပါ။

ရုပ်ရှင်ဇာတ်ကားရဲ့ နာမည်ကိုတော့ တခါကဆောင်းလို့ သိရပြီး မိုးနီလွင်ရဲ့ ၀တ္ထု၊ ဇာတ်ညွှန်းကို ကိုရီးယားနိုင်ငံမှ တွဲဖက်ဒါရိုက်တာ အပါအ၀င် ရိုက်ကူးရေးအဖွဲ့ တွေနဲ့ ပူးပေါင်းကာ ဒါရိုက်တာ စင်ရော်မောင်မောင်က ရိုက်ကူးသွားမှာ ဖြစ်ပါတယ်။

လက်ရှိမှာတော့ ကိုရီးယားနိုင်ငံဘက်က သရုပ်ဆောင်မယ့် အမျိုးသားသရုပ်ဆောင်ကိုတော့ မသိရသေးပါဘူး။

ဒီရိုက်ကူးမှုကိုတော့ ကိုရီးယားနိုင်ငံ၊ ဆိုးလ်၊ ဘူဆန်အပါအ၀င် တခြားမြို့တွေနဲ့ မြန်မာနိုင်ငံ၊ မန္တလေး၊ စစ်ကိုင်း၊ ပြင်ဦးလွင်၊ ပုဂံ၊ အင်းလေး၊ ချင်းပြည်နယ်နဲ့ တနင်္သာရီတိုင်းတွေမှာ ပြုလုပ် သွားဖို့ရှိပါတယ်။