စင်ကာပူပူနိုင်ငံရှိ ငွေလဲကောင်တာ ၁၈ ခုကနေ မြန်မာကျပ်ငွေ တသောင်းတန်အတုပေါင်း ၅၅၀၀ ရွက် ဖမ်းဆီးရမိခဲ့တယ်လို့ မြန်မာနိုင်ငံတော်ဗဟိုဘဏ် ဒုဥက္ကဋ္ဌ ဦးစိုးမင်းက ထုတ်ဖော် ပြောကြားလိုက်ပါတယ်။
စင်ကာပူနိုင်ငံသား ဇနီးမောင်နှံဆီကနေ သိမ်းဆည်းရမိတဲ့ ငွေစက္ကူအတုတွေနဲ့ပတ်သက်ပြီး မြန်မာနိုင်ငံရဲတပ်ဖွဲ့ နိုင်ငံဖြတ်ကျော်မှုခင်းဌာနနဲ့ စင်ကာပူရဲတို့ပူးပေါင်းကာ စင်ကာပူရှိ ငွေလဲကောင်တာတွေကို ၀င်ရောက်ရှာဖွေတာမှ အခုလို ဖမ်းဆီးရမိတာလို့ ဆိုပါတယ်။
ဖေဖော်ဝါရီ ၇ ရက် အမျိုးသားလွှတ်တော်အစည်းအဝေးမှာ စစ်ကိုင်းတိုင်းဒေသကြီး မဲဆန္ဒနယ်က ဦးမောင်မောင်လတ်မေးတဲ့ ငွေစက္ကူအတုတွေ ဖမ်းဆီရမိမှုအပေါ် သက်ဆိုင်ရာက ဘယ်လိုတုံ့ပြန်ဆောင်နေတယ်ဆိုတာကို သိရှိလိုတဲ့အကြောင်း မေးခွန်းနဲ့ပတ်သက်ပြီး ဗဟိုဘဏ် ဒုဥက္ကဋ္ဌ ဦးစိုးမင်းက အခုလို ထည့်သွင်းပြောတာပါ။
"စင်ကာပူနိုင်ငံရှိ ငွေလဲကောင်တာ ၁၈ ခုကို ၀င်ရောက်ရှာဖွေခဲ့တာ တသောင်းကျပ်တန် ငွေစက္ကူအတု ၅၅၀၀ ရွက်သိမ်းဆည်းရမိပြီး စင်ကာပူနိုင်ငံမှာ အရေးယူဆောင်ရွက်နေပါတယ် " လို့ ဦးစိုးမင်းက ပြောပါတယ်။
အခုလို စင်ကာပူနိုင်ငံမှာ ဖမ်းဆီးစစ်ဆေးပေါ်ပေါက်ချက်အရ ငွေစက္ကူအတုတွေနဲ့ ပတ်သက်ပြီး မြန်မာနိုင်ငံသား ဝေလင်းထွန်း(စိစစ်ဆဲ)နဲ့ တရားမ၀င်ငွေလွှဲဆောင်ရွက်သူ အန်ထော်နီ ဦးဆင်ပေါက်နဲ့သားများကုမ္ပဏီလီမိတက်တို့ ပါဝင်ပတ်သက်ကြောင်း ပေါ်ပေါက်လို့ အထူးစုံစမ်းစစ်ဆေးရေးဦးစီးဌာနက ဝေလင်းထွန်းနဲ့ အန်ထော်နီ(ဖမ်းမမိ)တို့ကို အရေးယူနိုင်ဖို့ ဆောင်ရွက်နေတယ်လို့ ပြောပါတယ်။
မြန်မာနိုင်ငံရဲတပ်ဖွဲ့အနေနဲ့ ငွေစက္ကူအတုပြုလုပ်ခြင်း၊ ပြည်ပမှ တင်သွင်းခြင်း၊ တင်ပို့ခြင်း၊ အတုမှန်းသိလျက်နဲ့ အသုံးပြုခြင်းတို့ကို ဥပဒေအရ အရေးယူဆောင်ရွက်နေပြီး သယ်ဆောင်ခြင်း၊ အသုံးပြုခြင်းတို့ကို အတုမှန်းမသိကြောင်း ခိုင်မာတဲ့အထောက်အထားရှိရင် လက်ရှိအချိန်ထိ အရေးယူအပြစ်ပေးတာ မရှိဘူးလို့ဆိုပါတယ်။
ငွေစက္ကူအတုတွေ့ရှိပါက ငွေစက္ကူရဲ့ အရင်းမြစ်တိကျခိုင်မာမှုမရှိရင် တွေ့ရှိရာဒေသရဲ့ ခရိုင်ရဲတပ်ဖွဲ့မှူးက ဆက်လက်စုံစမ်းစစ်ဆေးတာ မပြုဖို့ဆုံးဖြတ်ရပြီး ငွေစက္ကူအတုကို မြန်မာနိုင်ငံတော်ဗဟိုဘဏ်ကို ပေးပို့ရတယ်လို့လည်း ပြောပါတယ်။
