ရခိုင်ပြည်နယ်၊ မောင်တောမြို့နယ်မှာ ငွေကျပ်သိန်း ၉၀၀၀ ကျော်တန်ဖိုးရှိတဲ့ စိတ်ကြွရူးသွပ်ဆေးပြားတွေ ဖမ်းမိခဲ့တယ်လို့ ရဲတပ်ဖွဲ့က သတင်းထုတ်ပြန်ပါတယ်။

ဒီဇင်ဘာ ၂၄ ရက် ညပိုင်းက နယ်ခြားစောင့်ရဲတပ်ဖွဲ့တွေပါတဲ့ ပူးပေါင်းအဖွဲ့ဟာ မောင်တောမြို့နယ်၊ ပိုက်ဆိပ်ရွာနားက မကျီးချောင်း ချောင်းထဲမှာ ဟူဆောင်းနာမွတ်၊ အဒူရာမွတ်၊ နိုဟုသနဲ့ မာမွတ်အာယုပ် တို့လှော်ခတ်လာတဲ့ သစ်သားလှေကို စစ်ဆေးရှာဖွေရာမှာ မူးယစ် ဆေးဝါးတွေတွေ့ရှိခဲ့တာလို့ ဆိုပါတယ်။

လှေပေါ်မှာပါတဲ့ အိတ်ထဲက ကာလတန်ဖိုးကျပ်သိန်း ၉၃၀၁ရှိတဲ့ စိတ်ကြွရူးသွပ်ဆေးပြား ၄၆၅,၅၀၀ ပြားနဲ့ လက်ကိုင် ဖုန်းနှစ်လုံးတို့ကို  သိမ်းဆည်းရမိခဲ့တယ်လို့လည်း ဆိုပါတယ်။

ဒါကြောင့် သူတို့ကို မူးယစ်ဆေးဝါးနဲ့ စိတ်ကိုပြောင်းလဲစေသောဆေးဝါးများဆိုင်ရာ ဥပဒေအရ အရေးယူထားတယ်လို့ ရဲတပ်ဖွဲ့က ဖော်ပြထားပါတယ်။