ဧရာဝတီမြစ်အတွင်းက မြေနုကျွန်း ခွဲဝေမှုပြဿနာနဲ့ပတ်သက်ပြီး  သက်ဆိုင်ရာက အမြန်ဆုံးဖြေရှင်းပေး​ဖို့ ဒီကနေ့မနက် မန္တလေးတိုင်း၊ တောင်​သာမြို့်​မှာ ဒေသခံတောင်သူ ၅၀ လောက်က ဆန္ဒပြ တောင်းဆိုကြပါတယ်။​

တောင်သာမြို့နယ် ဖက်တောကျေးရွာအနီး ဧရာဝတီမြစ်ထဲက လက်ရှိမြေနုကျွန်းကို တောင်သူတွေကို မဲဖေါက်ပေးထားပေမယ့် ဒီမြေနုကျွန်းပေါ်မှာ ကျူးကျော်စိုက်ပျိုးသူတွေ ရှိနေတာကြောင့်  ကြက်သွန်စိုက်ပျိုးချိန်အမှီ ဖြေရှင်းပေးဖို့ တောင်းဆို ကြတာပါ။

ဥပဒေနဲ့အညီ လုပ်ပိုင်ခွင့်ရှိသူ​တွေကို မနစ်နာစေရေး ဒို့အရေး၊ ဥပဒေမဲ့လုပ်ဆောင်နေမှုများ အလိုမရှိ၊ ကြက်သွန်စိုက်ပျိုးချိန်အမီ ပြဿနာဖြေရှင်းပေးရေး ဒို့အရေး၊ တရားဥပဒေစိုးမိုးရေး ဒို့အရေး စတဲ့ကြွေးကြော်သံတွေနဲ့ မြို့တွင်းလှည့်လည် ချီတက်လမ်းလျှောက်ဆန္ဒပြ​ကြတာပါ။

ဆန္ဒပြတောင်သူ ဦးကျော်ဌေး​က “တောင်သူ တထောင်လောက်ကို သတ်မှတ်စံကွက်တွေနဲ့ ချထားပေးတယ်​။ ဒါကို အရင်ကလူတစုက ဗိုလ်ကျစိုးမိုးပြီး လုပ်ကိုင်ခဲ့တဲ့သူတွေရှိနေတော့ သူတို့က ဒီလိုအညီအမျှ ခွဲပေးတာ လက်မခံဘူးဖြစ်နေတယ်။ ဒါကို သက်ဆိုင်ရာကနေ ဖြေရှင်းပေးဖို့ အခုလို တောင်းဆိုရတာ”လို့ ပြောပါတယ်။​

မြေနုကျွန်း စိုက်ပျိုးမြေတွေပေါ်မှာ တနှစ်တရာသီစာသာ စိုက်ပျိုးချိန်​ ရှိတာ​ကြောင့် စိုက်ခွင့်မရသေးတဲ့တောင်သူအများစုအ​နေနဲ့ ၀င်ငွေမရှိလို့ စားဝတ်နေရေးအခက်အခဲနဲ့ ကလေးတွေရဲ့ ပညာရေး၊ ကျန်းမာ​ရေး အခက်အခဲတွေ ကြုံတွေ့နေရတယ်လို့လည်း ဆိုပါတယ်။

ဒီပြဿနာနဲ့ ပတ်သက်ပြီး သက်​ဆိုင်​ရာ လယ်​ယာ​မြေစီမံခန့်​ခွဲမှု ကော်​မတီ ဥက္ကဋ္ဌ ဦး​ဝေလင်းထွန်းကို ဆက်​သွယ်​​မေးမြန်းရာမှာ  ဖြေကြားနိုင်​ခြင်းမရှိ​ကြောင်း​ပြောဆိုခဲ့ပါတယ်​။