မကွေးတိုင်း၊ မကွေးမြို့နယ်မှာ မသင်္ကာတဲ့ ဆိုင်ကယ်တစီးကို ရပ်တန့်စစ်ဆေးရာကနေ ဆိုင်ကယ် ၂၈ စီးခိုးယူမှုပါ ဖော်ထုတ်နိုင်ခဲ့တယ်လို့ တိုင်းရဲတပ်ဖွဲ့က သတင်းထုတ်ပါတယ်။
ဒီဇင်ဘာ ၄ ရက် ည ၇ နာရီခွဲလောက်က မကွေးတိုင်း ရဲတပ်ဖွဲ့မှူးရုံးက ပူးပေါင်းအဖွဲ့ဟာ မကွေးမြို့၊ ဗိုလ်ချုပ်ပန်းခြံအနီး ၀ပ်ကင်းဆောင်ရွက်နေတုန်း နံပါတ်မပါ ဒါရမ်း-၁၂၅ ဖြူ/ပြာရောင် ဆိုင်ကယ် ၁ စီးကို လူ ၂ ယောက် စီးလာတာကို မသင်္ကာဖွယ် တွေ့ရှိခဲ့တာပါ။
အဲဒီလူ ၂ ယောက်ကို စစ်ဆေးခဲ့ရာမှာ မကွေးမြို့နယ်၊ သာယာကုန်း ကျေးရွာနေ လင်းလင်း(ခ)၀ဏ္ဏနဲ့ တရွာတည်းနေ ညီဖြစ်သူ ဆန်းထွန်းလင်း(ခ)ရဲထက် ၂၅ နှစ် တို့ဖြစ်ပြီး ဆိုင်ကယ် ပိုင်ဆိုင်ကြောင်း အထောက်အထား တစုံတရာ ပြောဆိုပြသနိုင်ခြင်း မရှိခဲ့ဘူးလို့ သိရပါတယ်။
ရဲအုပ် အေးမင်းထွန်းက လင်းလင်းနဲ့ ဆန်းထွန်းလင်းတို့ကို တရားလို ပြုလုပ်တိုင်တန်းလို့ မကွေးမြို့၊ မြို့မရဲစခန်းက ရာဇသတ်ကြီးပုဒ်မ ၃၈၀/ကျင့် ၅၄ နဲ့ အမှုဖွင့်ဆောင်ရွက်ခဲ့တယ်လို့ တိုင်းရဲသတင်းမှာ ဖော်ပြပါတယ်။
မကွေးမြို့မရဲစခန်းမှူး ဒုရဲမှူး သန်းဝင်းဦးစီးအဖွဲဟာ တရားခံ လင်းလင်း(ခ)၀ဏ္ဏ၊ ဆန်းထွန်းလင်း (ခ) ရဲထက်တို့ကို အသေးစိတ်စစ်ဆေးရာမှာ မကွေးမြို့နယ်အတွင်း စုစုပေါင်း ဆိုင်ကယ် ၂၈ စီး ခိုးယူရောင်းချထားရှိခဲ့ကြောင်း စစ်ဆေးပေါ်ပေါက်ခဲ့ပါတယ်။
ဒီဇင်ဘာ ၅ ရက်မှာ သူတို့ ခိုးယူထားတဲ့ ဆိုင်ကယ်တွေကို ရဲစခန်းက လိုက်လံ သိမ်းဆည်းကာ ပိုင်ရှင်တွေလိုက်လံစုံစမ်းနေပြီး တရားခံနှစ်ယောက်ကို ဥပဒေနဲ့ အညီ အရေးယူမယ်လို့ ရဲသတင်းမှာ ဖော်ပြပါတယ်။
