ရှမ်းပြည်နယ်တောင်ပိုင်း၊ မိုင်းပန်မြို့နယ်၊ ပန်ပီးဘုန်းကြီးဟာ နိုဝင်ဘာ ၇ ရက်ည ၁၁ နာရီ ခွဲအချိန်မှာ မီးလောင်ပြီး ကိုရင် ၂ ပါး ပျံလွန်တော်မူသွားပါတယ်။
မီးလောင်မှုဖြစ်ပွားရာမှာ သာမာန်မီးလောင်မှုမဟုတ်ဘဲ ရှို့မီးဖြစ်နိုင်တယ်လို့ ဒေသခံတွေက ယူဆကြပါတယ်။
“ညလူတွေအကုန် အိပ်ပျော်တဲ့အချိန် ၁၀ နာရီခွဲ လောက်ဖြစ်တာ။ ဖယောင်းတိုင် မီးမဖြစ်နိုင် ဘူး။ ဒီမှာ ငြှိမ်းသတ်ရဟိုဘက်လောင်၊ ဟိုမှာ ငြှိမ်းသတ်ရင် ဟိုဘက်လောင် ၁၁ နာရီ လောက်ဆို အကုန်ပြောင်သွားပြီ၊ ဒေသခံတွေက ဖယောင်းတိုင် မီးမဟုတ်ဘူးလို့ ယုံကြည်ကြတယ်”လို့ အမည်မဖော်လိုတဲ့ ဒေသခံကပြောပါတယ်။
ပြီးခဲ့တဲ့ အောက်တိုဘာက PNLA ပအိုဝ်းအမျိုးသား လွတ်မြောက်ရေးတပ်ဖွဲ့က ပန်ပီးရွာ ရောက်ရှိပြီး RCSS နဲ့ တိုက်ပွဲဖြစ်ခဲ့တဲ့အတွက် PNLAတပ်ဖွဲ့ကို ဘုန်းကြီးခေါ်လာတယ်လို့ RCSS ဘက် ထင်ပြီး ဘုန်းကြီးကိုလုပ်ကြံဖို့ ကြိုးစားတာလို့ ဒေသခံတွေက ပြောပါတယ်။
“ကျောင်းအောက်ကနေ စလောင်တာပါ။ ရိုးရိုးလောင်ကျွမ်းတာတော့ မဖြစ်နိုင်ဘူး ရေနံဆီ ဓာတ်ဆီနဲ့ ရှို့တဲ့သဘောရှိတယ်။ ဘယ်အဖွဲ့ကလည်းဆိုတာ ရိပ်မိနေပါတယ်။ ဒါပေမယ့် မျက်စိနဲ့ မြင်တာ မဟုတ်တော့ သိနေပေမယ့် မပြောရဲဘူး”လို့ ဒေသခံတဦးကပြောပါတယ်။
ဘုန်းကြီးကိုလုပ်ကြံဖို့ ကြိုးစားတာ နှစ်ကြိမ်ရှိပြီဖြစ်ပြီး အောက်တိုဘာ ၃၁ ရက်နေ့ကလည်း ဘုန်းကြီး မိုင်းပန်ကိုကြွသွားစဉ် လမ်းပေါ်မိုင်းထောင်ထားကာ ဒေသခံနင်းမိတဲ့အတွက် ဒဏ်ရာရရှိခဲ့ပေမယ့် ဘယ်သူဘယ်ဝါ ဘယ်အဖွဲ့လုပ်တယ်ဆိုတာသိပေမယ့် မပြောရဲဘူးလို့ ဒေသခံတွေက ပြောပါတယ်။
RCSS အဖွဲ့ တောင်ကြီးဆက်ဆံရေးရုံးတာဝန်ခံ ဗိုလ်မှူးစိုင်းဦးကတော့ “ကျနော်တို့ မဟုတ်ပါဘူး။ ဘုန်းကြီးကျောင်းမီးရှို့တာ မပြောနဲ့ ဘုန်းကြီးကျောင်းဆောက်တာ လှူဒါန်းတာတွေ လုပ်ပါတယ်။ ကြားသိသလောက်ကတော့ ဖယောင်းတိုင် မီးကနေတဆင့် လောင်ကျွမ်းတာလို့ သိရတယ်။ အဲ့ဒီ အချိန် အစိုးရတပ်မတော် လှုပ်ရှားမှုလည်းရှိတယ်။ ဒီလိုမျိုး လုပ်ရပ်တွေ ကျနော်တို့ မလုပ်တဲ့အပြင် ရှုတ်ချပါတယ်။ ဒါမျိုးကိစ္စဖြစ်လာရင် မဟုတ်ဘဲစွပ်စွဲနေရင် တဖွဲ့နဲ့တဖွဲ့ လူမျိုးရေးပဋိပက္ခ တိုးပွားစေတယ်” လို့ ပြောပါတယ်။
အဆိုပါဒေသဟာ အန်စီအေ လက်မှတ်ထိုးထားတဲ့ RCSS/SSA ရှမ်းပြည် ပြန်လည်ထူထောင်ရေးကောင်စီ လက်နက်ကိုင်အဖွဲ့ လှုပ်ရှားနေတဲ့ နယ်မြေဖြစ်ပါတယ်။
သတင်း - ခွန်ရာဇာ
