မွန်ပြည်နယ်၊ ဘီးလင်းမြို့မှာ ငွေစက္ကူအတု ၃ ရွက်တွေ့ရှိမှုနဲ့ပတ်သက်ပြီး လူမှု ကွန်ရက်ပေါ်မှာ မဟုတ်မမှန်ပြောဆို Live လွှင့်သူကို ဆက်သွယ်ရေး ဥပဒေပုဒ်မ ၆၆(ဃ)နဲ့   အမှုဖွင့် အရေးယူထားတယ်လို့ ပြည်ထဲရေး သတင်းမှာ ဖော်ပြပါတယ်။

အောက်တိုဘာ ၂ ရက်က ဘီးလင်းမြို့နေ ဒေါ်နွယ်နွယ်သင်းယုဝေဆိုသူဟာ ဘီးလင်းက ဧရာဝတီဘဏ်ခွဲမှာ သူတို့ ငွေသွားထုတ်တုန်း ငွေကျပ် ၁၀၀၀၀ တန် ငွေစက္ကူ ၃ ရွက် ပါလာတယ်။

ဒီငွေစက္ကူ ၃ ရွက်ကို ဘဏ်ဝန်ထမ်းတွေက ထည့်ပေးလိုက်တာ ဖြစ်တယ်ဆိုပြီး ဘီလင်းက  ဧရာဝတီဘဏ်ခွဲရှေ့ ကနေ ဖေ့စ်ဘွတ်ခ်မှာ LIVE လွှင့်ခဲ့တာ ဖြစ်ပါတယ်။

ဒီဖြစ်ရပ်နဲ့ပတ်သက်ပြီး သက်ဆိုင်ရာက စုံစမ်းရာမှာ အောက်တိုဘာ ၂ ရက်နေ့က ဘီးလင်းမြို့၊ ကန်သာယာရပ်ကွက်ရှိ ဧရာဝတီဘဏ်ခွဲကို ဒေါ်အိသဉ္ဇာလှိုင် ဆိုသူရောက်လာပြီး ငွေအပ်တယ်၊ ငွေကျပ် ၂၀၀ သိန်းကို ငွေစာရင်းဖွင့်လှစ် အပ်နှံစဉ် ၁၀,၀၀၀ ကျပ်တန် ငွေစက္ကူအတု ၃ ရွက်ပါရှိလာလို့  ဘဏ်အကြီးတန်းလက်ထောက်ငွေကြေး တာဝန်ခံ မအိအိကျော်က ဗဟိုဘဏ်ရဲ့ ညွှန်ကြားချက်အတိုင်း ဒေါ်အိသဉ္ဇာလှိုင်ကို ရှင်းလင်းပြောဆိုခဲ့ပြီး ဘီးလင်းမြို့မရဲစခန်းထံ ငွေအတုတွေ သွားရောက်အပ်နှံခဲ့တယ်လို့ စစ်ဆေးတွေ့ရှိပါတယ်။

ဒီကိစ္စနဲ့ပတ်သက်ပြီး ဒေါ်အိသဉ္ဇာလှိုင်ရဲ့ ညီမဝမ်းကွဲ ဒေါ်နွယ်နွယ်သင်းယုဝေက အဲ့ဒီနေ့မှာ ဖေ့စ်ဘွတ်ခ် စာမျက်နှာပေါ်ကနေ "ဧရာဝတီဘဏ်လီမိတက် (ဘီးလင်းဘဏ်ခွဲ)ရှိ ဘဏ်ဝန်ထမ်း ၁ ဦးက ငွေအတုထည့်တာကို ဘဏ်ရဲ့ CCTV မှတ်တမ်းမှာ တွေ့မြင်ရပြီး သူ့ အစ်မဖြစ်သူကိုလည်း ဘဏ်က  ခြိမ်းခြောက်ပြောဆိုတယ်”လို့ Live လွှင့်ခဲ့တယ်လို့ဆိုပါတယ်။

ဂုဏ်သိက္ခာကျဆင်းအောင် လူမှုကွန်ရက်ပေါ်မှာ ဒီလိုမျိုး မဟုတ်မမှန် ပြောဆို Live လွှင့်ခဲ့တာကို အရေးယူပေးဖို့  ဘဏ်အကြီးတန်း လက်ထောက်ငွေကြေးတာဝန်ခံ မအိအိကျော် က တိုင်တန်းလို့ ဒေါ်နွယ်နွယ်သင်းယုဝေ(ဖမ်းမမိ)ကို ဘီးလင်း မြို့မရဲစခန်းမှာ  ဆက်သွယ်ရေး ဥပဒေပုဒ်မ ၆၆(ဃ)နဲ့ အမှုဖွင့်စစ်ဆေးနေတယ်လို့ ပြည်ထဲရေးသတင်းမှာ ဖော်ပြပါတယ်။

ငွေစက္ကူအတုတွေကို ပဏာမစိစစ်ခဲ့ရာမှာ စက္ကူသားချောနေတာ၊ လျှို့ဝှက်ချက်တွေ မပါတာနဲ့ ကာလာပရင်တာနည်းနဲ့ တုပပြုလုပ်ထားတာ ရှာဖွေတွေ့ရှိတယ်လို့ သတင်းမှာ ဖော်ပြပါတယ်။