အထက်မင်းလှမြို့နယ်၊ ဓာတ်ကုန်း ငနောင်မုန်း ရေနံမှော် လက်ယက်တွင်းတိမ်လုပ်ငန်းမှာ ရင်းနှီးမြှုပ်နှံသူတွေ နည်းပါးလာတဲ့အတွက် ရေနံအထွက်နှုန်း ဆယ်ဆလောက်လျော့နည်းကျဆင်းသွားတာပါ။
ရေနံလက်ယက်တွင်းလုပ်ကိုင်သူ ဦးဇော်ဆိုင်းက "၂ဝ၁၅/၁၆ ဝန်းကျင်က တရက်ကို ရေနံပေပါ ထောင်နဲ့ချီထွက်ရှိပြီး အခု ၁၀၀၊ ၂၀၀ ကို မထွက်ရှိတော့ဘူး။ အထွက်နှုန်း ကျဆင်းရတာက ရေနံကျင်းသစ် ထပ်မံတူးဖော်သူမရှိဘဲ တွင်းဟောင်းတွေပဲ ခပ်နေရလို့ တဖြည်းဖြည်း ခန်းခြောက်လာတာပါ။ ရေနံမှော်မှာ ရင်းနှီးမြှုပ်နှံမယ့် လုပ်ငန်းရှင်တွေ အများကြီးလိုအပ်တယ်။ နိုင်ငံတော် အစိုးရပိုင်းကလည်း ရေနံလက်ယက်တွင်းလုပ်ငန်းကို လေ့လာပြီး နည်းပညာပိုင်းတွေ အကူညီပေးစေချင်တယ်” လို့ ဒီဗွီဘီကို ပြောပါတယ်။
ရေနံတွင်းပိုင် ဦးအောင်စိုးက "စမ်းသပ်တွင်းလေးတွေ တူးဖော်စေချင်တယ်။ ရေနံမှော်ကြီးက ခြောက်ခြောက်ကပ်ကပ် ဖြစ်နေတဲ့အတွက် စမ်းသပ်တူးဖော်မယ့် လုပ်ငန်းရှင်တွေကို ဖိတ်ခေါ်ချင်ပါတယ်” လို့ ပြောပါတယ်။
ရေနံသယ်ပို့လုပ်ကိုင်သူ ဦးရဲကြည်က "ယခင်တုန်းက ရေနံပေါပေါများများ တိုက်ရတဲ့အတွက် တနေ့ကို လေးငါးသောင်းကျပ်လောက်ဝင်ငွေရှိတယ်။ လက်ရှိအချိန်မှာတော့ ရေနံအထွက်နှုန်းကျဆင်းပြီး အလုပ်ကိုင် ရှားပါးလာကာ စားဝတ်နေရေးကို အနိုင်နိုင်ဖြေရှင်းနေရတယ်။ စမ်းသပ်တူးဖော်ကြပြီး မှော်ကြီးပြန်စည်လာဖို့ မျှော်လင့်နေ ကြတယ်” လို့ဆိုပါတယ်။
ရေနံသယ်ပို့လုပ်ကိုင်သူ ဒေါ်တင်နွဲ့က "အရင်တုန်းကတော့ တရက်ကို ရေနံပေပါ ၅ဝ လောက်တိုက်ရတယ်။ ခုကတော့ မတိုက်ရတဲ့ရက်က များနေတယ်။ တရက်ကို ငါးထောင်ကျပ်လောက် ဝင်ငွေရဖို့ကို မလွယ်ကူဘူး။ ဈေးရောင်းဈေးဝယ်တွေနဲ့ စည်ကားသိုက်မြိုက်ခဲ့တဲ့ ရေနံမှော်ကြီး အရောင်းဝယ်တွေ အဆင်မပြေကြတော့ တခြားနေရာတွေကို ရွှေ့ပြောင်းကုန်ကြပြီ။ ရင်းနှီးမြှုပ်နှံသူတွေ လာရောက်တူးဖော်ပြီး ရေနံမှော်သစ်ပေါ်ဖို့ မျှော်နေရတယ်" လို့ပြောပါတယ်။
ရေနံအများဆုံးထွက်ရှိတဲ့ မြိုင်မြို့နယ်ဘက်မှာတော့ ဒေသန္တရ ရေနံချက်ဖိုဇုန်တခု ပေါ်ပေါက်ဖို့ ဒေသခံတွေ တောင်းဆိုနေကြတာပါ။
မကွေးတိုင်းဒေသကြီးအတွင်းမှာ အထက်မင်းလှမြို့နယ်၊ သရက်မြို့နယ်၊ မြိုင်မြို့နယ်နဲ့ ပေါက်မြို့နယ်တွေမှာ ရေနံလက်ယက်တွင်းတိမ်လုပ်ငန်း အဓိက လုပ်ကိုင်ကြပြီး နိုင်ငံတော် အခွန်ဘဏ္ဍာငွေနဲ့ တိုင်းဒေသကြီး ရန်ပုံငွေ အများဆုံးရရှိတဲ့ လုပ်ငန်းတခုဖြစ်ပါတယ်။
သတင်း-မင်းထီး
