မကွေးတိုင်းဒေသကြီး၊ ရေနံချောင်းမြို့ရှိ ရေနံအလုပ်သမား ၂၀၀လောက်ဟာ Gold Petrol Myanmar JOC Inc ကုမ္ပဏီက ပေးတဲ့ထောက်ပံ့ကြေး နည်းပါးတဲ့ကိစ္စနဲ့ပတ်သက်လို့ လက်မှတ်ရေးထိုး ကန့်ကွက်လိုက်ပါတယ်။
အဆိုပါရေနံကုမ္မဏီက အလုပ်သမားတွေကို ထောက်ပံ့ကြေးပေးရာမှာ ရေနံထုတ်လုပ်ရေးဌာနနဲ့ ရေနံလုံခြုံရေးဌာနရှိ ဝန်ထမ်းတစ်ဦးလျှင် တလ ထောက်ပံ့ငွေကြေး ၈၀၀၀ ကျပ်မှ ၂၅၀၀၀ ကျပ်အထိပေးပြီး ကျန်တခြားဌာနက ၀န်ထမ်းတွေကိုတော့ တစ်ဦးလျှင် တစ်လ ထောက်ပံ့ကြေးငွေ ၁၅၀၀ကျပ်ကနေ ၃၀၀၀ ကျပ် အထိပဲပေးတယ်လို့ အလုပ်သမား တွေကပြောပါတယ်။
ရေနံချောင်းရေနံမြေ ရွှေရေနံသာ အခြေခံအလုပ်သမားအဖွဲ့ ဥက္ကဋ္ဌ ဦးစန်းမင်းအောင်က “အဓိကကတော့ ထောက်ပံ့ကြေး နည်းတဲ့ကိစ္စပေါ့။ ထောက်ပံ့ကြေးနည်းခြင်း၊ များခြင်း ကိစ္စကလည်း စာချုပ်ပွင့်လင်းမြင်သာမှုကလည်း အများဆုံးသက်ဆိုင်တယ်။ စာချုပ်က ဘယ်လိုတွေ ချုပ်ပြီး ဝန်ထမ်းတွေရဲ့ လူမှုဘဝတိုးတက်ရေး ဘယ်လိုလုပ်ပေးမှာလည်း။ ရေနံထွက်ရှိမှု အကျိုး၊ ကုမ္ပဏီနဲ့ ရေနံဌာန ဘယ်လို အကျိုးအမြတ်ခွဲပြီး ဆောင်ရွက်နေတယ်ဆိုတဲ့ အကြောင်းတွေ ပွင့်လင်းမြင်သာမှုမရှိဘူး '' လို့ ပြောပါတယ်။
ဒီကိစ္စနဲ့ပတ်သက်ပြီး သက်ဆိုင်ရာထံ တင်ပြတောင်းဆိုဖို့ ရေနံချောင်းမြို့ မြေနီခင်တောင်ရပ်ကွက်ရှိ ရွှေရေနံသာ အလုပ်သမားအဖွဲ့ အစည်းအဝေးခန်းမမှာ စက်တင်ဘာ၂၃ ရက်က စတင်ကာ ရေနံမြေအလုပ်သမားတွေက ဆန္ဒခံယူလက်မှတ်ထိုးပွဲ ပြုလုပ်ခဲ့ပြီး ဒီကနေ့ အထိ လက်မှတ်ပေါင်း ၂၀၀ လောက်ရှိနေပြီ ဖြစ်ပါတယ်။
လက်မှတ်ရေးထိုးထားတဲ့ စာမှာ အောက်တိုဘာ ၁ ရက်ကစလို့ Gold Petrol Myanmar JOC Inc ရေနံကုမ္ပဏီရဲ့ ထောက်ပံ့ငွေကြေးနဲ့ လုပ်ငန်းခွင်မှာ ကျွေးတဲ့ထမင်းကို ရေနံ ချောင်းရေနံမြေ အလုပ်သမားတွေအနေနဲ့ ဆန္ဒအလျှောက် ခံစားရယူလိုခြင်း မရှိတော့ဘူးလို့ ဖော်ပြပါရှိပါတယ်။
ရေနံချောင်းရေနံမြေမှာ တာဝန်ထမ်းဆောင်နေကြတဲ့ MOGE အရာထမ်းနဲ့ အမှုထမ်း ၇၀၀ လောက်ရှိပြီး ဒီကန့်ကွက်စာမှာ ထောက်ပံ့ကြေးငွေတိုးမြှင့်ပေးရေးနဲ့ အစားအစာ ကောင်းမွန်စေရေး (သို့မဟုတ်) အစားအစာ ကုန်ကျစရိတ်ကို ငွေကြေးအဖြစ် ပြောင်းလဲ သတ်မှတ်ပေးရေး သက်ဆိုင်ရာ ၀န်ကြီးဌာနတွေကို ဒီကနေ့ ပေးပို့ တင်ပြတောင်းဆို မယ်လို့လည်း ရေနံမြေ အလုပ်သမား ကိုယ်စားလှယ် ဦးလေးနိုင်က ပြောပါတယ်။
Gold Petrol Myanmar JOC Inc ကုမ္ပဏီဟာ ချောက်-လမ်းရွာ ရေနံမြေနဲ့ ရေနံချောင်း ရေနံမြေတို့ကို တိုးတက်ထွက်ရှိလာသော ရေနံပေါ်တွင် ခွဲဝေခံစားရေး စာချုပ် (IPRCs) ကို ၁၉၉၆ခု ဧပြီ ၄ ရက်မှ ၂၀၁၇ ခု ဧပြီ ၄ရက်အထိ ပထမအကြိမ် စာချုပ်ချုပ်လုပ်ကိုင်ခဲ့ပါတယ်။
ဒါ့အပြင် ၂၀၁၇ စက်တင်ဘာ ၁၅ ရက်မှ ၂၀၂၈ ဧပြီ ၃ ရက်အထိ ၁၁ နှစ်သက်တမ်းကာလ အတွက်လည်း ဒုတိယအကြိမ်စာချုပ် ချုပ်ဆိုထားတယ်လို့ အဆိုပါ ကုမ္ပဏီထံက သိရပါတယ်။
ကိုလင်း(ချောက်)
