ဆွာချောင်းရေလွှမ်းမိုးခံရတဲ့ ကျေးရွာများပြောင်းရွှေ့စုစည်းပြီး စံပြကျေးရွာအဖြစ် စနစ်တကျတည်ဆောက်ပေးလို့ ဒုတိယသမ္မတ ဦးဟင်နရီဗန်ထီးယူက ပြောပါတယ်။
စက်တင်ဘာ ၂၂ ရက်က ပဲခူးတိုင်း၊ ဆွာချောင်းရေလှောင်တမံ ရေပိုလွှဲ ယာယီ ရှင်းလင်းဆောင်ကို ရောက်ရှိတုန်း ဒုသမ္မတ က ပြောခဲ့တာ ဖြစ်ပါတယ်။
“ဆွာချောင်းရေလွှမ်းမိုးခံရသည့် ကျေးရွာများပြောင်းရွှေ့စုစည်း၍ စံပြကျေးရွာ အဖြစ် လုပ်ထုံးလုပ်နည်းနှင့်အညီ စနစ်တကျတည်ဆောက်နိုင်ရေး၊ မြေအနေအထားပေါ် မူတည်၍ အိမ်ထောင်စုများအတွက် လုံလောက်သည့်အကျယ်အဝန်းကို ဆောင်ရွက်ပေးနိုင်ရေး၊ တမံနှင့် ရေပိုလွှဲ အသစ်တည်ဆောက်ရာတွင် နေရာရွေးချယ်မှုမှန်ကန်ရေး၊ ဆောက်လုပ်ရာ တွင်လည်း ဘက်ပေါင်းစုံရှုထောင့်ပေါင်းစုံမှ ရှုမြင်၍ ရေရှည်တည်တံ့ခိုင်မြဲ အောင်တည်ဆောက်သွားရေး၊ ရေပိုလွှဲတည်ဆောက် မည့်ကာလအတွင်း စိုက်ပျိုးရေ ပေးဝေနိုင်ရေးနှင့် တမံလုံခြုံရေး လုပ်ငန်းများနှင့်စပ်လျဉ်း၍ စဉ်ဆက်မပြတ်ကြပ်မတ် ဆောင်ရွက်သွားနိုင်ရေးတို့” လုပ်ဆောင်ဖို့ သမ္မတက ပြောကြားခဲ့ပါတယ်။
ပဲခူးတိုင်းဒေသကြီး ရေတာရှည်မြို့နယ် ဆွာချောင်းတမံပင်မရေပိုလွှဲ ကျိုးပေါက်မှုကြောင့် ရေကြီးရေလျှံမှုဖြစ်ပွားခဲ့ရာ ကျေးရွာအုပ်စု ၁၈ စုအတွင်းရှိ ရေနောက်မျောပါသွားခဲ့ရတဲ့ လူနေအိမ် ၁၆၁ လုံးကို မြန်မာနိုင်ငံ ဆောက်လုပ်ရေးလုပ်ငန်းရှင်များ အသင်းချုပ်က အခမဲ့တည်ဆောက်ပေးမှာ ဖြစ်ပါတယ်။
