လည်ကတုံးအင်္ကျီအဖြူ၊ ပုဆိုးအဖြူရောင်နဲ့ ရဟန်းသိက္ခာအချခံထားရပြီး လက်ထိပ်ခတ်ခံထားရတဲ့ အသက် ၃၂ နှစ်အရွယ် တရားခံဟာ တရားခွင်ထဲမှာ အမှုစီရင်ချက်ကို ကြားနာနေပါတယ်။
တရားသူကြီးဟာ အမှုနဲ့သက်ဆိုင်တဲ့ စာရွက် ၁၆ မျက်နှာခန့်ကို ဖတ်ပြီးချိန်မှာ တရားခံဟာ သက်ငယ်မုဒိမ်းမှု ကျူးလွန်ကြောင်း ပြစ်မှုထင်ရှားတဲ့အတွက် ထောင်ဒဏ်အနှစ် ၂၀ ကျခံစေဖို့ အမိန့်ချမှတ်လိုက်ပါတယ်။
တရားခွင်ပြင်ပမှာတော့ ရွာသူရွာသား ၇၀ ကျော်လောက် အချင်းချင်းတိုးဝှေ့ကာ နားထောင်ရင်း ပွက်လောရိုက်နေကြပါတယ်။
ခဏအကြာမှာ “လမ်းဖယ် … လမ်းဖယ်” ဆိုတဲ့ ရဲသားတယောက်ရဲ့ အသံနဲ့အတူ လက်ထိပ်ခတ်ထားတဲ့ တရားခံအမျိုးသားကို ခေါ်ဆောင်လာပါတယ်။
အဲဒီနောက်မှာတော့ ဟင်္သာတခရိုင် တရားရုံးကနေ အချုပ်ကားလို့ခေါ်တဲ့ ထောင်ကားပေါ်တက်ဖို့ တရားခံကို ခေါ်သွားချိန်မှာ ခုနက အမှုလာရောက်နားထောင်နေတဲ့ ရွာသူရွာသားတွေဟာ စုရုံးလာပြီး တရားခံကို လက်အုပ်ချီကာ ထိုင်ကန်တော့ကြပါတော့တယ်။ ဒါဟာ ဘယ်လောက်ဆိုးလိုက်တဲ့ မြင်ကွင်းပါလဲ။
သင်္ကန်းဝတ်နဲ့ သက်ငယ်မုဒိမ်းကျူးလွန်ခဲ့တဲ့ လူတယောက်ကို ပြစ်မှုထင်ရှားလို့ ထောင်ဒဏ်ချမှတ်ခံရတဲ့ အချိန်အထိ ဆက်ပြီး ကိုးကွယ်နေရလောက်အောင် ဒီရွာသူရွာသားတွေရဲ့ ယုံကြည်မှုတွေက ဘယ်လောက်အထိ အမိုက်မှောင်ဖုံးလွှမ်းနေပါသလဲ။ ဒီလောက်နဲ့တင် မဟုတ်သေးပါ။ တရားသူကြီးရဲ့ အမိန့်ချသံနဲ့အတူ ထွက်ပေါ်လာတဲ့ ရွာသားတွေရဲ့ စကားသံတွေ….
“တန်တယ်။ နှစ် ၂၀ ကျတာတန်တယ်”
ဒါကတော့ ဒီဘုန်းကြီးကို ကိုးကွယ်တဲ့ ရွာသူအမျိုးသမီးတွေ အော်ဟစ်ပြောဆိုနေကြတဲ့ စကားသံပါ။
ဆိုလိုတာကတော့ အဓမ္မပြုကျင့်ခံရတဲ့ မိန်းကလေးကို တာဝန်ယူမယ့်အစား ထောင်ထဲမှာ နှစ် ၂၀ နေရတာ ဘုန်းကြီးဆိုသူ အမှုကျူးလွန်ခဲ့တဲ့ တရားခံအတွက် ထိုက်တန်တယ်ဆိုတဲ့ သဘောပါ။
သူတို့ပြောစကားအရ ဘုန်းကြီးဟာ ဒီအမှုကို တကယ်ကျူးလွန်ခဲ့မှန်း သိရက်နဲ့ ယုံကြည်ကိုးကွယ်နေကြတယ်ဆိုတာ ပေါ်လွင်ပါတယ်။ ဒါဟာ သိပ်ကြောက်စရာကောင်းတဲ့ မှားယွင်းမှုတခုများလား။
တရားခံဘက်ကနေ လူတွေ အခုလိုပြောဆိုနေချိန် ကျူးလွန်ခံရသူ မိန်းကလေးရဲ့ မိခင်ကတော့ မျက်ရည်အဝိုင်းသားနဲ့ တရားခွင်မှာ အမိန့်ကြားနာဖို့တောင် မဝံ့ရဲခဲ့ပါဘူး။
ဘုန်းကြီးမှာ အပြစ်ရှိနေတာကို သိနေကြပေမယ့် အနိုင်ကျင့်ခံရတဲ့ မိန်းကလေးနဲ့ သူမရဲ့ အသိုင်းအဝိုင်းကိုသာ လူတွေက တိုက်ခိုက်ပြောဆိုကြနေတာကို အမှုဖြစ်စဉ်တလျှောက်လုံး ခံခဲ့ကြရပါတယ်။
ဒါတွေကတော့ လွန်ခဲ့တဲ့ ၂ နှစ်က ဇလွန်မြို့အတွင်း ညောင်အိုင်စိတ္တသုခ ဘုန်းကြီးကျောင်းမှာ ကျောင်းထိုင်ဆရာတော်ဖြစ်တဲ့ ဦးသုန္ဒရက အသက်မပြည့်သေးတဲ့ ကျောင်းသူတယောက်ကို အဓမ္မပြုကျင့်မှုနဲ့ တရားစွဲဆိုထားတဲ့အမှုကို ၂၀၁၈ ခုနှစ်၊ သြဂုတ်လ ၂၄ ရက်နေ့မှာ အပြီးသတ် အမိန့်ချမှတ်စဉ် တွေ့မြင်ခဲ့ရတဲ့ အခြေအနေတွေ ဖြစ်ပါတယ်။
အဲဒီလို အဓမ္မပြုကျင့်ခံခဲ့ရတာကနေ အသက် ၁၂ နှစ်ကျော်သာ ရှိသေးတဲ့ မိန်းကလေးငယ်မှာ ကိုယ်ဝန်ရရှိခဲ့ပါတယ်။ အခုဆိုရင် သူမရဲ့ကလေးငယ်ဟာ အသက်၃ နှစ်ကျော် အရွယ် ရောက်နေပါပြီ။ တရားခံကို တရားခွင်က အပြစ်ရှိကြောင်း အမိန့်ချမှတ်ပြီးတာတောင် တရားခံကို အပြစ်မမြင်ဘဲ ကျူးလွန်ခံရတဲ့ မိန်းကလေးငယ်ကိုသာ အပြစ်ဖို့ ပြောဆိုတဲ့ လူမှုပတ်ဝန်းကျင်ရဲ့ အလေ့အထကို ဒီအမှုမှာ အထင်းသား မြင်တွေ့ရပါတယ်။
တရားခွင်မှာ အမိန့်မချခင် ဘုန်းကြီးကို ကိုးကွယ်ကြသူတွေရဲ့ ပြောစကားတချို့က “ကြည့်ပါဦး .. အသက် ၁၂ နှစ်နဲ့ ကိုယ်ဝန်ရတာ၊ ဘယ်အရွယ်တည်းက ဘာဖြစ်နေလဲမှမသိတာ” “အဲဒီမိန်းကလေးက အနေအထိုင်မှ မတတ်တာ ခံရပါစေ” “ကိုယ့်သမီး ကိုယ်ဝန်ရှိတာတောင် မသိရအောင် မိဘတွေက ဘယ်လိုအမျိုးအစားတွေလဲ” ဆိုတာတွေပါ။
ဟုတ်ပါတယ်။ ကောင်မလေးက အသက်မပြည့်သေးဘဲ ကိုယ်ဝန်ဆောင်ခဲ့ရပါတယ်။ ကလေးမွေးခဲ့ရပါတယ်။ မိဘတွေမသိအောင် ကိုယ်ဝန်ကို ဖုံးဖုံးဖိဖိနဲ့ နေခဲ့ရပါတယ်။ တကယ်တော့ အရွယ်နဲ့မလိုက်အောင် ရင့်ကျက်ခဲ့ရပြီး သတ္တိရှိတဲ့ ဒီမိန်းကလေးကို လေးစားရမှာပါ။
၇ တန်းအရွယ် မိန်းကလေးငယ်တယောက်ကို မိဘတွေက ဘုန်းကြီးကျောင်းမှာ ယဉ်ကျေးလိမ္မာသင်တန်း အပ်ခဲ့ရာကနေ ဘုန်းကြီးနဲ့ရင်းနှီးပြီး အဓမ္မပြုကျင့်ခံခဲ့ရပါတယ်။
မုဒိမ်းမှု ဘာလို့မြောက်လဲ ဆိုတာကတော့ အသက် ၁၆ နှစ်အောက် မိန်းကလေးကို အလိုတူသည်ဖြစ်စေ မတူသည်ဖြစ်စေ အဓမ္မပြုကျင့်ရင် သက်ငယ်မုဒိမ်းမှု မြောက်ပါတယ်။
အဲဒီလို ကျူးလွန်ခံရတာကနေ ကိုယ်ဝန်ရလာတဲ့အခါ တိတ်တဆိတ်ဖြေရှင်းဖို့ ကြိုးစားခဲ့ပါတယ်။ ဘုန်းကြီးကို သူ့မှာ ကိုယ်ဝန်ရှိကြောင်း ပြောတဲ့အချိန်မှာ ကိုယ်ဝန်ကို ဖျက်ချဖို့ ပြောပါတယ်။ မိန်းကလေးကတော့ ကိုယ်ဝန်ကို ဖျက်မချရဲခဲ့ပါဘူး။ အဲဒါနဲ့ ကိုယ်ဝန်ဆောင်ဘဝနဲ့ ကျောင်းဆက်တက်ပြီး စာမေးပွဲ ဖြေဆိုခဲ့ပါတယ်။
အသက် ၁၂ နှစ်အရွယ် ကျောင်းသူတယောက်၊ ကိုယ်ဝန်ဆောင်ဘဝနဲ့ ကျောင်းတက်ခဲ့ရတဲ့ သူမရဲ့အခက်အခဲ၊ မိဘတွေနဲ့ ပတ်ဝန်းကျင်က သိသွားမှာ ကြောက်တဲ့စိတ်၊ ဗိုက်ထဲက ကလေးငယ် တခုခုဖြစ်သွားမှာ စိုးရိမ်တဲ့စိတ်၊ ဒီလိုစိတ်တွေရဲ့ ကလေးအရွယ်သူမ ဘယ်လောက်တောင် ကြံ့ကြံ့ခံ ဖြတ်သန်းခဲ့ရသလဲ။
စာမေးပွဲဖြေဆိုပြီး ၂ ရက်အကြာ ကလေးမွေးခါနီး ဗိုက်နာတော့မှ မပြောမဖြစ်လို့ မိဘတွေကို သူမ ဖွင့်ပြောခဲ့ရတယ်။
ဒါကိုတောင် မိဘတွေက မသိကြဘူးလား၊ ဒီအရွယ်လေးနဲ့ ကိုယ်ဝန်ရအောင် ဘယ်လောက်တောင် အနေအထိုင်မတတ်တာလဲဆိုတဲ့ စကားတွေနဲ့ ဝေဖန်ပြစ်တင်နေကြတဲ့ သူမရဲ့ပတ်ဝန်းကျင်။ တကယ်ဆို သူမရဲ့ အရွယ်နဲ့မမျှတဲ့ မိခင်စိတ်ဓာတ်ကို လေးစားရမှာ မဟုတ်ဘူးလား။
အခုလို ကျူးလွန်တဲ့ တရားခံထက် ကျူးလွန်ခံရတဲ့သူ အပေါ်မှာပဲ ဝေဖန်တိုက်ခိုက်နေကြတာဟာ အင်မတန်ဆိုးရွားတဲ့ အခြေအနေတခု ဖြစ်ပါတယ်။ သူတို့ဟာ တရွာတည်းမှာ အတူနေကြတဲ့သူတွေဖြစ်ပြီး ကျူးလွန်ခံရသူ မိန်းကလေးဘက်က ရပ်တည်ပေးသူက အလွန်ဆုံးရှိမှ လူ ၂၀ ကျော်လောက်သာဖြစ်ပြီး ကျန်တဲ့ ရွာသူရွာသား အများစုက ကျူးလွန်တဲ့ ဘုန်းကြီးဘက်မှာ ရပ်တည်နေကြပါတယ်။
ဒီလို မှားယွင်းတဲ့အယူအဆတွေရှိနေတဲ့ ပတ်ဝန်းကျင်မှာ မိန်းကလေးငယ်နဲ့ သူ့မိသားစုဟာ ဘယ်လိုလုံလုံခြုံခြုံနဲ့ ဆက်နေထိုင်လို့ ရပါ့မလဲ။ ကျူးလွန်ခံရတဲ့ မိန်းကလေးလည်း ကလေးတဖက်နဲ့ ကျောင်းထွက်ခဲ့ရတယ်။ ကလေးရော မိခင်ရော ရွာမှာမနေရဲတော့ တခြားတနေရာကို ပြောင်းရွှေ့နေထိုင်ကြရတယ်။
အသက်မပြည့်သေးတဲ့မိခင်ဟာ သူ့ကလေးအတွက် နို့ချိုတောင် မဖန်တီးပေးနိုင်လိုက်ဘူး။ ကျောင်းဆက်တက်နိုင်ဖို့ ကလေးကို အဒေါ်ဖြစ်သူဆီ ပို့ထားခဲ့ပေမယ့် ကျောင်းလည်း ဆက်မတက်နိုင်တော့ဘဲ မိသားစုနဲ့ဝေးရာမှာ သူ့ဘဝကို သူ့ဘာသာ ရုန်းကန်နေရရှာပါတယ်။
ဖြစ်ခါစကတော့ မိန်းကလေးငယ်ကို ဘုန်းကြီးက လက်ထပ်ယူပါမယ်လို့ ကတိပေးတယ်။ နောက်တော့ ကလေးစရိတ် တလတသိန်း ထောက်ပံ့မယ်လို့ ဆိုပြန်တယ်။ ဒါပေမယ့် ဘုန်းကြီးရဲ့ မိဘတွေက လက်မခံပါဘူး။
ကလေးမွေးပြီးတဲ့အထိ ကလေးစရိတ်လည်း မထောက်ပံ့ခဲ့သလို ဒီကလေးက သူနဲ့ရတာမဟုတ်ဘူးလို့ ပြန်ငြင်းဆိုပြန်ပါတယ်။ စတင်တရားစွဲဆိုတဲ့အချိန်မှာ သံဃာ့မဟာနာယကကို တိုင်ကြားပြီး ရဟန်းသိက္ခာချကာ ဖမ်းဆီးဖို့ ကြိုးစားခဲ့ပေမယ့် ဘုန်းကြီးက အဖမ်းမခံခဲ့ပါဘူး။ ကလေးရဲ့ DNA စစ်ဆေးပြီး အဖြေတူမှသာ ရဲက သွားရောက်ဖမ်းဆီးခဲ့ပြီး ရဟန်းသိက္ခာတော်ကို ချခဲ့ရတာ ဖြစ်ပါတယ်။
တရားခံကို မဖမ်းဆီးရသေးခင်အချိန်ထိ ကျူးလွန်ခံရသူ မိန်းကလေးငယ် မိသားစုဟာ စိတ်အေးလက်အေးနဲ့ မနေနိုင်ခဲ့ပါဘူး။ ဘုန်းကြီး ဦးသုနန္ဒရဘက်က ဆွေမျိုးအင်အား ငွေအင်အား တောင့်တင်းသလို ရွာသူရွာသားတွေကလည်း သူတို့ကိုးကွယ်တဲ့ ကျောင်းထိုင်ဘုန်းကြီး မရှိတော့ရင်ဆိုတဲ့ စိတ်နဲ့ ဘုန်းကြီးဘက်ကသာ ရပ်တည်ခဲ့ကြပါတယ်။
တကယ်တော့ အရင်ကျောင်းထိုင်ဘုန်းကြီး ပျံလွန်တော်မူတဲ့အချိန်မှာ အခု ဦးသုနန္ဒရက ကျောင်းထိုင်ဆရာတော်ဖြစ်လာပြီး ကိုးကွယ်ယုံကြည်သူတို့ရဲ့ ဖြူစင်တဲ့စိတ်ကို ခုတုံးလုပ်ကာ ဘုန်းကြီးဆိုတဲ့ အမိန့်အာဏာနဲ့ မိန်းကလေးငယ်အပေါ် ဖြားယောင်းကျူးလွန်ခဲ့တာ ဖြစ်ပါတယ်။
ကျေးလက်တောရွာတွေက ရွာသူရွာသားတွေဟာ အင်မတန် ရိုးသားကြပါတယ်။ သင်္ကန်းဝတ်ဘုန်းကြီး၊ ကိုယ်တော်တွေဆိုတာနဲ့ အလွယ်တကူ ယုံကြည်ကိုးကွယ်ကြတယ်။ စာသင်ပေးတဲ့ ဆရာတွေဆိုရင်လည်း ကလေးတွေ ပညာရေးအတွက် လေးစားအားကိုးကြပါတယ်။
အသိအမြင်မကျယ်တဲ့ ရွာသူရွာသားတွေရဲ့ ယုံကြည်အလေးထားမှုကို အာဏာတစုံတရာ အသုံးချနိုင်တဲ့သူတွေက လွှမ်းမိုးချုပ်ကိုင်ကြတယ်။ ရွာသားတွေကလည်း သူတို့အားကိုးနေတဲ့သူကို အမှားတခုခုကျူးလွန်ရင်တောင် မားမားမတ်မတ် ရပ်တည်ပေးချင်ကြပါတယ်။
ဒါကြောင့် တရားစွဲဆိုလို့ အပြစ်ရှိပြီး တရားခံကို ထောင်ချလိုက်ရုံနဲ့ ဒီကိစ္စတွေက အလုံးစုံ ပပျောက်မသွားနိုင်ပါဘူး။ ဒီအဖြစ်အပျက်ကို ပြန်လည်သုံးသပ်ဆင်ခြင်ပြီး အသိအမြင်တွေ ရှိလာအောင်၊ အမှားအမှန် ခွဲခြားတတ်လာအောင်၊ ကျူးလွန်သူဟာ တကယ်အပြစ်ရှိကြောင်း သိမြင်နားလည်အောင်၊ ကျူးလွန်ခံရသူကို ဖေးမကူညီတတ်လာအောင် အသိအမြင် မြှင့်တင်ပေးမှုတွေကို မဖြစ်မနေ လုပ်ဆောင်ပေးဖို့ လိုအပ်ပါတယ်။
တကယ်တော့ သက်ငယ်မုဒိမ်းမှုလို အမျိုးသမီးတွေအပေါ် အကြမ်းဖက်မှု ဆိုတာတွေဟာ နီးစပ်တဲ့အသိုင်းအဝိုင်း ပတ်ဝန်းကျင်မှာ ဖြစ်ပေါ်နေတာပါ။ ဒီလို ကျူးလွန်ခံရတဲ့ မိန်းကလေးအပေါ်မှာပဲ အပြစ်ဖို့နေတဲ့ ပတ်ဝန်းကျင်မှာ မိန်းကလေးတွေဟာ ရှင်သန်ရပ်တည်ဖို့ ခက်ခဲလာပါတယ်။
ပတ်ဝန်းကျင်ရဲ့ ဝေဖန်မှုတွေကို မခံနိုင်တဲ့ မိန်းကလေးတွေကတော့ အခုလို မုဒိမ်းမှုကနေ ကိုယ်ဝန်ရလာရင် တိတ်တဆိတ်ဖျက်ချဖို့ ကြိုးစားကြရင်း အခန့်မသင့်ရင် ကိုယ်ဝန်ဆောင်မိန်းကလေးရဲ့ အသက်ပါ ဆုံးရှုံးနိုင်ပါတယ်။ တကယ်လို့ ကလေးမွေးခဲ့ရင်တောင် နောက်ဆက်တွဲ တာဝန်တွေဖြစ်တဲ့ ကလေးကို ပြုစုစောင့်ရှောက်ဖို့ အဆင်သင့်မဖြစ်မှု၊ ကလေးစရိတ် မတတ်နိုင်မှု၊ ပတ်ဝန်းကျင်ရဲ့ အထင်သေးခံရမှုတွေကြောင့် ကလေးကို စွန့်ပစ်မှုတွေလည်း ပိုမိုများပြားလာနိုင်ပါတယ်။
ဒါကြောင့် ကျူးလွန်ခံရတဲ့ မိန်းကလေးတွေကို အပြစ်ဖို့မှု၊ ဝေဖန်အပုပ်ချမှုတွေဟာ စကားလုံးတွေနဲ့ တိုက်ခိုက်တဲ့အဆင့်ကနေ လေထဲလွင့်ပါ ပျောက်ကွယ်သွားတာမျိုးမဟုတ်ဘဲ မိန်းကလေးတယောက်ရဲ့ ဘဝတခုလုံး ဆုံးရှုံးသွားတဲ့အထိ ရိုက်ခတ်နိုင်ပါတယ်။
လုံခြုံတဲ့ လူမှုဝန်းကျင်တခု ဖန်တီးဖို့ဆိုရင် ကျူးလွန်ခံရတဲ့ မိန်းကလေးတွေအပေါ် အပြစ်တင် ရှုတ်ချမှုတွေကို ချက်ချင်းရပ်တန့်ပြီး အမှန်တရားဘက်က ရပ်တည်လို့ ကိုယ်ချင်းစာတဲ့ စိတ်ဓာတ်တွေ၊ ကူညီဖေးမတဲ့ တွဲလက်တွေနဲ့ ကြိုဆိုကမ်းလင့်ဖို့ လိုအပ်နေကြောင်း တင်ပြလိုက်ရပါတယ်။
ခင်စုကြည်
(hiburma.net ဝက်ဘ်ဆိုက်မှ ပြန်လည်ဖော်ပြသည်။)
