ရှမ်းပြည်တောင်ပိုင်း၊ ဖယ်ခုံမြို့နယ်မှာရှိတဲ့ မိုးဗြဲက တပ်သိမ်းမြေ ဧက ၂၀၀ ကျော်ကို တပ်မတော် ခမရ ၄၂၂ တပ်ရင်းက ဒေသခံတောင်သူ ၂၂၈ ဦးထံ ပြန်လည်ပေးအပ် လိုက်ပါတယ်။
ခုလို ပြန်လည်ပေးအပ်လိုက်တဲ့ မြေတွေကို ဖယ်ခုံမြို့နယ်ခန်းမမှာ စက်တင်ဘာလ ၈ ရက်နေ့က ရှမ်းပြည်နယ်ဝန်ကြီးချုပ် ဒေါက်တာလင်းထွဋ်အပါအဝင် ရှမ်းပြည်နယ်အစိုးရအဖွဲ့၊ ကယန်းတိုင်းရင်းသားလူမျိုးရေးဝန်ကြီးနဲ့ ဖယ်ခုံမြို့နယ်လွှတ်တော် အမတ်တွေ တက်ရောက်ပြီးတော့ တောင်သူတွေဆီ အခမ်းအနားနဲ့ ပေးအပ်ခဲ့တာပါ။
လယ်ယာမြေ သိမ်းဆည်းခံရတာကြောင့် ဒေသခံပြည်သူတွေ နှစ်နာမှုမရှိစေဖို့ အလေးထားဆောင်ရွက်နေတယ်လို့ ဝန်ကြီးချုပ်က အခမ်းအနားမှာ ပြောပါတယ်။
ရှမ်းပြည်နယ် အစိုးရအဖွဲ့ ဝန်ကြီးချုပ် ဒေါက်တာလင်းထွဋ် က “ဒေသခံပြည်သူများ နစ်နာမှုမရှိစေဖို့အတွက် မြေသိမ်းဆည်းခံရမှု ပြဿနာတွေ အပေါ်မှာ အခြေခံပြီး ချမှတ်ထားတဲ့ မူဝါဒဥပဒေ၊ နည်းဥပဒေ လုပ်ထုံးလုပ်နည်းများနဲ့အညီ လျှင်မြန်စွာ ဆောင်ရွက်နိုင်ရန် လယ်ယာမြေနဲ့ အခြားမြေများ သိမ်းဆည်းမှုခံရမှုများ ပြန်လည်စိစစ်ရေး ကော်မတီ အဆင့်ဆင့်ကို ဖွဲ့စည်းပြီး အလေးထား ဆောင်ရွက်လျက်ရှိပါတယ်။” လို့ ဆိုပါတယ်။
တပ်မတော်က အခုလိုမြေဧကအချို့ကို ပြန်လည်ပေးအပ်ခဲ့ပေမယ့်လည်း ဒေသခံ တောင်သူအချို့ကသာ ပြန်လည်ရရှိပြီး မြေပြန်မရသေးတဲ့ တောင်သူတွေလည်း ကျန်ရှိနေသေး တယ်လို့ တောင်သူတွေက ဆိုပါတယ်။
အခုလို လွှဲအပ်လိုက်တဲ့မြေတွေဟာ ဧက ၂၀၀ ကျော်သာရှိပြီး ဧက ၈၀၀ ကျော် ကျန်ရှိနေသေးတာကြောင့် တောင်သူတွေက မြေတွေ ပြန်ရဖို့ ဆက်ပြီး တောင်းဆိုသွားမယ်လို့ ဆိုပါတယ်။
တောင်သူတဦးဖြစ်သူ ကိုအောင်မျိုးခန့်က “မိုးဗြဲမှာ သိမ်းဆည်းမြေတွေ အများကြီးကျန်ပါ သေးတယ်။ ကျနော်တို့ တောင်းဆိုတဲ့ အချက်အလက် အပြည့်အဝမရရှိသေးဘူး။ ဆက်လက် လည်း တောင်းဆိုရဦးမယ့် အနေအထားမျိုး ရှိတယ်ဆိုတာ ကျနော် အတိအလင်း ပြောချင်ပါတယ်” လို့ ပြောပါတယ်။
တောင်သူ ဦးစိုးပိုင်က “ပြီးခဲ့တဲ့ အစိုးရထက်သာအောင် မူလ လက်ငုပ်တောင်သူထံ ရောက်ရှိရေးအတွက် အခုကျနော် ပြောထားတဲ့ မြေကွက်ထဲမှာ ပြန်လည်စိစစ်ပေးဖို့ပဲ ကျနော်တောင်းဆိုချင်ပါတယ်” လို့ ဆိုပါတယ်။
အရင် ဦးသိန်းစိန်အစိုးရ လက်ထက်တုန်းကလည်း တပ်မတော်က မြေဧကအချို့ကို ပြန်လည်လွှဲအပ်ခဲ့တာရှိပေမယ့် လက်ရှိအချိန်ထိ မူရင်းတောင်သူတွေရဲ့ လက်ထဲ မရောက်ဘဲ အခြားဌာနဆိုင်ရာတွေနဲ့ အဖွဲ့အစည်းအချို့ရဲ့ လက်ထဲရောက်သွားတာတွေရှိနေတယ်လို့ တောင်သူတွေက ပြောပါတယ်။
မိုးဗြဲတပ်သိမ်းမြေကိစ္စနဲ့ ပတ်သက်ပြီး တောင်သူတွေက သတင်းစာ ရှင်းလင်းပွဲပြုလုပ်သွားမယ်လို့ ဆိုပါတယ်။
အဆိုပါမြေတွေကို တပ်မတော် ခမရ ၄၂၂ တပ်ရင်းက ၁၉၉၂ ခုနှစ်မှာ သိမ်းယူခဲ့တဲ့မြေတွေဖြစ်ပါတယ်။
သတင်း - ခွန်တူးတူးလေး
