ကျောက်ပန်းတောင်းမြို့နယ်၊ ပုပ္ပားမှာ နဂါးမောက်သီးစိုက် တောင်သူတွေ အခုနှစ် အထွက်နှုန်းကောင်းသလို ဈေးကောင်းရနေတယ်လို့ စိုက်ပျိုးတောင်သူ ဦးသိန်းထွန်းက ပြောပါတယ်။
ဒီနှစ်က အရင်နှစ်ထက် သီးထွက်အားလည်း ကောင်းတယ်၊ ဈေးကလည်း ၁ ကီလိုကို ၁၂၀၀ ကျပ်ရောင်းရတယ်။ ၁ ကီလိုကို ကြီးရင် ၂ လုံးလောက်၊ လတ်ရင် ၃ လုံးလောက်စီးတယ်လို့ အပင်တိုင်ရေ ၁၀၀ ကျော် စိုက်ပျိုးထားတဲ့ ဦးသိန်းထွန်းက ဆိုပါတယ်။
“ဝယ်လက်တွေကလည်း ခြံထဲအထိ လာဝယ်နေကြတာဖြစ်လို့ စိတ်ချမ်းသာရတယ်။ အရင်နှစ်တွေက ၁ ကီလိုကို ၆၀၀၊ ၇၀၀ အထိ ရခဲ့ပြီး အခုနှစ်မှာတော့ ဈေးက နှစ်ဆလို့တောင် ပြောလို့ရနေတယ်။ နဂါးမောက်သီးက နယုန်လလောက်ကနေ တော်သလင်းလအထိ လေးပြန်လောက် စွတ်ခူးရပြီး တပြန်ခူးရင် တိုင် ၁ တိုင်စာ (လေးပင်စိုက်ပျိုး တိုင်တစ်တိုင်) ကို (၁၅)ကီလိုလောက် ခူးစွတ်ရတယ်။”
ပုပ္ပားမှာ နဂါးမောက်သီးခြံ ၁၀၀ လောက်ရှိပြီး အဓိက ရန်ကုန်ကို တင်ပို့ကြပါတယ်။ အခုအချိန်က အသီး အထွက်နည်းသွားပြီဖြစ်လို့ အခု လေးပြန်မြောက်အချိန်မှာ ဈေးပိုလာပြီး ဇူလိုင်လထဲမှာ အထွက်အများဆုံး ဖြစ်တယ်လို့ ဆိုပါတယ်။
ဒီနှစ် အသီးပေါ်စကတော့ ၁ ကီလို ၈၀၀ ရောင်းရပြီး အခုလမှာတော့ ၁၂၀၀ နှုန်းရောင်းနေရကာ နောက်နှစ်ပြန်လောက် ခူးပြီးရင် အသီးတုံးသွားပြီလို့ ပြောပါတယ်။
