ပညာရေးလောကသားတိုင်း B.Ed. ပညာရေးဘွဲ့ကို လိုချင်ကြပါတယ်။ ပညာရေးတက္ကသိုလ်ဆိုတာ ကျောင်းဆရာ၊ ဆရာမတွေရဲ့ အိပ်မက်တခုဆိုလည်း မမှားပါဘူး။ ပညာရေးတက္ကသိုလ် ဝင်ခွင့်ရဖို့အတွက် နည်းလမ်းသုံးမျိုး ရှိပါတယ်။
ပထမနည်းလမ်းက တက္ကသိုလ်ဝင်တန်းစာမေးပွဲ အောင်တာနဲ့ ပညာရေးတက္ကသိုလ် ဝင်ခွင့်အတွက် သတ်မှတ်ထားတဲ့ရမှတ် ပြည့်မီရင် ဝင်ခွင့်ရပါတယ်။ ဒုတိယနည်းလမ်းက ပညာရေးတက္ကသိုလ် အမှတ်မမီလိုက်တဲ့ တက္ကသိုလ်ဝင်တန်း အောင်မြင်သူတွေဟာ ပညာရေးကောလိပ် (ဆရာအတတ်သင်) ဝင်ခွင့်ရခဲ့မယ်ဆိုရင် ပညာရေးကောလိပ် ၂ နှစ်တက်ပြီး ကြိုးစားလို့ သတ်မှတ်ထားတဲ့ Grade အဆင့်ကို ရခဲ့ရင် ပညာရေးတက္ကသိုလ် ဆက်တက်လို့ ရပါတယ်။ တတိယနည်းလမ်းကတော့ လုပ်ငန်းခွင်ထဲကနေ ဌာနက သတ်မှတ်ထားတဲ့ လုပ်သက်နဲ့ ရာထူးအရ ပညာရေးတက္ကသိုလ်ဝင်ခွင့်ကို ဝင်ရောက်ဖြေဆိုပြီး အောင်မြင်ခဲ့မယ်ဆိုရင် ပညာရေးတက္ကသိုလ် တက်ခွင့်ရပါတယ်။
ဒီဆောင်းပါးမှာတော့ တတိယနည်းလမ်းနဲ့ ဘီအီးဒီဝင်ခွင့် ကြိုးစားကြသူတွေရဲ့ အခက်အခဲတွေကိုသာ တင်ပြသွားမှာ ဖြစ်ပါတယ်။
ပညာရေးတက္ကသိုလ်တက်ခွင့်ရဖို့ ပထမနည်းလမ်းနဲ့ ဒုတိယနည်းလမ်းကတော့ ရှင်းပါတယ်။ အဆင့်မီရင် တက်ခွင့်ရမယ်။ မမီရင် မရဘူး။ ဒါပေမယ့် တတိယနည်းလမ်းဖြစ်တဲ့ လုပ်ငန်းခွင်ထဲက ဘီအီးဒီဝင်ခွင့် ဝင်ရောက်ဖြေဆိုရာမှာ အောင်မြင်ဖို့ အခွင့်အရေးဟာ တကယ့်ကို မလွယ်တဲ့ကိစ္စပါ။ ဘီအီးဒီဝင်ခွင့်ဖြေရာမှာ အရင်က ကိုးတန်း၊ ဆယ်တန်းစာကို ဖြေဆိုခဲ့ရပေမယ့် ၂ဝ၁၄ လောက်ကစပြီး တက္ကသိုလ် ပထမနှစ်နဲ့ ဒုတိယနှစ်စာကို ဖြေဆိုလာရပါတယ်။
ဘာပဲဖြစ်ဖြစ် ဒီအထိတော့ ပြဿနာမဟုတ်ပါဘူး။ ဘီအီးဒီဝင်ခွင့်အောင်ချင်ရင် သတ်မှတ်ထားတဲ့ ဘာသာရပ်ကို လေ့လာရတာက သဘာဝကျပါတယ်။ ခက်တာက ဘီအီးဒီဝင်ခွင့်အတွက် လုပ်ငန်းခွင်ထဲက ဝင်ရောက်ဖြေဆိုသူတွေရဲ့ ခွဲတမ်းက သတ်မှတ်ထားတဲ့အခါ သက်ဆိုင်ရာစာကို လေ့လာလို့ ဖြေနိုင်ကြပါရက်နဲ့ ဘီအီးဒီဝင်ခွင့် အောင်စာရင်းမှာ ပါမလာတာက တကယ့်ပြဿနာပါပဲ။
၂ဝ၁၈-၂ဝ၁၉ ပညာသင်နှစ်အတွက် လုပ်ငန်းခွင်အတွင်းက ဘီအီးဒီရွေးချယ်မယ့် ခွဲတမ်းကတော့-
၁။ ဝင်ခွင့်စာမေးပွဲ ဖြေဆိုသည့် အထက်တန်းပြများ ၄၅ ရာခိုင်နှုန်း (၆၇၅) ဦး
၂။ လစာနှုန်းတူညီသည့် သင်ကြားရေးနှင့်သက်ဆိုင်သော ဒုဦးစီးမှူးများ၊ ဒုကြီးကြပ်ရေးမှူးများနှင့် PGDMA ဘွဲ့ရ ကွန်ပျူတာ လုပ်ဆောင်ရေးမှူးများ ၅ ရာခိုင်နှုန်း (၇၅) ဦး
၃။ ဝင်ခွင့်စာမေးပွဲ ဖြေဆိုသည့် အလယ်တန်းပြများ၊ မူလတန်းကျောင်းအုပ်များ ၈ ရာခိုင်နှုန်း (၁၂ဝ) ဦး
၎။ လစာနှုန်းထားတူညီသည့် သင်ကြားရေးနှင့် သက်ဆိုင်သော ဒုလ/ထကြီးကြပ်ရေးမှူးများ၊ PGDMA ဘွဲ့ရ လက်ထောက် ကွန်ပျူတာလုပ်ဆောင်ရေးမှူးများ ၂ ရာခိုင်နှုန်း (၃ဝ) ဦး
၅။ ဝင်ခွင့်စာမေးပွဲဖြေဆိုသည့် ပညာရေးကောလိပ်မှ နည်းပြများ ၁ဝ ရာခိုင်နှုန်း (၁၅ဝ) ဦး
၆။ ဝင်ခွင့်စာမေးပွဲဖြေဆိုသည့် လုပ်သက်ကြီးစဉ်အုပ်စုမှ လျှောက်ထားသော အထက်တန်းပြများ၊ အလယ်တန်းပြများ ၃ဝ ရာခိုင်နှုန်း (၄၅ဝ) ဦးတို့ ဖြစ်ပါတယ်။
ဘီအီးဒီတက်ခွင့်ပြုမယ့်ဦးရေဟာ စုစုပေါင်း ၁၅ဝဝ ဦး ဖြစ်ပါတယ်။ ဒီလို ခွဲတမ်းသတ်မှတ်ချက်ကို အဆင့်မြင့်ပညာဦးစီးဌာနက ၂ဝ၁၇ ခုနှစ် ဒီဇင်ဘာလ ၂၉ ရက်မှာ တရားဝင်စာထုတ်ပြီး သက်ဆိုင်ရာ အဖွဲ့အစည်းတွေကို အကြောင်းကြားခဲ့ပါတယ်။ အခုလို သတ်မှတ်ခဲ့တဲ့ ရွေးချယ်ရေးမူတွေ သင်တန်းတက်ရောက်ရမယ့် သင်တန်းသားဦးရေနဲ့ ရာခိုင်နှုန်းကို (၂၅.၁ဝ.၂ဝ၁၇) ရက်နေ့မှာ ပညာရေးကောလိပ်များ၊ အဆင့်မြင့်ပညာဦးစီးဌာန၊ အခြေခံပညာဦးစီးဌာန၊ ဆရာအတတ်ပညာနှင့် လေ့ကျင့်ရေးဦးစီးဌာန၊ ပညာရေးသုတေသန စီမံကိန်းနှင့် လေ့ကျင့်ရေးဦးစီးဌာနမှ အဆင့်မြင့် အရာရှိကိုယ်စားလှယ်များနဲ့ တိုင်း/ပြည်နယ် ပညာရေးမှူးရုံးများမှ ပညာရေးမှူးများနဲ့ ကျင်းပပြုလုပ်ခဲ့တဲ့ ညှိနှိုင်းဆွေးနွေးပွဲ ရလဒ်အပေါ် မူတည်ပြီး အဆင့်မြင့်ပညာဦးစီးဌာနက ထုတ်ပြန်ကြေညာခဲ့တာ ဖြစ်ပါတယ်။
ဘီအီးဒီတက်ခွင့် စိစစ်ရွေးချယ်ရေး အဖွဲ့ကလည်း သတ်မှတ်ထားတဲ့ ရာထူးအဆင့်အလိုက် ရာခိုင်နှုန်းအလိုက် ရွေးချယ်ခေါ်ယူကြပါတယ်။ ဒါက ဌာနဘက်က ခွင့်ပြုနိုင်မယ့် ကန့်သတ်ချက်ကို သတ်မှတ်ထားတဲ့အတိုင်း ရွေးချယ်ခေါ်ယူကြတာပါပဲ။ တဖက်မှာလည်း ဖြေနိုင်ရက်သားနဲ့ ဝင်ခွင့်မရတာဟာ ဆရာ၊ ဆရာမတွေရဲ့ ကြိုးစားချင်စိတ်ကို လျော့ကျလာစေတာ အမှန်ပါပဲ။ တနှစ်ဖြေတယ်။ ဖြေနိုင်တယ်။ မပါဘူး။ ဒီလိုနဲ့ သုံးလေးနှစ်ဖြေနေကြရင်း လူတွေက စိတ်ဓာတ်ကျလာတယ်။ ဘီအီးဒီပါဖို့အတွက် ကံကိုပဲ အားကိုးရမလို ဖြစ်လာတယ်။ အသက်ကလည်း ကြီးလာပြီ၊ ငယ်ငယ်ရွယ်ရွယ်တွေလို စာကျက်ရတာလည်း မလွယ်တော့ဘူး။ ဒီလိုနဲ့ ဘီအီးဒီအိပ်မက်ကို ကျောခိုင်းပြီး မေ့ပစ်ဖို့ ကြိုးစားခဲ့ရတဲ့ ဆရာ၊ ဆရာမတွေ အများကြီးပါပဲ။ ဘီအီးဒီဝင်ခွင့် အောင်ဖို့အတွက် အနီးကပ်သင်တန်းတွေပေးတဲ့ ပါမောက္ခတွေလည်း ရှိပါတယ်။
ရန်ကုန်လိုနေရာမျိုးမှာတော့ ဘီအီးဒီဝင်ခွင့် စာမေးပွဲမှာ ပါနိုင်မယ့် မေးခွန်းတွေကို သင်ပေးတဲ့ဝိုင်းတွေ ရှိပါတယ်။ ဒီဝိုင်းမျိုးက တော်ရုံအဆက်အသွယ်မျိုးနဲ့ တက်ခွင့်မရပါဘူး။ အဆက်အသွယ်ကောင်းသူတွေသာ ဘယ်မှာတက်ရတယ်ဆိုတာ သိနိုင်ပါတယ်။ ကုန်ကျစရိတ်အားဖြင့်တော့ ၆ သိန်းလောက် ကုန်တယ်လို့ အဲလိုဝိုင်းမျိုးမှာ တက်ဖူးပြီး ဘီအီးဒီလည်း ပါသွားတဲ့ အမည်မဖော်လိုသူ ဆရာတယောက်က ပြောပါတယ်။
အဲလိုဝိုင်းမျိုးမှာ သင်လိုက်တဲ့အပုဒ်တွေ တိုးတယ်လို့လည်း ဆိုပါသေးတယ်။ ဒါပေမယ့် ဒီလိုဝိုင်းမျိုးဟာ ဘီအီးဒီတက်ခွင့်ရဖို့ အာမ မခံနိုင်သေးပါဘူး။ ဌာနက သတ်မှတ်ထားတဲ့ ရာနှုန်းအလိုက် သတ်မှတ်ထားတာကြောင့် ဖြေနိုင်ပေမယ့်လည်း ရာခိုင်နှုန်း သတ်မှတ်ချက်အရ ဘီအီးဒီဝင်ခွင့်ဟာ ကံအပေါ် မူတည်နေပါသေးတယ်။ တကယ်တော့ ဘီအီးဒီဝင်ခွင့်အောင်တာဟာ တက္ကသိုလ်ဝင်တန်း အောင်သလိုမျိုးပါပဲ။ ဆိုလိုတာက တက္ကသိုလ်ဝင်တန်းအောင်မှသာ ဘဝအတွက် ရှေ့ဆက်ဖို့ မျှော်လင့်နိုင်ကြသလိုပါပဲ။ လုပ်ငန်းခွင်ထဲက ဆရာ၊ ဆရာမတွေအတွက်တော့ ဘီအီးဒီဝင်ခွင့် အောင်မှသာ ရှေ့ဆက် ရာထူးရအောင် ကြိုးစားပိုင်ခွင့် ရှိလာနိုင်လို့ပါပဲ။ ဘာပဲဖြစ်ဖြစ် နေရာတိုင်းမှာတော့ ကန့်သတ်ချက်တွေ အနည်းနဲ့အများဆိုသလို ရှိတတ်ကြတာပါပဲ။ လုပ်ငန်းခွင်ထဲရောက်ပြီးမှ ဘီအီးဒီဝင်ခွင့်ကို ကြိုးစားကြမယ် ဆိုရင်တော့ စိတ်ရှည်လက်ရှည်နဲ့ စောင့်ဖြေနိုင်ဖို့ လိုပါတယ်။ ဖြေနိုင်ပေမယ့် မပါလို့ စိတ်ဓာတ်မကျကြဘဲ အောင်မြင်တဲ့အထိ ဖြေကြဖို့ တိုက်တွန်းချင်ပါတယ်။ ငွေနဲ့ကပ်လို့ ပါတယ်ဆိုတာထက် ဘီအီးဒီဝင်ခွင့်ဟာ တက္ကသိုလ်ဝင်တန်းလိုပဲ နတ်ကြီးတယ်လို့သာ ဆိုချင်ပါတယ်။ လုပ်ငန်းခွင်ထဲကနေ ဘီအီးဒီအိပ်မက်ကို စိတ်ရှည်လက်ရှည် ဆက်မက်နိုင်ကြပါစေ။
ပန်းသီကြိုး (ရသေ့တောင်)
