စစ်ကိုင်းတိုင်းဒေသကြီး၊ ကလေးမြို့နယ်၊ အင်ဒိုင်းကုန်းကျေးရွာမှာ ဇွန် ၂၄ ရက် ညပိုင်းက ၁၁ နှစ်အရွယ် အမြွှာညီအစ်မ ၂ ဦးအား အဓမ္မပြုကျင့်ဖို့ ကြံစည်မှုနဲ့ ဦးလေးအရင်းကို ဖမ်းဆီးစစ်ဆေးနေတယ်လို့ ကလေးမြို့မရဲစခန်းက တာဝန်ရှိ ရဲဝန်ထမ်းတဦးက ပြောပါတယ်။
“တရားခံကို ၂၆ ရက်နေ့ တိုင်ချက်ဖွင့်တဲ့နေ့ပဲ သွားဖမ်းခဲ့တယ်။ စစ်ဆေးနေတယ်” လို့ ကလေးမြို့ ရဲစခန်းက တာဝန်ရှိ ရဲတပ်ဖွဲ့ဝင်တဦးက ပြောပါတယ်။
အမြွှာညီအမ ၂ ဦးက ဦးလေးဖြစ်သူ ထန်းထွားမာရဲ့ နေအိမ်မှာ သွားရောက်ညအိပ်ခဲ့ရာ ဦးလေးက အစ်မဖြစ်သူရဲ့ ပေါင်ကို လက်နဲ့ ပွတ်သပ်ခဲ့သလို ညီမဖြစ်သူရဲ့ ရင်သားနဲ့ခန္ဓာကိုယ်အနှံ့ မဖွယ်မရာပြုလုပ်ခဲ့ပြီး အဓမ္မပြုကျင့်ဖို့ ကြိုးစားခဲ့တာကြောင့် ညီအစ်မ ၂ ဦး နေအိမ်ကို ပြန်ပြေးလာခဲ့ပြီး ဖခင်ဖြစ်သူအား ပြောပြခဲ့ကြောင်း ရဲစခန်း ထွက်ဆိုချက်အရ သိရပါတယ်။
ဒီအမှုကို ကလေးမြို့ အထက်ချင်းတွင်း လူငယ်ကွန်ရက်က ကူညီနေပြီး ကွန်ရက်ရဲ့ ပရောဂျက် ဒါရိုက်တာ ကိုကျော်သက်ဝင်းက ခုလို ပြောပါတယ်။
“ဖြစ်ပွားတာကတော့ ၂၄ ရက်နေ့ ညပိုင်းကဖြစ်တာပါ။ စခန်းကို ၂၆ ရက်နေ့မှာ အမှုဖွင့်ထားတယ်။ အခုလက်ရှိမှာ ကြံစည်မှုနဲ့အမှုဖွင့်ထားတယ်။ ကလေးကို ဒီနေ့ ပြည်သူ့ဆေးရုံမှာ စစ်ဆေးသွားမယ်။ ဆေးစစ်ချက်တွေယူပြီးတော့ တကယ်လို့ မုဒိမ်းမြောက်ရင် ဥပဒေအတိုင်း ကူညီသွားမယ်” လို့ ပြောပါတယ်။
ကလေးမြို့မရဲစခန်းမက တရားခံ ထန်းထွားမာကို ရာဇသတ်ကြီးပုဒ်မ - ၃၅၄/၃၇၆/၅၁၁ နဲ့ အမှုဖွင့် စစ်ဆေးနေပါတယ်။
မင်းရဲစစ်နိုင်
