ပဲခူးတိုင်း၊ ဖြူးမြို့နယ်ထဲက စစ်အာဏာရှင်တပ်ရဲ့ ဂိတ်စခန်းနဲ့ ကင်းပုန်းတွေကို ဇွန် ၇ ရက်နဲ့ ၈ ရက်နေ့မှာ တော်လှန်ရေးတပ်ဖွဲ့က ဝင်ရောက်တိုက်ခိုက်ခဲ့လို့ စစ်သား ၃ ယောက် သေဆုံးပြီး လက်နက်ခဲယမ်းတချို့ သိမ်းဆည်းရရှိခဲ့သလို PDF ရဲဘော်တယောက် ကျဆုံးကာ လက်နက်ခဲယမ်း တချို့လည်း ဆုံးရှုံးခဲ့ရတယ်လို့ ဖြူးမြို့နယ် ပကဖ ဆီကနေ သိရပါတယ်။

ဖြူးမြို့နယ် ပကဖ ပြန်ကြားရေးတာဝန်ခံက “အဲဒီနေ့ မနက် ၈ နာရီခွဲလောက်မှာ ဖြူးမြို့နယ်အပိုင် ရန်ကုန်-မန္တလေး လမ်းဟောင်းပေါ်က ညောင်ပင်သာမြို့နဲ့ ခလရ ၅ ကြား၊ အမြန်လမ်း ၁၀၇ မိုင်၊ ၅ ဖာလုံကို ဆက်သွယ်ထားတဲ့ စိမ့်ကြီးလမ်းပေါ်မှာရှိတဲ့ စစ်တပ်ဂိတ်ကို ဝင်ပစ်ခဲ့တာပါ။ အပြန်အလှန် တိုက်ပွဲဖြစ်ခဲ့ပြီးတော့ စစ်သား ၂ ယောက်သေပြီး MA1 သေနတ်တလက်နဲ့ ကျည်ဘောက်တခု သိမ်းဆည်းနိုင်ခဲ့ပါတယ်” လို့ ပြောပါတယ်။

အဆိုပါတိုက်ပွဲအတွင်း ဖြူးမြို့နယ် ပကဖ က ရဲဘော်တယောက် ကျဆုံးခဲ့သလို ၉ မမ ပစ္စတို တလက်နဲ့ ဆိုင်ကယ် ၂ စီးလည်း ဆုံးရှုံးခဲ့ရတယ်လို့ သူက ဆက်ပြောပါတယ်။

ဖြူးမြို့နယ် ပကဖ က တော်လှန်ရေးရဲဘော် ၃ ယောက်ဟာလည်း တိုက်ပွဲဧရိယာအတွင်း ပိတ်မိနေခဲ့လို့ သွားရောက်ကယ်ထုတ်ခဲ့ရသေးတယ်လို့ ဆိုပါတယ်။

ဖြူးမြို့နယ် ပကဖ တာဝန်ရှိသူတယောက်က “တိုက်ပွဲဖြစ်ပြီး ပြန်ဆုတ်လာတော့ ရဲဘော် ၃ ယောက် ရန်သူ့နယ်မြေထဲမှာ ပိတ်မိနေခဲ့လို့ ကျနော်တို့တပ်ရင်းက ရဲဘော်​တွေနဲ့ နဂါးနီတပ်ရင်းက ရဲဘော်တွေ ပေါင်းပြီး ၈ ရက်နေ့ မနက်စော ၃ နာရီလောက်မှာမှ ပြန်ပြီး ကယ်ထုတ်လာနိုင်ခဲ့တာ။ ​သူတို့ ၃ ယောက်ကို ကယ်ထုတ်ပြီး ရန်ကုန်-မန္တလေး လမ်းဟောင်းကနေ စစ်တပ် ကင်းပုန်းတွေကြားကနေ ပြန်လာတော့ လမ်းဘေးမှာ ကင်းပုန်းဝပ်နေတဲ့ စစ်သားတယောက်ကို ပစ်ခတ်ရှင်းလင်းနိုင်ခဲ့သေးတယ်။ သူ့ဆီကနေတော့ လက်နက်ခဲယမ်း မသိမ်းနိုင်ခဲ့ဘူး” လို့ ပြောပါတယ်။

ရန်ကုန်-မန္တလေးလမ်းဟောင်းကို အသုံးပြု သွားလာကြတဲ့ ခရီးသွားပြည်သူတွေအနေနဲ့ တိုက်ပွဲဖြစ်ပွားနေချိန် တိုက်ပွဲဧရိယာအတွင်း ဖြတ်သန်းမသွားကြဖို့နဲ့ စစ်တပ်ဂိတ်စခန်းတွေ အနီးဝန်းကျင်ကို ရှောင်ရှားကြဖို့လည်း တော်လှန်ရေးတပ်ဖွဲ့တွေဘက်က တိုက်တွန်းထားပါတယ်။