မန္တလေးတိုင်းဒေသကြီး မြင်းခြံမြို့တွင် ၂၀၁၈ -၂၀၁၉ ပညာသင်နှစ်အတွက် တက္ကသိုလ်ဝင်တန်းစာမေးပွဲကို မြင်းခြံသရဝဏ်စာသင်ဝိုင်းမှ မသန့်ထားထားဇော်၊ မသန့်ထက်ထက်ဇော်၊ မသန့်ထူးထူးဇော် တို့ အမြွှာညီမ ၃ ယောက်စလုံး ဂုဏ်ထူး ၄ ခုစီနဲ့ အောင်မြင်ခဲ့ပါတယ်။
မြင်းခြံ သရဝဏ်စာသင်ဝိုင်းမှ ဆရာမ ဒေါ်မြဝင်း က “ဒီညီအမ ၃ ယောက်လုံးက စာနဲ့ ပတ်သက်လာရင် သိပ်ပြီးတော့ အသည်းအသန် လုပ်ပေးစရာ မလိုဘူး၊ သူတို့ ၃ ယောက်လုံးက စာကိုလိုချင်စိတ်ရှိကြတယ်။ ပြီးတော့ သူတို့အသိစိတ်နဲ့သူတို့ ကြိုးစားကြတယ်။ ကျောင်းမှန်မှန် လည်းတက်တယ်။ ဒီအမြွှာညီအမ ၃ ယောက်လုံးက အနေအထိုင်ကလည်း သိပ်အေးတယ်။ လိမ္မာယဉ်ကျေးကြတယ်။ သူတို့အချင်းချင်း စာပဲ တိုင်ပင်ပြီး ကြိုးစားကြတယ်။ ဒါပေမယ့် အင်္ဂလိပ်စာတော့ သူတို့ အားနည်းကြတယ်။၊ အဓိကတော့ သူတို့ကိုယ်တိုင် စာကို လိုချင်တဲ့စိတ်ရှိပြီး တအားကြိုးစားကြတဲ့ ကလေးတွေမို့ ခုလို အမြွှာညီအမ ၃ ယောက်လုံး ဂုဏ်ထူး ၄ ခုစီနဲ့ အောင်မြင်ကြတာပါ။ အရမ်းပီတိ ဖြစ်ရပါတယ်” လို့ ဒီဗွီဘီကို ပြောပါတယ်။
အမြွှာညီအမ ၃ ယောက်စလုံးဟာ မြင်းခြံမြို့နယ် ဖက်ပင်အိုင်ကျေးရွာမှာ ၈ တန်းအထိပညာသင်ကြားခဲ့တာ ဖြစ်ပြီး၊ မြင်းခြံ ( အ-ထ-က ၄ ) မှာ ၉ တန်းမှစပြီး တက်ရောက် ပညာသင်ကြားခဲ့တာ ဖြစ်ပါတယ်။
အမြွှာညီအမ ၃ ယောက်ရဲ့ မိခင်ဖြစ်တဲ့ ဒေါ်ခင်မျိုးမင်းက “သူတို့ ညီအမ ၃ ယောက်လုံးက ငယ်စဉ်ထဲက စာနဲ့ပတ်သက်ရင် တစိုက်မတ်မတ်ကြိုးစားကြတယ်။ သူတို့ ဖြစ်ချင်တဲ့ ဆန္ဒလေးတွေ ဖြစ်ခွင့်ရကြရင်တော့ ပိုကောင်းတာပေါ့။ သမီးတွေအတွက် အရမ်းဝမ်းသာမဆုံးဖြစ်ရပါတယ်” လို့ သူမ က ပြောဆိုပါတယ်။
အမြွှာညီအမ ၃ ယောက်စလုံးဟာ သူတို့ရဲ့ ဝါသနာနဲ့ ရည်မှန်းချက်တွေက ဆရာဝန်မကြီးတွေ ဖြစ်ချင်ကြတယ်လို့ ဆိုပါတယ်။
မသန့်ထက်ထက်ဇော်က “သမီးတို့ ညီအမ ၃ ယောက်လုံးရဲ့ မိဘတွေကလည်း ပညာရေးကို ဖြည့်ဆည်းပေးတယ်။ ပြီးတော့ သမီးတို့က ကျန်းမာရေးကိုလည်းဂရုစိုက်တယ်။ စာကိုလည်း ကြိုးစားတဲ့အတွက် ခုလို အောင်မြင်ခဲ့တာပါ။ ပြီးတော့ သမီးတို့ ညီအမ ၃ ယောက်လုံးက ဆရာဝန်မကြီး ဖြစ်ချင်တယ်။ ခုလို အောင်မြင်လို့ အရမ်း ပျော်ပါတယ်” လို့ ပြောပါတယ်။
မြင်းခြံမြို့နယ်မှာ စာစစ်ဌာန ၇ ခု ရှိခဲ့ပြီး၊ ဝင်ရောက်ဖြေဆိုသူ ၄၆၆၀ ဦး ရှိကာ တက္ကသိုလ်ဝင်တန်း စာမေးပွဲ အောင်မြင်ခဲ့သူ ၁၅၄၈ ဦး တို့ အောင်မြင်ခဲ့ကြပြီး ဘာသာစုံ ဂုဏ်ထူးထွက်ရှိသူတဦး ပါဝင်ခဲ့ပါတယ်။
မြင်းခြံ အ-ထ-က ၄ မှ ဝင်ရောက်ဖြေဆိုသူ အမြွှာညီအမတွေ ဖြစ်တဲ့ မသန့်ထားထားဇော် (သင်္ချာ-ဓာတု-ရူပ-ဇီဝ)၊ သန့်ထက်ထက်ဇော် (မြန်မာစာ-ဓာတု-ရူပ-ဇီဝ ) နဲ့ သန့်ထူးထူးဇော် (သင်္ချာ-ဓာတု -ရူပ- ဇီဝ) တို့နဲ့ အောင်မြင်ခဲ့ကြတာလည်း ဖြစ်ပါတယ်။
သတင်း ရီရီထွန်း (မြင်းခြံ )
