ထောက်ကြန့်နဲ့ ထန်းတပင်မြို့နယ်တို့မှာ နိုင်ငံခြားဖြစ် အရက်တုမျိုးစုံ အတုပြုလုပ်ကာ သိုလှောင်ရောင်းချသူတွေကို ဖမ်းဆီးရမိခဲ့ပြီး သက်ဆိုင်ရာရဲစခန်းတွေမှာ အမှုဖွင့်အရေးယူထားတယ်လို့ ရဲတပ်ဖွဲ့က သတင်းထုတ်ပြန်ပါတယ်။
မြောက်ပိုင်းခရိုင်ရဲတပ်ဖွဲ့မှူးရုံး၊ မှုခင်းနှိမ်နင်းရေးဌာနစုမှ တပ်ဖွဲ့ဝင်တွေဟာ ဇွန် ၁ ရက်နေ့ နေ့လယ်ပိုင်းက ထန်းတပင်မြို့နယ်၊ ပေါက်တန်းကျေးရွာကွက်သစ်က အောင်စိုးနဲ့ မျိုးတင့်တို့ရဲ့နေအိမ်ကို သတင်းအရ သက်သေတွေနဲ့အတူ သွားရောက်ရှာဖွေခဲ့ရာ Giang Master တံဆိပ်အရက် ၄ ဖာ၊ Black Label အရက် ၂ ဖာ၊ Ballantines တံဆိပ် အရက် ၁ ဖာ၊ Red Label တံဆပ်အရက် ၂ ဖာ၊ kingdon တံဆိပ် အရက် ၆ ဖာ၊ ပုလင်းခွံနဲ့ ပုလင်းအဖုံးခွံတွေ၊ အရက်ရောစပ်ရာမှာ အသုံးပြုတဲ့ ပစ္စည်းတွေကို ရှာဖွေတွေ့ရှိသိမ်းဆည်းရမိခဲ့ပါတယ်။
အလားတူ ညနေ ၄ နာရီခွဲအချိန်မှာလည်း မြောက်ပိုင်းခရိုင်ရဲတပ်ဖွဲ့မှူးရုံးမှ တပ်ဖွဲ့ဝင်တွေဟာ မင်္ဂလာဒုံမြို့နယ်၊ ထောက်ကြန့်၊ မြသီတာရပ်ကွက်ရှိ မျိုးမြင့်ခိုင်(ခ)ကိုမျိုးရဲ့ နေအိမ်ကို သတင်းအရ ရှာဖွေခဲ့ရာ မြေအောက်ခန်းနဲ့ ဂိုဒေါင် အတွင်းခန်းတို့မှ kingdon တံဆိပ်အရက် ၉ ဖာနဲ့ ပုလင်းခွံ အလုံး ၂၀၊ Giang Master တံဆိပ်အရက် ၂ ဖာ၊ Donfife တံဆိပ် အရက် ၄ ဖာနဲ့ ပုလင်းခွံအလုံး ၃၀၊ Red Label တံဆိပ်အရက် ၃ ဖာ၊ B&G တံဆိပ်အရက် ၂ ဖာ၊ Sired Wards တံဆိပ်အရက် ၁ ဖာ၊ ပုလင်းအဖုံးခွံတွေ၊ အရက်ရောစပ်ရာမှာ အသုံးပြုတဲ့ ပစ္စည်းတွေ သိမ်းဆည်းရမိခဲ့တယ်လို့ ဆိုပါတယ်။
မျိုးမြင့်ခိုင်(ခ)ကိုမျိုး၊ အောင်စိုး၊ မျိုးတင့်တို့ကို မင်္ဂလာဒုံမြို့နယ်၊ ထောက်ကြန့်နယ်မြေ ရဲစခန်းက ရာဇသတ်ကြီးပုဒ်မ ၄၂၀/၄၈၆ နဲ့ အသီးသီးအမှုဖွင့်ထားတယ်လို့ သိရပါတယ်။
