ချင်းပြည်နယ်မြို့တော် ဟားခါးဈေးသစ်ရပ်ကွက်ထဲမှာ ဒီကနေ့မနက် ၂ နာရီလောက်က မီးလောင်မှုဖြစ်ပွားပြီး အမျိုးသမီးကြီး ၃ ဦး သေဆုံးကာ ၁ ဦး ဒဏ်ရာရခဲ့ပါတယ်။
ဈေးသစ်ရပ်ကွက်နေ ဒေါ်ဝေကျန်းဆိုသူရဲ့နေအိမ်ကနေစပြီး ဒီကနေ့ မနက် ၁ နာရီ ၄၅ မိနစ်က မီးလောင်ကျွမ်းကာ မီးသတ်ကား ၇ စင်းနဲ့ သွားရောက်ငြှိမ်းသတ်ခဲ့ပေမယ့် ပုလဲစတိုး ဆိုင်အပြင်ဘေးက နေအိမ် ၁ လုံးပါ ကူးစက်လောင်ကျွမ်းသွားသလို အမျိုးသမီးကြီး ၃ ဦး သေဆုံးကာ ၁ ဦးမှာ ဆေးရုံမှာ တက်ရောက်ကုသနေတယ်လို့ ဟားခါးမြို့နယ် မီးသတ်တပ်ဖွဲ့မှ တပ်ကြပ်ကြီး မိုဇာလျန်းက ဒီဗွီဘီကို ပြောပါတယ်။
“မီးစလောင်တာကတော့ ဒေါ်ဝေကျန်းတို့အိမ် မီးဖိုကနေ မီးကြွင်းမီးကျန်ကနေ စတာလို့ သိရပါတယ်။ စလောင်တာ ဒီမနက် ၁ နာရီ ၄၅ မိနစ်။ ကျနော်တို့ ဟားခါး မီးသတ်ဌာနကနေ ရေသည်ယာဉ် ၄ စီး၊ မီးသတ်ကား ၃ စီး စုစုပေါင်း ၇ စီးနဲ့ သွားငြိမ်းသတ်ပါတယ်ခင်ဗျ။ မီးရှိန်ကပြင်းတော့ မနက် ၂ နာရီ ၄၀ မိနစ်ကျမှ မီးညွန့်ကျိုးသွားတယ်။ ဒါပေမယ့် အိမ်ရှင် ဒေါ်ဝေကျန်း အသက် ၉၀ နှစ် နဲ့ နောက်ထပ် အမျိုးသမီး ၂ ယောက် အသက် ၈၂ နှစ် နဲ့ ၄၅ နှစ် ဆုံးသွားပြီး နောက်ထပ် အသက် ၄၅ နှစ်လောက်ရှိတဲ့ အမျိုးသမီးတယောက်တော့ ဆေးရုံ ပို့ထားပါတယ်။ သူကတော့ ဒဏ်ရာမစိုးရိမ်ရပါဘူး။”
မီးလောင်မှုကြောင့် ပျဉ်ခင်းပျဉ်ကာ သွပ်မိုး ၂ နှစ်အိမ် ၂ လုံးနဲ့ အောက်ထပ်ကတိုက် အပေါ် ၂ ထပ်က ပျဉ်ခင်းပျဉ်ကာ၊ သွပ်မိုး ၃ ထပ် ပုလဲစတိုး ကုန်စုံဆိုင် မီးလောင်ခဲ့ကြောင်း၊ ဆိုင်ခန်းထဲက ပစ္စည်းတွေ အကုန်မီးထဲပါသွားပြီး ဆိုင်ပိုင်ရှင်အဒေါ်ကြီးပါ မီးထဲပါသွားတာလို့ ဆိုပါတယ်။
မီးလောင်မှုကြောင့် ဆုံးရှုံးမှုတန်ဖိုးမှာ စုစုပေါင်း ကျပ် ၂၈၇ သိန်းနဲ့ ၇ သောင်းလို့ ဟားခါးမီးသတ်ဌာနက ခန့်မှန်းထားပါတယ်။
ဓာတ်ပုံ - The Chinland Post
