ဂျပန်နိုင်ငံမြောက်ပိုင်းမှာ ဧပြီ ၂၂ ရက်က တောမီးလောင်ကျွမ်းမှုကြောင့် အီဝါ့တေခရိုင် အိုဆူချီမြို့ရှိ ဒေသခံ အိမ်ထောင်စုပေါင်း ၇၀၀ က လူပေါင်း ၁,၈၀၀ ကျော်ကို သူတို့အိမ်တွေကနေ အရေးပေါ် ပြောင်းရွှေ့ဖို့ အမိန့်ပေးထားတယ်လို့ ဂျပန်အစိုးရ အတွင်းရေးမှူးချုပ် မီနိုရု ကီဟာရာက ဧပြီ ၂၃ ရက်မှာ ပြောပါတယ်။

သစ်တောဧရိယာ ဟက်တာ ၁၅၀ ကျော် မီးလောင်ပျက်စီးသွားကာ အဆောက်အအုံ ၇ လုံးလည်း ထိခိုက်ပျက်စီးခဲ့တယ်လို့ ဆိုပါတယ်။

မီနိုရု ကီဟာရာက “အီဝါ့တေခရိုင် အိုဆူချီက တောမီးနဲ့ပတ်သက်ပြီး ဒီနေ့မနက် ၃ နာရီအထိ သိရသလောက်က ကိုဇူချီဘက်မှာ ဟက်တာ ၁၅ ဟက်တာလောက်၊ ကီရီကီရီဘက်မှာ ဟက်တာ ၁၄၀ လောက် ပျက်စီးသွားပါပြီ။ ကီရီကီရီမှာ နေအိမ်တလုံး အပါအဝင် အဆောက်အအုံ ၇ လုံး မီးလောင်ခဲ့ပေမဲ့ ထိခိုက်သေဆုံးသူ  မရှိပါဘူး” လို့ ပြောပါတယ်။

ဒါ့အပြင် “ကီရီကီရီဒေသမှာ အိမ်ထောင်စု ၇၀၀ ထဲက လူ ၁,၈၈၄ ယောက်ကို မီးလောင်မှုကြောင့် ပြောင်းရွှေ့ဖို့ အမိန့်ပေးထားပြီး ဒေသခံတွေ ရင်ဆိုင်နေရတဲ့ စိုးရိမ်ပူပန်မှုတွေကိုလည်း နားလည်ပြီးတော့ စိတ်မကောင်းဖြစ်ပါတယ်” လို့လည်း ဆိုပါတယ်။

မနှစ်ကလည်း အီဝါ့တေ ဒေသမှာ ဖြစ်ပွားခဲ့တဲ့ နှစ်ပေါင်းများစွာအတွင်း အကြီးဆုံး တောမီးလောင်မှုကြောင့် သစ်တောဟက်တာ ၃,၀၀၀ နီးပါး လောင်ကျွမ်းကာ လူ ၄,၀၀၀ ကျော်ကို ပြောင်းရွှေ့ခဲ့ရသလို မတော်တဆ မီးစတင်စေခဲ့တယ်လို့ ယူဆရတဲ့ လူတယောက်လည်း သေဆုံးခဲ့ပါတယ်။ ဒီနှစ်တော့ သေဆုံးသူ မရှိသေးဘူးလို့ အာဏာပိုင်တွေက ပြောပါတယ်။

Source: Reuters