၂၀၂၀ ပြည့်နှစ် အထွေထွေရွေးကောက်ပွဲမှာ အနိုင်ရချင်ရင် အရည်အချင်းရှိတဲ့ လူငယ်တွေကို ရွေးချယ်ဖို့ လိုတယ်လို့ ကြံ့ခိုင်ရေးပါတီရဲ့ နေပြည်တော်ပြည်ထောင်စုနယ်မြေ ဥက္ကဋ္ဌက ပြောကြားလိုက်ပါတယ်။
မေလ ၁၀ ရက်က နေပြည်တော်၊ ဇမ္ဗူသီရိမြို့နယ်ရုံးမှာပြုလုပ်တဲ့ ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီရဲ့ လူငယ်ညီလာခံအကြို လူငယ်နှီးနှောဖလှယ်ပွဲမှာ နေပြည်တော် ပြည်ထောင်စုနယ်မြေ ဥက္ကဋ္ဌ ပါတီဗဟိုအလုပ်အမှုဆောင် ဦးဝေလွင်က ပြောတာပါ။
“နိုင်ငံကို အရည်အချင်းနဲ့ အတွေ့အကြုံရှိသူတွေ ဦးဆောင်မှတိုးတက်မှာဖြစ်တယ်၊ လက်ရှိနိုင်ငံမှာ အဘက်ဘက်ကနိမ့်ကျနေတယ်။ နောင်အနာဂတ်မှာ လူငယ်တွေကို တာဝန်လွှဲပေးနိုင်ဖို့ လူငယ်ညီလာခံ ပြုလုပ်တာ ဖြစ်ပေမယ့် လူငယ်တွေကို ပြုစုပျိုးထောင်တာဟာ ရွေးကောက်ပွဲအောင်နိုင်ရေး တခုထဲအတွက် မဟုတ်ဘဲ နိုင်ငံကို ဦးဆောင်တဲ့ အချိန်မှာ အရည်အချင်းရှိတဲ့လူငယ်တွေကို တာဝန်ပေးနိုင်ဖို့ အတွက်ဖြစ်တယ်”
၂၀၁၅ အထွေထွေရွေးကောက်ပွဲမှာ ကြံ့ခိုင်ရေးပါတီ ရှုံးနိမ့်ခဲ့ရတာဟာ လာမယ့် ၂၀၂၀ ရွေးကောက်ပွဲမှာ အနိုင်ရဖို့ အခြေခံပဲဖြစ်တယ်လို့လည်း ကာကွယ်ရေးဝန်ကြီး ဟောင်းလည်းဖြစ်တဲ့ ဦးဝေလွင်က ပြောပါတယ်။
