ဧရာဝတီမြစ်ရေဟာ မေ ၆ ရက် ညနေ ၃ နာရီခွဲ တိုင်းထွာချက်အရ မြစ်ကြီးနားမြို့မှာ ၃၉၅ စင်တီမီတာ ရောက်ရှိခဲ့ပြီး တရက်အတွင်း ၆ ပေလောက် မြင့်တက်ခဲ့ပါတယ်။
ဧရာဝတီမြစ်အထက်ပိုင်းမှာ မြင့်တက်ခဲ့တဲ့ မြစ်ရေတွေဟာ နောက်တရက်ကနေ သုံးရက်အတွင်း ဗန်းမော်မြို့၊ ရွှေကူမြို့နဲ့ ကသာမြို့တွေမှာ ၄ ပေကနေ ၅ ပေ၊ နောက် ၃ ရက်ကနေ ၇ ရက်အတွင်း သပိတ်ကျင်းမြို့၊ မန္တလေးမြို့၊ စစ်ကိုင်းမြို့၊ မြင်းမူမြို့၊ ပခုက္ကူမြို့နဲ့ ညောင်ဦးမြို့တွေမှာ ၂ ပေခွဲကနေ ၃ ပေခွဲ၊ နောက် ၆ ရက်ကနေ ၁၂ ရက်အတွင်း ချောက်မြို့၊ မင်းဘူးမြို့၊ မကွေးမြို့၊ အောင်လံမြို့၊ ပြည်မြို့၊ ဆိပ်သာမြို့၊ ဟင်္သာတမြို့နဲ့ ဇလွန်မြို့တွေမှာ ၁ ပေခွဲကနေ ၂ ပေခွဲအထိ လက်ရှိရေမှတ်တွေအထက် မြင့်တက်လာနိုင်တယ်လို့ မိုးဇလက ထုတ်ပြန်ထားပါတယ်။
မြစ်ရေ ရုတ်တရက်တိုးလာနိုင်တဲ့အတွက် မြစ်ကြောင်းအတွင်း သွားလာနေကြတဲ့ ရေယာဉ်၊ လှေ၊ သင်္ဘောတွေအနေနဲ့ ဂရုပြုသင့်ပြီး မြစ်ရေနည်းချိန် သဲသောင်ခုံတွေမှာ စိုက်ပျိုး နေထိုင်ကြသူတွေအနေနဲ့လည်း ဂရုပြုနေထိုင်သင့်တယ်လို့ မိုးဇလက အကြံပြုထားပါတယ်။
