ကယားပြည်နယ်က တောင်သူလယ်သမားတွေက စရဖတပ်မှူး(ငြိမ်း) ဦးထွန်းရွှေနဲ့ ဒေသကွပ်ကဲမှု ဌာနချုပ်(ဒကစ)က သိမ်းဆည်းထားတဲ့ မြေယာတွေကို ပြန်လည်ရရှိဖို့ ဒီနေ့ လွိုင်ကော်မြို့မှာ ဆန္ဒပြခဲ့ကြပါတယ်။
၂၀၀၇နဲ့ ၂၀၀၈ ခုနှစ်တွေမှာ တောင်သူ ၈၅ ဦး ပိုင်ဆိုင်တဲ့ လွိုင်ကော်မြို့နယ် မထောခူကျေးရွာအုပ်စုက မြေဧက ၃၅၂ ကို ဒေသကွပ်ကဲမှု ဌာနချုပ်(ဒကစ)က သိမ်းယူခဲ့တာ ဖြစ်ပါတယ်။
ဒကစက သိမ်းယူခဲ့တဲ့ မြေဧကတွေထဲက ဧက ၁၀၀ ကျော်ကို စရဖတပ်မှူး(ငြိမ်း) ဦးထွန်းရွှေကို ပြန်လည်ရောင်းချပေးပြီး မြေစာရင်းက ပုံစံ ၇ ထုတ်ပေးခဲ့တာကြောင့် မူရင်း ဒေသခံ တောင်သူတွေ မကျေနပ်လို့ စုပေါင်းပြီး ဆန္ဒပြရတာလို့ တောင်သူတွေက ပြောပါတယ်။
မြေသိမ်းဆည်းခံထားရလို့ ဆန္ဒပြတဲ့ တောင်သူ ဦးဆိုတေးရိုက "ပြန်ပေးဖို့်ပေါ့ဗျာ။ မြေသိမ်းတဲ့အတွက်ကြောင့် လုပ်ကိုင်စားသောက်ဖို့ လယ်ယာမြေတွေ မရှိတော့ဘူး။ အဲဒါနဲ့ ကျနော်တို့ ငတ်ပြတ်နေကြတာပေါ့။ သူတို့တပ်တွေက ကျနော်တို့ကို အူခွဲ ဗိုက်ဖောက်တဲ့ သဘောမျိုး ဖြစ်သွားတယ်။ အဲဒါကြောင့် ကျနော်တို့ မခံမရပ်နိုင်လို့ ဒီကနေ့ ဆန္ဒပြရခြင်း ဖြစ်ပါတယ်" လို့ ပြောပါတယ်။
ဆန္ဒပြတောင်သူ ၄၀၀ လောက်က တောင်ကွဲစေတီတော်ရှေ့က စတင်ပြီး ဒကစတပ် သိမ်းဆည်းမြေများ ပြန်လည်ရရှိရေး၊ အကျင့်ပျက် ခြစား မြေစာရင်းများ အလိုမရှိ၊ တာဝန်ယူမှု တာဝန်ခံမှုမရှိသော ပုဂ္ဂိုလ်များ နုတ်ထွက်ပေးရေးစတဲ့ ကြွေးကြော်သံတွေနဲ့ လွိုင်ကော်မြို့လယ်၊ မြို့နယ်တရားရုံးရှေ့၊ လွိုင်ကော်မြို့နယ် လယ်ယာမြေစီမံခန့်ခွဲရေးနဲ့ စာရင်းအင်းဦးစီးဌာနနဲ့ တခြားအစိုးရ ဌာနရုံးရှေ့တွေမှာ စီတန်းလှည့်လည် ဆန္ဒပြခဲ့ကြပါတယ်။
သတင်း၊ ဓာတ်ပုံ - ခွန်းတူးတူးလေး
