ဧပြီ ၈ရက်နေ့ တရက်တည်းမှာပဲ တနိုင်ငံလုံးမှာ မီးလောင်မှု ၆ ခု ဖြစ်ပွားခဲ့တယ်လို့ မြန်မာနိုင်ငံ မီးသတ်တပ်ဖွဲ့က ထုတ်ပြန်ပါတယ်။

မနေ့ မနက် အစောပိုင်း ၁၂ နာရီကျော်က နေပြည်တော်၊ ဒက္ခိဏသီရိမြို့နယ်၊ ကျေးစာဥရွာမှာ နေအိမ်မီးရှို့မှု ဖြစ်လို့ အိမ်တလုံးနဲ့ ဆိုင်ကယ်အဟောင်းတစီး ဆုံးရှုံးခဲ့ပါပါတယ်။

မွန်ပြည်နယ်၊ ကျိုက်မရောမြို့နယ်၊ ကျိုက်မရံကျေးရွာအရှေ့ပိုင်းမှာတော့ မနက် ၁ နာရီကျော်က လယ်ကွင်းမှာ ဆေးလိပ်တိုပစ်ခဲ့ရာက တဆင့် ကောက်ရိုးပုံတွေ မီးလောင်ခဲ့ပါတယ်။

ဒါ့အပြင် မနက် ၁၁ နာရီခွဲအချိန်မှာ ကျိုက်မရောမြို့နယ်၊ လွှစ်ကုန်းကျေးရွာအုပ်စုက ရော်ဘာခြံမှာ အမှိုက်ပုံတွေ မီးရှို့ရာက ရာဘာပင်တွေကို မီးလောင်လို့ အပင် ၂၂၀၀ ကျော် ဆုံးရှုံးခဲ့ပါတယ်။ ပဲခူးတိုင်း၊ ကဝမြို့၊ အမှတ် ၆ ရပ်ကွက်မှာ မနက် ၁၀ နာရီအချိန်မှာ နေအိမ်တလုံး မီးလောင်ခဲ့ပါတယ်။ ကချင်ပြည်နယ်၊ ဗန်းမော်မြို့နယ်၊ စီဟဲကျေးရွာမှာ ညနေ ၆ နာရီကျော်က မော်တော်ယာဉ် တစီးမီးလောင်ခဲ့ပါတယ်။
ကရင်ပြည်နယ်၊ ဘားအံမြို့နယ်၊ အိန္ဒုရွာ၊ မြို့တော်ဦးရပ်ကွက်မှာ  ည ၇ နာရီအချိန်မှာ တော့ ဖယောင်းတိုင်မီးပူဇော်ထားရာက မီးလောင်လို့ အင်ဖက်မိုး၊ အင်ဖက်ကာ၊ ဝါးကြမ်းခင်းနေအိမ် ၁ လုံး မီးလောင်ဆုံးရှုံးခဲ့တယ်လို့ ဆိုပါတယ်။

ဒါ့အပြင် မနေ့က ဖြစ်ခဲ့တဲ့ ကားတိုက်မှုတွေ၊ တိမ်းမှောက်မှုတွေနဲ့ ရေနစ်သေဆုံးမှုတွေ မှာလည်း တပ်ဖွဲ့ဝင်တွေ သွားရောက်ကူညီပေးခဲ့တယ်လို့ မီးသတ်တပ်ဖွဲ့က ထုတ်ပြန်ထား ပါတယ်။