ရှမ်းပြည်နယ်၊ ကျိုင်းတုံမြို့နယ်မှာ တရားမဝင် ဝင်ရောက်လာသူ တရုတ်နိုင်ငံသား ၂ ဦးကို ဖမ်းဆီးရမိခဲ့တယ်လို့ ပြည်ထဲရေးက သတင်းထုတ်ပြန်ပါတယ်။
မတ်လ ၁ ရက်နေ့ ညနေပိုင်းက ကျိုင်းတုံမြို့နယ်၊ ပါယုတ်ကျေးရွာနေ မနာတဲရဲ့ အိမ်မှာ တရုတ်နိုင်ငံသား ၂ ဦးအား တရားမဝင်ခေါ်ဆောင်ထားကြောင်း သတင်းအရ လူကုန်ကူးမှုတားဆီးနှိမ်နင်းရေးရဲတပ်ဖွဲ့ သွားရောက် ရှာဖွေရာ မနာတဲ၊ စောလမွန်နဲ့ တရုတ်နိုင်ငံသား Mr Kya Pha၊ Mr.Kya Lar တို့အား တွေ့ရှိလို့ ကျိုင်းတုံလဝကကို ခေါ်ယူစစ်ဆေးခဲ့ပါတယ်။
မနာတဲအား စစ်မေးရာ ၂၀၁၇ ဇန်နဝါရီလအတွင်းက ကျိုင်းတုံမြို့နယ် ပါယုတ်ကျေးရွာမှ ကျိုင်းတုံ-မိုင်းခတ်-မိုင်းဖျန်လမ်းအတိုင်း တရုတ်နိုင်ငံ ကျူးကော်မြို့ ဟူနန်းကျေးရွာမှာ တရားမဝင် သွားရောက် အလုပ်လုပ်ခဲ့ပြီး Mr.Kya Lar နဲ့ လက်ထပ်ပေါင်းသင်းဖို့အတွက် စောလမွန်နဲ့အတူ တရုတ်နိုင်ငံသား ၂ ဦးအား မနာတဲရဲ့ မိဘတွေရှိရာ ပါယုတ်ကျေးရွာကို ဆိုင်ကယ်နဲ့ ခေါ်ဆောင် လာခဲ့ကြောင်း ထွက်ဆိုခဲ့ပါတယ်။
သူတို့ ၄ ဦးကို ကျိုင်းတုံမြို့မရဲစခန်း (ပ)၅၆/၂၀၁၈ လဝကအက် ၁၃(၁)/၁၃(၅) နဲ့ အမှုဖွင့်စစ်ဆေးနေကြောင်း သိရပါတယ်။
