အိမ်အကူအမျိူးသမီးကို အက်ဆစ်နဲ့ ပက်ပြီး နှစ်အတော်ကြာ ပိတ်လှောင်ထားတဲ့ မန္တလေးမြို့ ချမ်းမြသာစည်မြို့နယ်က အိမ်ရှင် ၂ ဦးကို လူကုန်ကူးမှု တားဆီးနှိမ်နင်းရေး ဥပဒေပုဒ်မနဲ့ အမှုဖွင့်အရေးယူထားပါတယ်။
ဖြစ်စဉ်မှာ အသက် ၂၅ နှစ်အရွယ် အိမ်အကူအမျိုးသမီးဟာ ချမ်းမြသာစည်မြို့နယ် ကန်သာယာရပ်ကွက်နေ ဒေါ်မိုးမိုးပိုင်ဆိုင်တဲ့ ကုန်စုံဆိုင်မှာ ၁ လ ၁ သောင်းကျပ် နဲ့ ၂၀၀၈ ခုနှစ်ကစပြီး စတင်အလုပ်လုပ်ကိုင်ခဲ့ပါတယ်။
၂၀၀၉ သင်္ကြန်အကြိုနေ့မှာ ဒေါ်မိုးမိုးချွေးမဖြစ်သူ မနီနီနုနွယ်ဟာ သူငယ်ချင်းတွေနဲ့ လည်ပတ်ခဲ့ပါတယ်။ အဲဒီထဲက အမျိုးသားတဦးက အိမ်အကူ မိန်းကလေးကို ချစ်ကြိုက်တယ်လို့ ပြောဆိုရာမှတဆင့် မနီနီနုနွယ်က ရိုင်းပျစွာဆက်ဆံလာခဲ့ကြောင်း အမျိုးသမီးရေးရာအဖွဲ့ရဲ့ တိုင်တန်းချက်မှာ ဖော်ပြထားပါတယ်။
၂၀၁၀ သင်္ကြန်နှစ်ဆန်း ၁ ရက်မှာ အိမ်အကူ မိန်းကလေး ရေချိုးနေတုန်း မနီနီနုနွယ်က အက်ဆစ်နဲ့ လောင်းခဲ့တာကြောင့် မျက်နှာဘယ်ဘက်ခြမ်း ပျက်စီးပြီး ဘယ်ဘက်မျက်လုံး ကွယ်ခဲ့တယ်လို့ ဆိုပါတယ်။
အဲဒီနောက်မှာ အိမ်အကူအမျိုးသမီးကို တိုက်အတွင်း ၄ နှစ်လောက် ပိတ်လှောင်ခဲ့ပြီး အိမ်အလုပ်တွေ လုပ်ကိုင်ခိုင်းခဲ့ပါတယ်။ ပြီးခဲ့တဲ့ ဖေဖော်ဝါရီနောက်ဆုံးပတ်မှာတော့ အိမ်အကူအမျိူးသမီးဟာ ထွက်ပြေးလာပြီး အမျိုးသမီးရေးရာအဖွဲ့နဲ့ တွေ့ဆုံခဲ့ပြီးနောက် လူကုန်ကူးမှု တားဆီးနှိမ်နင်ရေးရဲတပ်ဖွဲ့ကို အကြောင်းကြား တိုင်တန်းခဲ့တာပါ။
အမှတ် ၁၁ လူကုန်ကူးမှုတားဆီးရေးရဲတပ်ဖွဲ့မှူး ရဲမှူးမျိုးဇင်က “ဖြစ်စဉ်က လွန်ခဲ့တဲ့ ၁၀ ရက်လောက်ကပေါ့။ ညနေပိုင်းမှာ မန္တလေးတိုင်းဒေသကြီး အမျိုးသမီးရေးရာအတွင်းရေးမှူး ဒေါ်သန္တာဖုန်းကနေ ဖုန်းလှမ်းဆက်တယ်။ မြို့သစ်ကကောင်မလေးတယောက် ဒီလိုပဲ အက်ဆစ်နဲ့အပက်ခံတယ်လို့ အိမ်ကထွက်ပြေးပြီး သူတို့ဆီ ရောက်နေတယ်။ အိမ်ရှင်က လိုက်ရှာနေတယ်ဆိုတော့ သူ့ရဲ့လုံခြုံမှုအတွက် ကျနော်တို့ကိုလှမ်းခေါ်လို့ ကျနော်တို့ သွားကြတယ်။ ဟိုရောက်တဲ့အချိန်မှာ ဒီကလေးမလေးက စကားမပြောနိုင်ဘူး။ မပြောနိုင်တဲ့အတွက် အကြမ်းဖျင်းလောက်ပဲ ကျနော်တို့သိရတယ်။ သူ့မှာတော့ ဒီဒဏ်ရာတွေက ဘယ်ဘက်မျက်လုံး ပျက်နေတာတွေ့ရတယ်။ ဘယ်ဘက်တခြမ်းလုံးကတော့ မီးလောင်ဒဏ်ရာလို ဒဏ်ရာမျိုးတွေတွေ့ရတယ်။ တခြားနေရာမှာ သွားတွေ့ရတယ်။ ဒီကလေးမလေးကို ခုချိန်ထိ လုံခြုံတဲ့နေရာမှာ ကျနော်တို့ ထိန်းသိမ်းထားတယ်” လို့ ပြောပါတယ်။
အိမ်ရှင်အမျိုးသမီး ဒေါ်မိုးမိုးနဲ့ ချွေးမဖြစ်သူ နီနီနုနွယ်တို့ကို အောင်ပင်လယ်နယ် မြေရဲတပ်ဖွဲ့စခန်း မှာ လူကုန်ကူးမှု တားဆီးနှိမ်နင်းရေး ဥပဒေပုဒ်မ ၂၄/၃၂ အရ မတ် ၁ ရက်က အမှုဖွင့် စစ်ဆေးမှုတွေ လုပ်ခဲ့တယ်လို့ ဆိုပါတယ်။
