တယ်လီဖုန်းဘီလ်က ကောက်ခံရရှိတဲ့ အခွန်ဟာ မနှစ်က ၆ လပတ်ထက် ကျပ်သန်းပေါင်း တသောင်းခွဲလောက် ပိုရထားတယ်လို့ စီမံကိန်းနဲ့ ဘဏ္ဍာရေး ဒုဝန်ကြီး ဦးမောင်မောင်ဝင်းက ပြောပါတယ်။
မနေ့က လွှတ်တော် အစည်းအဝေးမှာ ၂၀၁၇-၁၈ ဘဏ္ဍာရေးနှစ်ရဲ့ အခွန်ကောက်ခံရရှိတဲ့ အခြေအနေကို ရှင်းပြရာမှာ ထည့်သွင်းပြောဆိုခဲ့တာပါ။
တယ်လီဖုန်းဘီလ်ကနေ ဖြတ်တောက်ရရှိတဲ့ ကုန်သွယ်လုပ်ငန်းခွန်ဟာ ၄၉ ဒသမ ၅၉၃ ဘီလီယံ (ကျပ်သန်းပေါင်း ၅ သောင်းလောက်) ရရှိခဲ့တယ်လို့ ဆိုပါတယ်။
ဒါဟာ အရင်နှစ် ပထမ ၆ လပတ်နဲ့ နှိုင်းယှဉ်မယ်ဆိုရင် ၁၅ ဘီလီယံကျော် (ကျပ်သန်းပေါင်း တသောင်းခွဲကျော်) ပိုရတာ လို့လည်း ဝန်ကြီးက ပြောပါတယ်။
တယ်လီဖုန်းဘီလ်ကနေ ဖြတ်တောက်ရရှိတဲ့ အခွန်ဟာ တလကို ကျပ်သန်း ၉ ထောင် လောက်အထိ အများဆုံးရပြီး ပျမ်းမျှ တလကို ကျပ်သန်း ၇ ထောင်လောက်ရနေတယ်လို့ ပြည်တွင်းအခွန်များ ဦးစီးဌာန ညွန်ကြားရေးမှူးချုပ် ဦးမင်းထွဋ်က ပြောဆိုထားပါတယ်။
ဖုန်းဘီလ်ခွန်ကို ပြီးခဲ့တဲ့နှစ် ဧပြီလက စတင်ကောက်ခံခဲ့တာဖြစ်ပြီး ကုန်သွယ်လုပ်ငန်းခွန် အဖြစ် ၅ ရာခိုင်နှုန်း ကောက်ခံနေတာပါ။
အခွန်တွေစကောက်တဲ့ ပထမဆုံးလမှာရတဲ့အခွန်တွေကို ပညာရေးကဏ္ဍအတွက် သုံးစွဲခဲ့ပြီး နောက်ပိုင်းမှာတော့ ရတဲ့ အခွန်အားလုံးကို ပြည်ထောင်စုဘဏ္ဍာရန်ပုံငွေထဲကို ပေးနေတာ ဖြစ်ပါတယ်။
ဝန်ကြီးဌာနအလိုက် ကောက်ခံနေတဲ့ အခွန် ၂၁ မျိုးမှာ ၁၅ မျိုးက လျာထားချက်ထက် ပိုပြီး ကောက်ခံရရှိခဲ့တယ်လို့ ဝန်ကြီးက ပြောပါတယ်။
