နိုင်ငံတော်ဖွံ့ဖြိုးတိုးတက်ရေး၊ ဒေသ ဖွံ့ဖြိုးတိုးတက်ရေးများကို ပိုမို ထိရောက်စွာ ပြုပြင် ပြောင်းလဲကြိုးပမ်းဆောင်ရွက်ရေးဆိုင်ရာ လုပ်ငန်းညှိနှိုင်းအစည်းအဝေးကို ပြီးခဲ့တဲ့ မေ ၁၁ ရက်နေ့က နေပြည်တော်မှာကျင်းပခဲ့ပြီး၊ နိုင်ငံတော် သမ္မတ ဦးသိန်းစိန် တက်ရောက် အမှာစကားပြောကြားခဲ့ပါတယ်။
[caption id="attachment_25344" align="alignleft" width="300" caption="ကိုအောင်သူငြိမ်း"]
[/caption]
အစည်းအဝေးကို ဒုတိယ သမ္မတ ဒေါက်တာစိုင်းမောက်ခမ်းနဲ့ ပြည်ထောင်စု ဝန်ကြီးတွေ၊ တိုင်းဒေသကြီး၊ ပြည်နယ် အစိုးရဝန်ကြီးချုပ်တွေ၊ ကိုယ်ပိုင်အုပ်ချုပ်ခွင့်ရ တိုင်းနှင့် ဒေသ ဥက္ကဋ္ဌတွေ တက်ရောက်ခဲ့ကြပါတယ်။
သမ္မတက ကျနော်တို့ အစိုးရရဲ့ နိုင်ငံတော် ဖွံ့ဖြိုးတိုးတက်မှုအတွက် ပြုပြင်ပြောင်းလဲရေး မဟာဗျူဟာ ပထမအဆင့် (First Stage of Reform Strategy for National Development)ကို အတိုင်းအတာ တခုအထိ ဆောင်ရွက်ခဲ့ကြပြီး ဖြစ်ပါတယ်။ ယခု ပြုပြင်ပြောင်းလဲရေး မဟာဗျူဟာ ဒုတိယအဆင့် (Second Stage of Reform Strategy for National Development) ကို တဆင့်တက်ပြီး ဆောင်ရွက်ရမှာ ဖြစ်တဲ့အကြောင်း၊ ပြီးခဲ့တဲ့ ကြားဖြတ်ရွေးကောက်ပွဲ အတွေ့အကြုံအရ ဒီနေ့ ပြည်သူတွေရဲ့ ဆန္ဒက အပြောင်းအလဲကို လိုချင်ပြီး ကျွန်တော်တို့ အစိုးရရဲ့ အောက်ခြေ ရပ်ကွက် ကျေးရွာအဆင့်မှ မြို့နယ်၊ တိုင်းဒေသကြီး/ ပြည်နယ်မှ ပြည်ထောင်စု အဆင့်အထိ ရှေးယခင် လုပ်နည်းလုပ်ဟန်တွေအတိုင်း လုပ်ကိုင်ဆောင်ရွက်နေကြတာကို မကြိုက်တော့ဘူးဆိုတဲ့ အနေအထားကို ပြသခဲ့ခြင်း ဖြစ်ပါတယ်လို့ အစချီပြီး ပြောင်းလဲရမယ့်ကိစ္စရပ်တွေ တော်တော်များများ ပြောကြားသွားခဲ့ပါတယ်။
သမ္မတရဲ့ ပြောကြားချက်ထဲက အချက်တချို့နဲ့ ပတ်သက်ပြီး ထိုင်းနိုင်ငံအခြေစိုက် ဗဟုဖွံ့ဖြိုးရေးအဖွဲ့က သုတေသီ ကိုအောင်သူငြိမ်းကို ဆက်သွယ်မေးမြန်းထားပါတယ်။
နိုင်ငံတော်သမ္မတကနေပြီးတော့ ဒေသဖွံ့ဖြိုးရေး၊ နိုင်ငံတော်ဖွံ့ဖြိုးရေး ဆိုပြီးတော့ စကားပြောသွားတာ တွေ့ရပါတယ်။ ဒီမိန့်ခွန်းတခုလုံးကို အပိုင်းလိုက် မမေးခင်မှာ ကိုအောင်သူငြိမ်းအနေနဲ့ မိန့်ခွန်းတစုံလုံးပေါ်မှာ ခြုံပြီးတော့ တချက်လောက် သုံးသပ်ပေးပါလား။
“ကျနော့်အမြင်ကတော့ ပြီးခဲ့တဲ့ ကာလတွေမှာ သမ္မတအနေနဲ့ ပြုပြင်ပြောင်းလဲရေးတွေ စလာတဲ့ပုံက တဖြည်းဖြည်းနဲ့ စမ်းသပ်ပြီးတော့ လုပ်လာတဲ့ ပုံစံမျိုးနဲ့ တူပါတယ်။ အခုအနေအထားမှာတော့ ပိုပြီးတော့ ယုံကြည်မှုလည်း ရှိလာတယ်။ နောက်တခုက အခုအချိန်မှာတော့ ဒုတိယတဆင့်ပေါ့ဗျာ။ ပြုပြင်ပြောင်းလဲရေးတွေ အရှိန်မြှင့်မယ်ဆိုတဲ့ သဘောမျိုးလည်း ရတယ်လို့ ထင်ပါတယ်။”
နောက်တပိုင်းက သမ္မတဖြစ်လာပြီးတော့လည်း သူပြောခဲ့တယ်။ အခုတခါမှာလည်း ထပ်ပါ ပါတယ်။ လာဘ်ပေးလာဘ်ယူကိစ္စကို ရှောင်ရှားကြဖို့၊ မလုပ်ကြဖို့ ပြောပါတယ်။ ဒါပေမယ့် ဒီ လာဘ်ပေးလာဘ်ယူနဲ့ပတ်သက်လို့ တနှစ်ကျော် ကြာလာတဲ့ သက်တမ်းကာလမှာ ဘယ်လိုအရေးယူလိုက်တယ်၊ နှိမ်နင်းလိုက်တယ်၊ ဘယ်လို နှိမ်နင်းလိုက်မှရတော့မယ် ဆိုတာမျိုး အခုထိ ပြောတာမတွေ့ရသေးပါဘူး။ အဲ့အပေါ်မှာရော ဘယ်လို သုံးသပ်ချင်ပါလဲဗျာ။
“ကျနော်မြင်တာကတော့ ပြီးခဲ့တဲ့ ကာလတွေမှာ သမ္မတအနေနဲ့ ကတိကဝတ်တွေ ပေးခဲ့တာ အများကြီးပါပဲ။ သန့်ရှင်းတဲ့ အစိုးရဖြစ်အောင်လုပ်မယ်။ ပိုပြီးတော့ ကောင်းမွန်တဲ့ အစိုးရစနစ်ဖြစ်အောင် လုပ်မယ်ဆိုတာမျိုးတွေ ပြောခဲ့တာ တွေ့ရပါတယ်။ ဒါပေမယ့် တကယ်လက်တွေ့ ဘာတွေအစီအစဉ်ချပြီး လုပ်မှာလဲ.။ ဘယ်လိုလုပ်မှာလဲပေါ့နော်။ နောက်တခုက အခုအချိန်ကာလမှာ အပြောင်းအလဲသဘောမျိုးသွားနေတော့ တချို့ဟာတွေက ဘယ်လိုခေါ်မလဲ လုပ်ဖို့ စိတ်ကူးတော့ ရှိတယ်။ တကယ့် လက်တွေ့မှာတော့ မလုပ်နိုင်သေးတာတွေ၊ အခက်အခဲရှိတာတွေ ဒါတွေ အများကြီးရှိတယ်လို့ ကျနော်ထင်ပါတယ်။ ရှေ့ဆက်မယ့် ကာလတွေမှာလည်း ဒီလိုအခက်အခဲတွေ၊ ကတိပေးပြီးမှ မဖြစ်လာတာမျိုးတွေ ရှိလိမ့်ဦးမယ်လို့ ကျနော်မြင်ပါတယ်။”
ဒီတခါ မိန့်ခွန်းထဲမှာဆိုရင်တော့ ပြည်ပမှာ အလုပ်မျိုးစုံလုပ်နေတဲ့ မြန်မာတွေပြန်လာကြဖို့ သူက ထပ်ပြီး ဖိတ်ခေါ်ပါတယ်။ ဖိတ်ကြားပါတယ်လို့ ထပ်ပြောတယ်ဗျ။ ပြန်လာဖို့ အခက်အခဲရှိရင်လည်း သူကူညီပါ့မယ်လို့ ပြောတယ်။ ပြန်လာပြီးရင်ရော ကျနော်တို့ ဘာတွေလုပ်ကြမလဲ။ အလုပ်အကိုင်အခွင့်အလမ်းတွေက ဘာတွေရှိလဲဆိုတာတော့ သူသေချာထည့်သွင်းမပြောသွားဘူး။ တခါတုန်းက သူတို့ ပြောဖူးသလိုဆိုရင်တော့ မြေလွတ်မြေလပ်တွေ အများကြီး ရှိတယ်။ လာစိုက်ကြပါဆိုတဲ့ ပုံစံမျိုးလောက်နဲ့တော့ မရလောက်ဘူးနဲ့တူတယ်။ အခုဖိတ်ခေါ်တဲ့အပေါ်ကိုရော ဘယ်လိုမြင်မိပါလဲဗျ။
“ဖိတ်ခေါ်တယ်ဆိုတာတော့ ကျနော်တို့ဘက်က ကြိုဆိုဖို့ကောင်းပါတယ်။ တကယ့်လက်တွေ့မှာကြတော့ ဖိတ်ခေါ်တဲ့လူတွေ ပြန်နိုင်ဖို့ လုပ်ငန်းပေါ့ဗျာ။ တကယ့် လက်တွေ့လုပ်ငန်းတွေက ဘာတွေရှိသလဲ။ နောက်တခုက လူတွေက ယေဘုယျပြောမယ်ဆိုရင်တော့ ရေကြည်ရာမြက်နုရာ ရှာတဲ့သဘောဆိုပေမယ့် တဖက်မှာလည်း ကိုယ့်အိမ်ကိုယ့်ရာကို ခင်တွယ်ပါတယ်။ အဲ့အနေအထားမှာတော့ ကျနော်တို့ ပြန်လာရင် ဘာလုပ်ကြမှာလဲ စသည်ဖြင့် အခြေအနေကောင်းတွေ အခွင့်အလမ်းကောင်းတွေက ဘာတွေရှိနေသလဲ။ လူရဲ့ သဘောက တွက်ကြမှာပဲဗျ။ အဲ့အနေအထားမှာတော့ ကိုယ့်ဘက်က ပိုပြီးပွင့်လင်းလာတယ်။ ပိုပြီး အခွင့်အလမ်းကောင်းတွေ များလာတယ်ဆိုရင်တော့ ကျနော်ထင်တယ်။ လူတွေက ပြန်ကြမှာပဲ။”
သူပြောတဲ့မိန့်ခွန်းမှာ လုံလောက်မှုရှိတယ်လို့မြင်ရလား၊ ဘယ်လိုမြင်ရလဲ။
“အခုအနေအထားနဲ့ကတော့ သမ္မတအနေနဲ့က မူဝါဒဆိုင်ရာ မိန့်ခွန်းပေါ့။ ဒီလိုသဘောမျိုး ရှိပါတယ်။ ဒါပေမယ့် လက်တွေ့မှာတော့ အောက်က သက်ဆိုင်ရာဝန်ကြီးဌာနတွေ သက်ဆိုင်ရာဌာန အသီးသီးပေါ့။ လုပ်ငန်းကိုင်ငန်းတွေ အများကြီးလုပ်ဖို့ လိုပါသေးတယ်။ နောက်တခုကျတော့လည်း စီးပွားရေးစနစ်ဆိုတာက အမိန့်ပေးပြီးတော့ အခုကောင်းစေဆိုပြီး လုပ်လို့မရပါဘူး။ တကယ်စီးပွားရေး ကောင်းမှပဲ လူတွေဘက်က စဉ်းစားကြမယ်လို့ ထင်ပါတယ်။”
နောက်တခုက သမ္မတ အခုတကြိမ်ပြောတဲ့ အစည်းအဝေးပွဲက အစပေါ့၊ အင်တာနက် စာမျက်နှာတွေပေါ်မှာ နိုင်ငံတော် သမ္မတရုံးရဲ့ ဖေ့ဘုတ်စာမျက်နှာဆိုပြီး တင်ထားပြီးတော့ ဓာတ်ပုံတွေကော၊ သတင်းတွေကော အချိန်နဲ့ တပြေးညီတင်ထားတာ တွေ့ရတယ်။ အဲဒါကြောင့်လည်း တော်တော်များများတော့ ဖတ်ရတယ်။ အဲဒီအပေါ်မှာကော ပြန်ကြားရေးအတွက် သမ္မတအဖွဲ့ရဲ့ ခြေလှမ်းသစ်တခုလို့ မြင်လို့ရမလား။
“ဒါကတော့ ပြောမယ်ဆိုရင် ပိုပြီးတော့ ပွင့်လင်းမြင်သာမှု ရှိအောင် လုပ်တယ်လို့ထင်ပါတယ်။ ဒါပေမယ့် တကယ့် တကယ် ဒီထက် ထပ်လုပ်ဖို့ လိုတာတော့ အများကြီးပေါ့။ ဆိုတာတော့ သူများနိုင်ငံမှာဆိုရင် ဒီသမ္မတရုံးက သတင်းစာရှင်းလင်းပွဲ ပုံမှန်လုပ်တာမျိုးတွေ၊ နောက်တခုက ပြင်ပမီဒီယာတွေနဲ့ ပုံမှန်ဆက်သွယ်တာ၊ နောက်တခုက ပြည်သူတွေက တိုင်ချင်တယ်၊ အကြံပေးချင်တယ်ဆိုရင်လည်း ပေးလို့ရတဲ့ အီးမေးလ်လိပ်စာတွေ စသည်ဖြင့် ဒါတွေက တဖြည်းဖြည်းနဲ့ ပွင့်လင်းမြင်သာမှုကို တိုးလုပ်သွားရင်တော့ ကောင်းတယ်လို့ထင်ပါတယ်။”
သမ္မတမိန့်ခွန်း ဒီနိုင်ငံတော် ဖွံ့ဖြိုးတိုးတက်ရေး အတွက်လို့ ဆိုပါတယ်။ အဲဒီမိန့်ခွန်းအတွက် ကိုအောင်သူငြိမ်း ဖြည့်စွက်ပြီးတော့ ဆွေးနွေးတင်ပြချင်တာလေး ရှိရင်လည်း ဖြည့်စွက်ဆွေးနွေး တင်ပြပေးပါ။
“ကျနော်မြင်တာတော့ ကျနော်တို့ မြန်မာပြည် ပြန်ခဲ့တဲ့အချိန်မှာလည်း ကျနော်တို့ တွေ့ခဲ့ရသလောက် ပြုပြင်ပြောင်းလဲရေးလုပ်ငန်းတွေမှာ သွားနေတယ်လို့ ထင်တယ်။ ဒါပေမယ့် အားလုံးပေါ်မှာ လွှမ်းခြုံတဲ့ အမြင်ခေါ်မလား။ အဲဒါတွေတော့ သေချာဆက်လုပ်ဖို့လိုဦးမယ်လို့ ကျနော်ထင်ပါတယ်။ နောက်တခုကတော့ ပြီးခဲ့တဲ့ ကာလတွေမှာ သမ္မတပြောထားတာ ရှိပါတယ်။ ဆင်းရဲမွဲတေမှု ပပျောက်ရေးပေါ့။ အဲဒီကိစ္စတွေနဲ့ အခုဖွံ့ဖြိုးရေးကိစ္စတွေက ဘယ်လိုဆက်စပ်သွားမလဲ။ နိုင်ငံတကာအကူအညီတွေ ဝင်လာရင်လည်း အခုလို အလဟဿ မဖြစ်ဘဲနဲ့ ဘယ်လိုထိရောက်အောင်လုပ်မလဲ၊ စသဖြင့် အခုလို ကိစ္စတွေကတော့ အများကြီးဆက်ပြီးတော့ စဉ်းစားကြဖို့ ဝိုင်းဝန်းဆောင်ရွက်ကြဖို့ လိုမယ်လို့ ထင်ပါတယ်။”
