ကျိုင်းတုံမြို့နယ်အတွင်း ယာဉ်တိုက်မှု ဖြစ်ပွားရာကနေ ထိုင်းနိုင်ငံသား တရားခံပြေးကို ဖမ်းဆီးရမိတယ်လို့ ပြည်ထဲရေးက သတင်းထုတ်ပြန်ပါတယ်။
ဇန်နဝါရီ ၂၂ ရက်နေ့ မနက် ၁၁ နာရီက ကျိုင်းတုံမြို့နယ်၊ ကျိုင်းတုံ-မိုင်းခတ်သွားကားလမ်း၊ နောင်ဖာတံတားအနီးမှာ ထိုင်းနိုင်ငံသား Mr.Park မောင်းနှင်ပြီး မနန်းဖောင်း လိုက်ပါလာတဲ့ SHN-1P/×××× MARK-X ယာဉ်ဟာ ရှေ့မှ ဆိုင်ကယ် ၂ စီးကို ဝင်တိုက်မိခဲ့တယ်လို့ သတင်းမှာ ဖော်ပြပါတယ်။
ဆိုင်ကယ်တွေနဲ့ စီးနင်းလိုက်ပါလာတဲ့ မနန်းမွေအောင်၊ ဦးအိုက်ရီ၊ ဒေါ်အီဝမ်းတို့ ၃ ဦးတို့ ပွန်းပဲ့ ပေါက်ပြဲ ဒဏ်ရာတွေ (မစိုးရိမ်ရ) ရရှိခဲ့ပြီး ကျိုင်းတုံပြည်သူ့ဆေးရုံကို တင်ပို့ကုသခဲ့ပြီး Mr.Park အား ကျိုင်းတုံမြို့မရဲစခန်းက ရာဇသတ်ကြီးပုဒ်မ ၃၃၈/၃၃၇ (ပေါ့လျော့မှုကြောင့် ပြင်းထန်/သာမန် နာကျင်စေမှု) နဲ့ လည်းကောင်း၊ ဇန်နဝါရီ ၂၃ ရက်နေ့မှာ Mr.Park ကို လ.ဝ.က က စစ်ဆေးရာ မြန်မာနိုင်ငံတွင်း တရားမဝင် ဝင်ရောက်လာတာ ပေါ်ပေါက်ခဲ့လို့ ကျိုင်းတုံမြို့မရဲစခန်း (ပ)၂၂/၂၀၁၈ လ.ဝ.က အက် ၁၃(၁) နဲ့ လည်းကောင်း အမှုဖွင့် စစ်ဆေးခဲ့တယ်လို့ ဆိုပါတယ်။
စစ်ဆေးချက်တွေအရ တရားခံ Mr.Park မှာ (ONCB) မှ ပေးပို့တဲ့ ဝရမ်းမှာ ပါရှိတဲ့ တရားခံ Tawachai (Kao) Aomchompu၊ (၂၉) နှစ် ဝမ်မိုင်တိုက်နယ်၊ ပထုံဌာနေခရိုင် ထိုင်းနိုင်ငံ နေထိုင်သူ ဖြစ်သည်မှာ မှန်ကန်ကြောင်းနဲ့ ၂၀၁၆ ခုနှစ်၊ ဇူလိုင်လက ထိုင်းနိုင်ငံ၊ ဆီစကစ်မြို့မှာ စိတ်ကြွဆေးပြား ၄၉ ပြားနဲ့အတူ ဖမ်းဆီးခံရပြီး အာမခံနဲ့ အမှုရင်ဆိုင်နေစဉ် ထွက်ပြေး တိမ်းရှောင်နေလို့ ဖမ်းဝရမ်း ထုတ်ထားသူ ဖြစ်ကြောင်း သိရပါတယ်။
