ငြိမ်းစုစီ ပုဒ်မ ၁၉နဲ့ ဖမ်းဆီးတရားစွဲခံထားရတဲ့ လူငယ် ၅ ဦးရဲ့ တရားရုံးထုတ်ကို လူထု ၁၀၀၀ လောက်စုရုံးပြီးလာရောက်ခဲ့ရာမှာ ဦးဆောင်သူ ၃ ဦးကို ရဲတပ်ဖွဲ့က ခေါ်ယူစစ်ဆေးခဲ့ပါတယ်။
ကယန်းအမျိုးသားပါတီ ဥက္ကဋ္ဌ ခွန်းဘီထူး၊ ကယန်းမျိုးဆက်သစ်လူငယ် ဗဟိုကော်မတီဝင် ခွန်းအသန်းနဲ့ ကရင်နီပြည် တောင်သူလယ်သမား သမဂ္ဂဥက္ကဋ္ဌ ခူးတူရယ်တို့ကို လွိုင်ကော်မြို့နယ် ရဲမှူးက ဇန်နဝါရီ ၁၇ ရက်က ခေါ်ယူစစ်ဆေးခဲ့တာပါ။
ကရင်နီပြည် တောင်သူလယ်သမားသမဂ္ဂ ဥက္ကဋ္ဌ ခူးတူရယ်က “ဒီရက်က စစ်ဆေးပြီးတော့ ခုမှပြန်ရောက်တာ၊ ၁၉ ရက်နေ့ကျရင် တရားရုံးသွားဖို့ လက်မှတ်ထိုးခဲ့ပါတယ်။ ၁၉ ရက်နေ့ကျရင် တရားရုံးသွားရဦးမှာပေါ့” လို့ပြောပါတယ်။
ပြီးခဲ့တဲ့ ဒီဇင်ဘာ ၂၀ ရက်က ကရင်နီအမျိုးသားတိုးတက်ရေးပါတီ (ကေအန်ပီပီ) ရဲဘော် ၃ ဦးနဲ့ အရပ်သား ၁ ဦးတို့ ပစ်သတ်ခံရတာကို ကန့်ကွက်ရှုတ်ချကြောင်းနဲ့ အမှန်တရားပေါ်ပေါက်ဖို့် ဒီဇင်ဘာ ၂၂ ရက်က ဆန္ဒထုတ်ဖော်တောင်းဆိုခဲ့တဲ့ ဦးဆောင်သူ လူငယ် ၅ ဦး ငြိမ်းစုစီနဲ့ တရားစွဲထောင်ချခံ ခဲ့ရပါတယ်။
ဒီလူငယ် ၅ ဦးကို ဇန်နဝါရီ ၅ ရက်က လွိုင်ကော်မြို့နယ်တရားရုံးကို ရုံးထုတ်ရာမှာ လူစုပြီး လိုက်ပါပို့ဆောင်ခဲ့တဲ့ ဦးဆောင်သူ ၃ ဦးကိုလည်း ငြိမ်းစုစီ ပုဒ် ၁၉ နဲ့ ထပ်မံတရားစွဲဆို ခံရဖို့ရှိနေတယ်လို့ ကရင်နီပြည် တောင်သူလယ်သမားသမဂ္ဂ ဥက္ကဋ္ဌ ခူးတူရယ်ကပြောပါတယ်။
“ဒီလို ပုဒ်မ ၁၉ နဲ့ ထပ်ပြီး တရားစွဲမယ်ဆိုတော့ ဒီသံသရာကဆုံးမှာ မဟုတ်ဘူးပေါ့။ အခုတရားထပ်စွဲမယ်ဆိုတော့ နောက်ထပ်လည်း လာဦးမယ်လို့ ကျနော်အနေနဲ့ ကြိုပြီး ပြောချင်တယ်။ ဒီအမှုက ဘာတခုမှ ရှင်းလင်းချက်မပေးဘဲနဲ့ ဒီလိုဘဲ တရားစွဲမယ်ဆို ပြီးမှာ မဟုတ်ဘူး”
ဇန်နဝါရီလ ၁၅ ရက်နေ့ ကယားပြည်နယ်နေ့တွင် လူငယ် ၅ ဦးကို ဖမ်းဆီးထောင်ချတဲ့ အပေါ် ရှုတ်ချကြောင်း လက်ကမ်းစာစောင်တွေ ဖြန့်ဝေခဲ့တဲ့ လူငယ်တွေကို အာဏာပိုင်တွေက တားမြစ်ပြီး လက်ကမ်းစာစောင်တွေကို သိမ်းဆည်းခဲ့ပါတယ်။
အမှန်တရားဖော်ထုတ်တဲ့ လူငယ် ၅ ဦးကို ဖမ်းဆီးထောင်ချတဲ့အပေါ် အရပ်ဘက် အဖွဲ့အစည်း ၆ ဖွဲ့က ကန့်ကွက်ရှုတ်ချကြောင်း ကြေညာထားပြီး ကယားပြည်နယ်မှာရှိတဲ့ လက်နက်ကိုင် အဖွဲ့ ၂ ဖွဲ့ကလည်း ချက်ချင်း ပြန်လွှတ်ပေးဖို့ ပူးတွဲ တောင်းဆိုထားပါတယ်။
သတင်း - ခွန်တူးတူးလေး
