အခုနှစ် ဇန်နဝါရီ ၁ ရက်ကနေ ဇူလိုင် ၁၆ ရက်အထိ စစ်အုပ်စုကြောင့် ပညာရေးကဏ္ဍက ဆရာ၊ ဆရာမနဲ့ ကျောင်းသား၊ ကျောင်းသူ စုစုပေါင်း အယောက် ၂၀ သေဆုံးခဲ့တယ်လို့ နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) က ထုတ်ပြန်ပါတယ်။

သေဆုံးသူတွေထဲမှာ အသက် ၁၈ နှစ်အောက် ကျောင်းသား ၁၀ ယောက် ပါဝင်ပြီး ၁၈ ယောက်ကတော့ လေကြောင်းတိုက်ခိုက်မှုကြောင့် သေဆုံးခဲ့ရတာလို့ ဆိုပါတယ်။

သေဆုံးမှုအများဆုံးက မကွေးတိုင်းနဲ့ တနင်္သာရီတိုင်းကဖြစ်ပြီး ၇ ယောက်စီ ရှိပါတယ်။

ပြီးခဲ့တဲ့ ဇူလိုင် ၁၄ ရက်ကလည်း မကွေးတိုင်း၊ နတ်မောက်မြို့နယ်၊ ကန်လေးကုန်းရွာ စာသင်ကျောင်းကို စစ်အာဏာရှင်တပ်က လေကြောင်းကနေ ဗုံးကြဲခဲ့လို့ သတ္တမတန်းကျောင်းသား မောင်ဖြိုးဝေဦး နေရာမှာတင် သေဆုံးခဲ့ပြီး ကျောင်းသား အများအပြားလည်း ပြင်းထန်ဒဏ်ရာရခဲ့တယ်လို့ AAPP ရဲ့ ထုတ်ပြန်ချက်မှာ ဖော်ပြထားပါတယ်။

ဒီအရေအတွက်ဟာ နာမည်နဲ့တကွ အတည်ပြုနိုင်ခဲ့တာဖြစ်ပြီး နောက်ထပ် ၁၀ ယောက်ကိုတော့ အတည်ပြုဖို့ ကြိုးစားနေတယ်လို့ ဆိုပါတယ်။

စစ်တပ်က အာဏာသိမ်းပြီးနောက် ဖမ်းဆီးနှိပ်စက်သတ်ဖြတ်လို့ ပြည်သူပေါင်း ၈,၁၈၃ ယောက် သေဆုံးခဲ့ပြီလို့လည်း AAPP က ထုတ်ပြန်ပါတယ်။