လက်နက်တွေနဲ့ ဖမ်းဆီးရမိခဲ့တဲ့ ဖြိုးကိုကိုတင့်ဆန်းကို တရားစွဲထားတဲ့ အမှုတွေနဲ့ ပတ်သက်ပြီး ဒီကနေ့ ဇန်န၀ါရီလ ၃ ရက်နေ့ က ပထမဆုံးအကြိမ် ရုံးထုတ်စစ်ဆေးခဲ့ပါတယ်။
နေပြည်တော်၊ လယ်ဝေးမြို့နယ်နဲ့ ဒက္ခိဏမြို့နယ် ရဲစခန်းတွေက ဖြိုးကိုကိုတင့်ဆန်း အပါအ၀င် သူနဲ့ ပါဝင်ပတ်သက်တဲ့ သူတွေကို မူးယစ် ပုဒ်မ ၁၅/၁၆ (ဂ)/၂၀ ၊ လက်နက် အက်ဥပဒေ ပုဒ်မ ၁၉ (စ) ၊ လက်နက် အက်ဥပဒေ ၁၉ (က)/၁၉ (စ) ၊ မူးယစ်အက် ပုဒ်မ ၁၅/၁၉ (က)/၂၀ နဲ့ နိုင်ငံတော် အထိမ်းအမှတ်တံဆိပ် အက် ပုဒ်မ (၇) တွေနဲ့ ပထမအကြိမ် ရုံးထုတ်တုန်းက တရားစွဲဆိုထားခဲ့တာဖြစ်ပါတယ်။
ဒါအပြင် ဒီကနေ့မှာတော့ ဖြိုးကိုကိုတင့်ဆန်းကို သွင်းကုန်ပို့ကုန်ဥပဒေပုဒ်မ ၈ နဲ့ ဆက်သွယ်ရေးဥပဒေပုဒ်မ ၆၇ တွေနဲ့လည် ထပ်မံတရားစွဲဆိုခဲ့တယ်လို့ သိရပါတယ်။
ဒက္ခိဏခရိုင်တရားသူကြီး ဒုတိယ တရားသူကြီး ဦးခင်မောင်ထွေးက “တရားစွဲပြီးတင်ပို့တာက ပထမနေ့က ရာဇ၀တ်ကြီး ပုဒ်မ ၅ ခုရယ်၊ တရားခံပြေးမှု ၁ မှုရယ်။ ဒီနေ့က ရာဇ၀တ်ကြီး ပုဒ်မ ၃ ခုရယ်၊ တရားခံပြေး ၁ မှုရယ် အားလုံး ရာဇတ်ဝတ်ကြီးပုဒ်မ ၈ မှုရယ်။ တရားခံပြေးမှု ၂ မှုရယ် အားလုံးပေါင်း ၁၀ မှုပဲရှိတယ်။ တရားခံပြေး အမှုတွေ ပြီးသွားမှပဲ ဒီရာဇတ်ဝတ်ကြီး အမှုတွေကို စစ်ဆေးမှာဖြစ်ပါတယ်”လို့ ပြောပါတယ်။
ဖြိုးကိုကိုတင့်ဆန်းနဲ့ ဆက်စပ်ပါဝင်တဲ့ အမှုတွေဟာ များလွန်းတဲ့အတွက် ဗုဒ္ဓဟူးနေ့တိုင်း ကို တရားရုံးတင်စစ် ဆေးသွားဖို့ ဒက္ခိဏသီရိခရိုင်တရားရုံးက ရုံးချိန်းပြန်လည်ချိန်းဆိုခဲ့ပါတယ်။
