ရန်ကုန်၊ ကန်တော်ကြီးဝင်းထဲက ကောက်ရတဲ့ မှတ်ပုံတင်နဲ့ အိမ်ထောင်စု စာရင်းတွေဟာ တရားဝင် ထုတ်ပေးထားတာ ဟုတ်၊ မဟုတ် သိရဖို့ သက်ဆိုင်ရာ တိုင်းနဲ့ ပြည်နယ်တွေကို ဆက်သွယ်ထားတယ်လို့ ပြည်ထဲရေးက သတင်းထုတ်ပြန်ပါတယ်။
မနေ့က မနက်ပိုင်းမှာ ကျန်းမာရေး ကိုယ်လက်လှုပ်ရှားဖို့ လာတဲ့သူတချို့က ကန်တော်ကြီး နဂါးကျွန်းထဲကနေ မှတ်ပုံတင်နဲ့ အိမ်ထောင်စုစာရင်းတွေပါတဲ့ အထုပ်တခုကို တွေ့လို့ ဗဟန်းမြို့နယ်ရဲစခန်း တာဝန်ရှိသူကို အပ်နှံခဲ့တာပါ။
ဒါနဲ့ပတ်သက်ပြီး ဆောင်ရွက်ထားတာတွေကို တိုင်းနဲ့ ခရိုင်ရဲတပ်ဖွဲ့ကို စာပို့ အကြောင်းကြားထားတယ်လို့ ရဲစခန်းတာဝန်မှူးက ဖြေကြားခဲ့ပေမယ့် ဘာတွေ ဆောင်ရွက် ထားတယ်ဆိုတာကိုတော့ မပြောခဲ့ပါဘူး။
အနောက်ပိုင်းခရိုင်ရဲရုံးကို ဆက်သွယ်ရာမှာလည်း တိုင်းသတင်းပြန်ကြားရေးကို ဆက်သွယ်ဖို့ ပြောဆိုပါတယ်။
ဒါတွေကို သက်ဆိုင်ရာ လဝက မြို့နယ်မှူးက စစ်ဆေးရာမှာ မန္တလေး အိမ်ထောင်စုစာရင်း ၇ စောင်၊ ရန်ကုန် အိမ်ထောင်စုစာရင်း ၁၄ စောင်၊ မှတ်ပုံတင် ကတ်ပြား ၁၂၉ ခုမှာ မန္တလေး ၈၄ ခု၊ မကွေး ၆ ခု၊ ပဲခူး ၄ ခု၊ တနင်္သာရီ ၁ ခု၊ ဧရာဝတီ ၁၇ ခု၊ ရန်ကုန် ၅ ခု၊ မွန် ၆ ခု၊ ရခိုင် ၁ ခု၊ ရှမ်း ၁ ခုနဲ့ ဖတ်မရတာ ၄ ခု ဖြစ်တယ်လို့ ပြည်ထဲရေး ထုတ်ပြန်ချက်မှာ ဖော်ပြထားပါတယ်။
