ရန်ကုန်မင်္ဂလာတောင်ညွန့်မြို့နယ်၊ ကန်တော်ကြီးစောင်းရှိ ကန်တော်ကြီးပဲလေ့စ်ဟိုတယ် မီးလောင်မှုကြောင့် သေဆုံးသူ ၂ ဦး ရှိပြီလို့ ပြည်ထဲရေးက သတင်းထုတ်ပြန်ပါတယ်။
ရန်ကုန်တိုင်းဒေသကြီး၊ မင်္ဂလာတောင်ညွန့်မြို့နယ်၊ ပန်းဥယျာဉ်ရပ်ကွက်၊ ကန်ရိပ်သာလမ်း၊ ဦးတေဇ (ထူးကုမ္ပဏီ) ပိုင် ကန်တော်ကြီးပဲလေ့စ်ဟိုတယ်မှာ အောက်တိုဘာ ၁၉ ရက်နေ့မနက်က မီးလောင်မှုဖြစ်ပွားခဲ့တာပါ။
မီးလောင်မှုကြောင့် ဟိုတယ်အဆောင် (ဘီ) ၄ လွှာမှာ တည်းခိုနေထိုင်သူ ဂျပန်အမျိုးသား ၁ ဦးနဲ့ အဆောင် (အေ) ခေါင်မိုးထပ်မှာ ၁ ဦး (ကျား/မ ခွဲခြားနိုင်ခြင်းမရှိ)၊ စုစုပေါင်း (၂)ဦး သေဆုံးခဲ့တယ်လို့ ဆိုပါတယ်။
ဟိုတယ်ခေါင်မိုးပေါ်ကနေ ခုန်ချလို့ ထိခိုက်ဒဏ်ရာအနည်းငယ်ရရှိခဲ့တဲ့ တရုတ်နိုင်ငံသူ ၁ ဦးကတော့ သက်သာသွားလို့ ဆေးရုံကနေ ဆင်းသွားပြီဖြစ်ကြောင်း သတင်းမှာ ဖော်ပြထားပါတယ်။
မီးလောင်မှုကို သွားရောက်မီးငြှိမ်းခဲ့တဲ့ ရွှေပြည်သာ မီးသတ်တပ်ဖွဲ့ သန္ဓေတပ်ဖွဲ့ဝင် ဦးစီးအရာရှိ ဦးကျော်စွာလင်းကိုလည်း ရန်ကုန်ပြည်သူ့ဆေးရုံကြီး (ဦးနှောက်နှင့် အာရုံ ကြော) အထူးကြပ်မတ်ကုသဆောင်မှာ ဆေးကုသမှုပေးနေတယ်လို့ ဆိုပါတယ်။
