ကလေးဝမြို့မှာ ယမ်းပေါက်ကွဲစေတဲ့ပံ့ပိုးပစ္စည်း ဒီတိုနေတာ (Detonator) အခုရေ ၄ သောင်း ဖမ်းမိခဲ့တယ်လို့ မြို့နယ်ရဲတပ်ဖွဲ့မှူးက ပြောပါတယ်။
အောက်တိုဘာ ၁၆ ရက် ည ၉ နာရီလောက်က ကလေးနဲ့ ကလေးဝရဲတပ်ဖွဲ့တွေ ပူးပေါင်းပြီး စစ်ဆေးရှာဖွေနေတုန်း ကလေးဝ-ရေဦး-တန့်ဆည် ကားလမ်းမိုင်တိုင် ၁၀၄ နဲ့ ၁၀၅ ကြားမှာ ကလေးဝမြို့နယ်ဘက်က ရေဦးမြို့ဘက်ကို မောင်းနှင်လာတဲ့ ကားပေါ်ကနေ ဖမ်းမိခဲ့တယ်လို့ ပြည်ထဲရေးက သတင်းထုတ်ပြန်ပါတယ်။
ကလေးဝမြို့နယ်ရဲတပ်ဖွဲ့မှူး ရဲမှူး ဝင်းနိုင်က “နေပြည်တော် မှုခင်းတပ်ဖွဲ့ကို နမူနာပို့ဖို့ စီစဉ်နေပါတယ်။ လက်ရှိတော့ ပေါက်ကွဲစေတတ်တဲ့ ပစ္စည်းများဆိုင်ရာ ဥပဒေပုဒ်မ ၅ နဲ့ အမှုဖွင့်ထားပါတယ်” လို့ ပြောပါတယ်။
ကားမောင်းနှင်သူက မဟာအောင်မြေမြို့နယ်နေသူ ရွှေသန့်စင်လုပ်ငန်းလုပ်တဲ့ သန်းနိုင်ဦးဖြစ်ပြီး ပုသိမ်ကြီးမြို့နယ်နေသူ ရွှေသန့်စင်လုပ်ငန်းလုပ်တဲ့ ပြည်ဖြိုးမောင် လိုက်ပါလာတယ်လို့ ပြည်ထဲရေးက ထုတ်ပြန်ထားပါတယ်။
ပြီးခဲ့တဲ့ အောက်တိုဘာ ၄ ရက်နေ့ကလည်း ချင်းပြည်နယ် ရိဒ်မြို့နယ်ကနေ ကလေးမြို့ကို မောင်းနှင်လာတဲ့ ဂျစ်ကားယာဉ်ပေါ်က အိန္ဒိယနိုင်ငံထုတ် ယမ်းပေါက်ကွဲစေတဲ့ ပံ့ပိုးပစ္စည်း စနက်တံတွေ အချောင်း ၁၀၀၀၀ ဖမ်းမိခဲ့ပါတယ်။
