ပဲခူးတိုင်းဒေသကြီး၊ ဖြူးမြို့မှာ အောက်တိုဘာ ၈ ရက် ည ၁၁ နာရီလောက်က ကား နှစ်စီးနဲ့အတူ တရားမ၀င် သယ်ဆောင်လာတဲ့ နွား ၂၈ ကောင် ဖမ်းမိခဲ့တယ်လို့ ဖြူးမြို့မ ရဲတပ်ဖွဲ့စခန်းက ပြောပါတယ်။
ဖြူးမြို့ရဲ့မြောက်ဘက် ၃ မိုင်လောက်အကွာ မင်းကံရိုးကျေးရွာအုပ်စုရှိ ရန်ကုန်-မန္တလေး ကားလမ်းဟောင်းနဲ့ အမြန်လမ်းမကြီးကို ဆက်သွယ်ထားတဲ့ ဆားဂွန်းလမ်းပေါ်မှာ ဖြူးမြို့မရဲတပ်ဖွဲ့စခန်းက တပ်ဖွဲဝင်တွေနဲ့ အခြားဌာနဆိုင်ရာအချို့က တာဝန်ရှိသူတွေက ပိတ်ဆို့ရှာဖွေစဉ် ဖမ်းဆီးရမိခဲ့တာလို့ ဆိုပါတယ်။
ပိတ်ဆို့ရှာဖွေနေချိန် ဖြူးမြို့ကနေ ရန်ကုန်-မန္တလေး အမြန်လမ်းမကြီးဘက်ကို ယာဉ်မောင်းဝင်းစိုး မောင်းနှင်လာတဲ့ ၆ ဘီးယာဉ်ပေါ်က နွားအထီး ၁၀ ကောင်နဲ့ ယာဉ်မောင်း သန်းခိုင် မောင်းနှင်လာတဲ့ ၆ ဘီး ယာဉ်ပေါ်က နွားထီး ၁၈ ကောင်၊ စုစုပေါင်း နွား ၂၈ ကောင်၊ ကာလတန်ဖိုး သိန်း ၇၀ ကျော်ဖိုး ဖမ်ဆီးရမိခဲ့တယ်လို့ ဆိုပါတယ်။
“အမြန်လမ်းအတက်နားမှာ မိတာပါ။ ခြောက်ဘီးက ၂ စီး၊ ၁ စီးက ၁၈ ကောင်၊ ၁ စီးက ၁၀ ကောင်စုစုပေါင်း၂၈ ကောင်ပါ” လို့ ဖမ်းစီးမှုမှာ ပါဝင်တဲ့ ရဲတပ်ဖွဲ့ဝင်တဦးက ပြောပါတယ်။
ဖြူးမြို့မရဲတပ်ဖွဲ့စခန်းက တရားမ၀င်နွားတွေ သယ်ဆောင်လာသူ ယာဉ်မောင်း ၀င်းစိုးနဲ့ သန်းခိုင် တို့ နှစ်ဦးကို အရေးကြီးကုန်စည်နှင့်ဝန်ဆောင်မှုဥပဒေပုဒ်မ-၅ နဲ့ အရေးယူထားတယ်လို့ သိရပါတယ်။
သတင်း-ကျော်အောင် (ကညွတ်ကွင်း )
