စစ်ကိုင်းတိုင်းဒေသကြီး၊ ကသာမြို့နယ်နဲ့ ကချင်ပြည်နယ်၊ ရွေကူမြို့နယ်အစပ် ကောက်ကွေ့ချောင်း အောက်နားမှာ သြဂုတ် ၂၅ ရက်နေ့က ထင်းဖောင် ၁၀ တွဲအတွင်း တရားမဝင်ကျွန်းသစ်တွေ ဖမ်းဆီးရမိခဲ့တယ်လို့ ကသာခရိုင်သစ်တော ဦးစီးဌာနက ပြောပါတယ်။
ကသာခရိုင် သစ်တောဦးစီးဌာနလက်ထောက် ညွှန်ကြားရေးမှူး ဦးသောင်းနိုင်၊ သစ်တောဝန်ထမ်းတွေ၊ သစ်တောလုံခြုံရေး ရဲတပ်ဖွဲ့ဝင်တွေဟာ သြဂုတ် ၁၉ ရက်နေ့က ကသာမြို့နယ် နလယ်အင်းကျေးရွာအနီး ဧရာဝတီမြစ်ထဲမှာ လူ ၇ ဦးနဲ့အတူ ထင်းဖောင် ၇ တွဲမှ ကျွန်းသစ်နဲ့ အင်သစ် ၇၄၀ လုံး (၆၄ ဒသမ ၇၂၄ တန်) ကို ဖမ်းဆီးရမိခဲ့ပါတယ်။
အဆိုပါတရားခံ ၇ ဦးကို ကသာမြို့မရဲစခန်းက အမှုဖွင့် အရေးယူဆောင်ရွက်ထားပြီး စစ်ဆေးမေးမြန်းချက်အရ သြဂုတ် ၂၅ ရက်နေ့က နယ်မြေရှင်းလင်းရေး ဆောင်ရွက်ရာ စစ်ကိုင်းတိုင်းဒေသကြီး၊ ကသာမြို့နယ်နဲ့ ကချင်ပြည်နယ်၊ ရွှေကူမြို့နယ်အစပ် ကောက်ကွေ့ချောင်း အောက်နား ဧရာဝတီမြစ်ထဲမှာ စုန်မျောလာတဲ့ ထင်းဖောင် ၁၀ တွဲကို စစ်ဆေးရှာဖွေရာ တရားမဝင်ကျွန်းသစ်တွေ ပါရှိနေတာကြောင့် ဖမ်းဆီးလိုက်ပါတယ်။
အဆိုပါ ထင်းဖောင်တွေကို ကသာမြို့အောက်ဘက် ညောင်ခြေထောက် သစ်ဆိပ်ကို ဆွဲယူခဲ့ပြီး အင်းတော်၊ ကသာနဲ့ ထီးချိုင့်မြို့နယ်တို့က သစ်တောဝန်ထမ်းတွေကို ခေါ်ယူပူးပေါင်းပြီး သြဂုတ် ၂၇ ရက်နေ့ထိ စစ်ဆေးရှာဖွေရာ ထင်းဖောင် ၃ တွဲထဲက တရားမဝင် ကျွန်းသစ် ၁၃၁၆ လုံး (၈၉ ဒသမ ၆၉၄ တန်) ရရှိခဲ့ပါတယ်။
သြဂုတ် ၁၉ ရက်နေ့က ကသာမြို့နယ်၊ နလယ်အင်းကျေးရွာအနီး ဧရာဝတီမြစ်ထဲက ဖမ်းမိတဲ့ ထင်းဖောင် ၇ တွဲထဲက ကျွန်းသစ်နဲ့ အင်သစ် ၇၄၀ လုံး (၆၄ ဒသမ ၇၂၄ တန်) တို့ နှစ်ရပ်ပေါင်း ၁၅၄ ဒသမ ၄၁၈ တန် ရရှိသွားပြီဖြစ်ပါတယ်။
ရှာဖွေစစ်ဆေးဖို့ ကျန်တဲ့ ထင်းဖောင် ၇ တွဲကိုလည်း ဆက်လက် စစ်ဆေးရှာဖွေသွားမယ်လို့ ကသာခရိုင် သစ်တောဦးစီးဌာန လက်ထောက်ညွှန်ကြားရေးမှူး ဦးသောင်းနိုင်က ပြောပါတယ်။
သတင်း - ကိုကျော်(အင်းတော်)
ဓာတ်ပုံ-ခရိုင်သစ်တောဦးစီးဌာန
