ထိုင်းနိုင်ငံ ဘန်ကောက်မြို့ရှိ ဆောက်လုပ်ရေးလုပ်ငန်းခွင်တခုမှာ မြန်မာအလုပ်သမားနဲ့ ကမ္ဘောဒီးယားအလုပ်သမားတွေကြား အုပ်စုဖွဲ့ ရန်ဖြစ်ကြပြီး မြန်မာအလုပ်သမား ၁ဦး သေဆုံးသွားပါတယ်။
ဘန်ကောက်မြို့ ကျလွန်းနခွန်းနယ်မြေ မြန်မာသံရုံးအနီးက ဆောက်လက်စ ၇၅ ထပ်တိုက် လုပ်ငန်းခွင်မှာ ဇူလိုင် ၂၈ ရက်နေ့ ညနေပိုင်းက အလုပ်သမားတွေ ခိုက်ရန်ဖြစ်ပွားခဲ့တာဖြစ်ပြီး အသက် ၂၆ နှစ်ရွယ် မြန်မာအလုပ်သမား မောင်စိန်ဌေးဆိုသူ သေဆုံးသွားခဲ့တယ်လို့ ထိုင်း- မြန်မာသံရုံး အလုပ်သမားသံအရာရှိ ဦးမိုးအောင်ခိုင်က ဒီဗွီဘီကို ပြောပါတယ်။
“အုပ်စုလိုက်ဖြစ်ကြတာပေါ့နော်၊ မြန်မာက ၂၀၀လောက်ရှိတယ်၊ ကမ္ဘောဒီးယားက ၁၀၀လောက်ရှိတယ်၊ ကျနော်တို့ သိရတာကတော့ ကမ္ဘောဒီးယားအလုပ်သမား က အရက်သောက်နေတယ်ပေါ့နော်။ အဲဒီမှာ ဒီဘက်က မြန်မာက သူတို့ ဆူညံစွာနဲ့ သီချင်းတွေ ဖွင့်တဲ့အတွက် တိုးတိုးတိတ်တိတ်ဖွင့်ဖို့ သွားပြောတယ်၊ ပြောတဲ့ အချိန်မှာ သောက်စားထားတော့ မူးပြီးတော့ ရန်ဖြစ်ကြတယ်၊ ရန်ဖြစ်တဲ့ချိန်မှာဟိုက တူနဲ့ထုတယ်ပြောတယ်၊ တူနဲ့ထုတော့ ခေါင်းထိသွားတယ်။ ဆေးရုံရောက်တယ်။ ဒါပေမယ့် ဇူလိုင်လ ၂၉ ရက်နေ့မှာဘဲ မြန်မာအ လုပ်သမား က ဆုံးသွားပါတယ်။”
အဲဒီနေ့က အလုပ်သမားတွေ ခိုက်ရန်ဖြစ်ပွားကြောင်း တိုင်ကြားချက်ရရချင်း မြန်မာ အလုပ်သမား သံအရာရှိတွေ၊ ဆရာတော် ဦးဇောတိကနဲ့ သံဃာတချို့ သွားရောက် ဖျန်ဖြေပေးပြီး အခြေအနေတွေ မဆိုးရွားအောင် ထိန်းသိမ်းခဲ့တယ်လို့ ဆိုပါတယ်။
သေဆုံးသူမောင်စိန်ဌေးအတွက် ရသင့်ရထိုက်တဲ့ နစ်နာကြေးတွေရရှိဖို့ မြန်မာသံရုံးက ဆောင်ရွက်ပေးနေပြီး ၀ိုင်းရိုက်တဲ့ထဲပါတဲ့ ကမ္ဘောဒီးယား အလုပ်သမား ၃- ၄ ယောက်ကို ရဲတွေ ဖမ်းဆီးသွားတယ်လို့ ဦးမိုးအောင်ခိုင်က ပြောပါတယ်။
သေဆုံးသူ မောင်စိန်ဌေးမှာ ဧရာဝတီတိုင်း မြန်အောင်ဘက်က ဖြစ်ပြီး အမ်အိုယူအလုပ်သမား ကတ်နဲ့ ၀င်ရောက်လာတာဖြစ်ကြောင်း၊ သူ့ရဲ့အလောင်းကို သြဂုတ် ၁ ရက် ညနေမှာ ဆာထွန်လမ်းသွယ် ၁၀ ရှိ မြန်မာသံရုံးအနီးက ဘုန်းကြီးကျောင်းတိုက်မှာ သင်္ဂြိုဟ်ဖို့ရှိပါတယ်။
