မွန်ပြည်နယ်၊ ပေါင်မြို့နယ်မှာ ထောင်ကျ အကျဉ်းသား ၅ ယောက် ထွက်ပြေး လွတ်မြောက်သွားတယ်လို့ အကျဉ်းဦးစီးဌာန ပြောရေးဆိုခွင့်ရှိသူက ပြောပါတယ်။
ပေါင်မြို့နယ်၊ အင်းဗြောင်ကုန်ထုတ်စခန်းက အကျဉ်းသား ၅ ယောက်ဟာ ဇွန် ၂၉ ရက်က တာဝန်ကျ လုံခြုံရေးကို ရိုက်နှက်ပြီး ထွက်ပြေးသွားတာပါ။
“အခုတော့ ဌာနဆိုင်ရာ စုံစမ်းစစ်ဆေးရေး အဖွဲ့ဖွဲ့ပြီး စစ်နေပါတယ်။ အရင်က ဒီလို ထွက်ပြေးတာမျိုးတော့ မရှိပါဘူး။ အဲဒီစခန်းက ကျောက်ထုတ်တဲ့စခန်းပါ” လို့ ဒုတိယ ညွှန်ကြားရေးမှူး ဦးမင်းထွန်းစိုးက ဒီဗွီဘီကို ပြောပါတယ်။
ဒါနဲ့ပတ်သက်ပြီး ပေါင်မြို့မ ရဲစခန်းမှာလည်း အမှုဖွင့်ဆောင်ရွက်နေတာပါ။
စခန်းမှူး ဒုရဲမှူး ထွန်းဇော်ဦးက “ဒီနေ့အထိတော့ ဖမ်းမမိသေးပါဘူး။ သူတို့က တာဝန်ကျ လုံခြုံရေးကို ခဲနဲ့ပစ်၊ တူနဲ့ထုပြီး ထွက်ပြေးတာ” လို့ ဒီဗွီဘီကို ပြောပါတယ်။
တာဝန်ကျ လုံခြုံရေးကိုတော့ တိုက်နယ်ဆေးရုံမှာ ကုသနေပြီး စိုးရိမ်စရာ အခြေအနေ မရှိဘူးလို့ ဆိုပါတယ်။
ထွက်ပြေးသွားသူတွေကို ပြည်သူ့ဝန်ထမ်းကို တာဝန်ထမ်းဆောင်နေစဉ် ရိုးရိုးနာကျင်စေမှု ပုဒ်မ ၃၃၂၊ ချုပ်နှောင်ထားတဲ့နေရာက ထွက်ပြေးမှု ပုဒ်မ ၂၂၄ တို့နဲ့ အမှုဖွင့်ထားတယ်လို့လည်း သူက ပြောပါတယ်။
