မြန်မာပြည်ငြိမ်းချမ်းရေးအတွက် ရည်ရွယ်တဲ့ လက်မှတ်ရေးထိုး တောင်းဆိုတဲ့ လှုပ်ရှားမှု တခုကို (WLB) အမျိုးသမီးများအဖွဲ့ချုပ် မြန်မာနိုင်ငံက ဒီကနေ့ စတင် ပြုလုပ်လိုက်ပါတယ်။
မြန်မာအမျိုးသမီးနဲ့ကလေးတွေရဲ့ ဘဝတွေ လုံခြုံအေးချမ်းစေဖို့ ရည်ရွယ်ချက်နဲ့ ဒီလှုပ်ရှားမှုကို စလုပ်ရတာလို့ WLB အထွေထွေအတွင်းရေးမှူး ဒေါ်တင်တင်ညိုက ပြောပါတယ်။
“အဓိကတော့ ကျမတို့အမျိုးသမီးတွေ ရှိတဲ့နေရာတိုင်းမှာ စစ်ပွဲတွေ ဖြစ်နေတဲ့အခါကျတော့ ဒီအမျိုးသမီးတွေက အကြမ်းဖက်မှု ပေါင်းစုံကို ခံနေရတာတွေ ရှိတယ်။ ပြေးလွှား ပုန်းအောင်းနေရတယ်။ ဒီလိုအနေအထားတွေကနေ အမျိုးသမီးတွေကို လွတ်မြောက်စေချင်တယ်။ ပြီးတော့ အမျိုးသမီးတွေ ကိုယ်တိုင်က စစ်ပွဲတွေကို အရမ်းမုန်းလှပြီ ဆိုတာမျိုးတွေ ကျမတို့တွေ ပြောဆိုခဲ့တာ ရှိတာပေါ့။ စစ်ပွဲတွေကို အမြန်ဆုံး ရပ်စေချင်တယ်။ တပြိုင်နက်တည်းမှာပဲ သူတို့ရဲ့ တွေ့ဆုံ ဆွေးနွေးမှုတွေက တကယ်ပဲ စစ်ပွဲတွေကို ရပ်တဲ့အထိ၊ တကယ့်ကို တိုင်းပြည်မှာ အေးအေးချမ်းချမ်း ဖြစ်လာတဲ့အထိကို လုပ်ဆောင်သွားနိ်ုင်မယ့် အနေအထားတခု ဖြစ်စေချင်ကြတယ်။ ကျမတို့က အဲဒါကို တိုက်တွန်းချင်တာပေါ့။ စစ်ပွဲတွေ ရပ်စေချင်ပြီး။ ကျမတို့ အမျိုးသမီးတွေ၊ ကလေးတွေကို အေးအေးချမ်းချမ်းနဲ့ နေစေချင်ပြီး။ သူတို့ရဲ့အိမ်ကို လုံခြုံတဲ့အိမ်၊ လုံခြုံတဲ့အသိုင်းအဝန်းမှာ နေစေချင်တဲ့ ဆန္ဒတွေနဲ့ ဒီလှုပ်ရှားမှု တခုကို စတင် ဖော်ဆောင်တာ ဖြစ်ပါတယ်။”
မြန်မာနိုင်ငံမှာ စစ်မှန်တဲ့ ငြိမ်းချမ်းရေး ဖော်ဆောင်နိုင်ရေးအတွက် တနိုင်ငံလုံး အတိုင်းအတာနဲ့ အပစ်အခတ်ရပ်စဲရေး ကြေညာနိုင်ဖို့ သက်ဆိုင်သူတွေ အားလုံးက အကောင်အထည်ဖော် ဆောင်ရွက်သွားကြဖို့လည်း အမျိုးသမီးများအဖွဲ့ချုပ်က ကြေညာချက် ထုတ်ပြန် တိုက်တွန်းထားပါတယ်။
လက်နက်ကိုင် ပြည်တွင်းစစ် ပဋိပက္ခတွေ အကြား ဆိုးကျိုးတွေ အဓိကခံစားရသူတွေက အမျိုးသမီးနဲ့ ကလေးငယ်တွေ ဖြစ်တဲ့အတွက် ပဋိပက္ခတွေ ပြေလည်စေရေးအတွက် ပြုလုပ်တဲ့ ငြိမ်းချမ်းရေး ဆွေးနွေးပွဲ အဆင့်တိုင်းမှာ အမျိုးသမီးတွေကို ပါဝင်ခွင့်ပေးဖို့လည်း WLB က တောင်းဆိုပါတယ်။
ဒီကနေ့စတင်တဲ့ လက်မှတ်ရေးထိုး လှုပ်ရှားမှုကနေ စုဆောင်းရရှိထားတဲ့ လက်မှတ်တွေနဲ့ တောင်းဆိုချက်တွေကို ဦးသိန်းစိန် အစိုးရ၊ တပ်မတော်၊ တိုင်းရင်းသားလက်နက်ကိုင်အဖွဲ့တွေနဲ့ ဒီမိုကရေစီအင်အားစုတွေဆီ ပေးပို့သွားမှာ ဖြစ်တယ်လို့သိရပါတယ်။
