ဖယောင်းထုတ်လုပ်ရာမှာ အသုံးပြုရတဲ့ ချည်ဈေးနဲ့ ဖယောင်းဈေးတွေ မြင့်တက်လာလို့ မုံရွာဒေသထွက် ဖယောင်းတိုင်ဈေးတွေ အနည်းငယ်မြင့်တက်မှု ရှိနေပါတယ်။
ဖယောင်းကုန်ကြမ်းကို တရုတ်က အဓိကတင်သွင်းရပြီး ၁ ပိဿာကို အရင်က ၂၅၀၀ ကျပ်ဝန်းကျင် ရှိခဲ့ရာမှ အခုအခါမှာ ၂၉၀၀၊ ၃၀၀၀ ကျပ်ဝန်းကျင်ထိ ဈေးတက်လာခဲ့လို့ ဖယောင်းတိုင်တထုပ်အပေါ်မှာ ပျမ်းမျှ ၂၀ ကျပ်ဝန်းကျင်လောက် ဈေးတက်လာခဲ့ပါတယ်။
နယ်တွေမှာ လျှပ်စစ်မီးသုံးစွဲနိုင်မှုပမာဏ မြင့်တက်လာလို့ ဖယောင်းထုတ်လုပ်မှုကတော့ တနှစ်ထက်တနှစ် မသိမသာ လျော့နည်းလာတယ်လို့ ဖယောင်းလုပ်ကိုင်သူတွေက ဆိုပါတယ်။
မုံရွာမြို့မှာ ဖယောင်းတိုင်ထုတ်လုပ်သူ ၇ ဦးလောက် ရှိပါတယ်။ မုံရွာဒေသကထွက်ရှိတဲ့ ဖယောင်းတွေကို စစ်ကိုင်းတိုင်းက မီးမရရှိသေးတဲ့ ကျေးလက်တောရွာတွေအပြင် ရွှေ၊ ကျောက် ထွက်ရှိရာ ချင်းတွင်းမြစ်အထက်ပိုင်း ဒေသတွေကို အဓိကထား တင်ပို့ရောင်းချနေရတယ်လို့ သိရပါတယ်။
