၅၀၀ ကျပ်တန် အောင်ဘာလေသိန်းဆုထီဟာ ဈေးကွက်ထဲမှာ စိတ်ဝင်စား ဝယ်ယူသူတွေ များနေပါတယ်။
သိန်း ၁ သောင်းထီက ဒီတခေါက်ဆိုရင်တော့ ၂ ကြိမ်မြောက်ထွက်မှာ ဖြစ်ပါတယ်။ ထီဝါသနာရှင်တွေက ဒုတိယအကြိမ်ထွက်မယ့် သိန်း ၁ သောင်းထီကို စိတ်ဝင်စားနေတဲ့အတွက် ထီလက်မှတ် ဝယ်ယူတာတွေ များနေပါတယ်။ ပုံမှန်ဆိုရင် ဧပြီလမှာ အရောင်းအဝယ်အေးသလို ထီဆိုင်တွေလည်း ပိတ်တာတွေရှိပေမယ့် အခုနှစ်မှာတော့ အရောင်းအဝယ်ကောင်းနေတာပါ။
“သိန်း ၁ သောင်းထီ ထွက်ပြီးတဲ့နောက်ပိုင်းမှာ ထီထိုးတဲ့ ပရိသတ်ကတော့ တော်တော်လေး စိတ်ဝင်စားပြီးတော့ ဆက်ပြီးထီထိုးချင်တဲ့ဆန္ဒတွေ တော်တော်များများ ရှိပါတယ်။ ဒါပေမယ့် အောင်ဘာလေက နှစ်စဉ်နှစ်တိုင်း ဒီလို သင်္ကြန်လဆို ၂၀ ရာခိုင်နှုန်းလောက် လျှော့ပြီးတော့ ထီကိုထုတ်ပါတယ်။ ခါတိုင်းနှစ်တွေထက်စာရင် ပိုပြီးတော့ ရောင်းရမယ်လို့ မျှော်လင့်တယ်။ တော်တော်လေး စိတ်ဝင်စားလာတယ်။ ပေါက်တဲ့လူ အရေအတွက်ကလည်း တော်တော်လေး များလာတယ်” လို့ အောင်ဆုထူးပိုင်ပင်ရင်းထီဆိုင်ပိုင်ရှင် ဦးကျင့်ဟူက ပြောပါတယ်။
နှစ်စဉ် ဧပြီလထဲမှာ ထီရောင်းအားကျတဲ့အတွက် အောင်ဘာလေထီရုံးက ထီလက်မှတ်တွေကို လျှော့ထုတ်ပါတယ်။ ဒီနှစ်မှာလည်း ထီလက်မှတ်တွေကို လျှော့ထုတ်ထားတယ်လို့ ရန်ကုန်အောင်ဘာလေသိန်းဆုဌာနခွဲ ညွှန်ကြားရေးမှူး ဦးထွန်းထွန်းအောင်က ပြောပါတယ်။
“ဒီလကတော့ ဧပြီလဖြစ်တဲ့အတွက် အက္ခရာအလုံးတွေကို ကျနော်တို့က လျှော့ပြီးတော့ ပြန်ခွဲပေးထားတာပေါ့နော်။ နှစ်စဉ်နှစ်တိုင်းလည်း ဧပြီလမှာ အများပြည်သူက မိဘရပ်ထံတွေ ပြန်ကြတယ်ပေါ့။ နောက်တခါ ရဟန်းခံ ရှင်ပြု အလှူတွေလုပ်ကြတယ်။ ခရီးတွေထွက်ကြတယ်။ အဲဒီအချိန်ကျတော့ ထီရောင်းတဲ့ ဝန်ထမ်းတွေကိုယ်တိုင်ကလည်း သူတို့ရဲ့ မိဘရပ်ထံတွေ ပြန်ကြတယ်။ ထီထိုးသူ မိဘပြည်သူတွေကလည်း အလှူအတန်းတွေ လုပ်၊ ခရီးတွေထွက်ကြ ဆိုတော့ ထီထိုးအားက နှစ်စဉ်နှစ်တိုင် အနည်းငယ် ကျဆင်းလေ့ရှိပါတယ်။ အဲဒီအတွက် ကျနော်တို့က အဲဒီအချိန်ကျရင် အက္ခရာအလုံးတွေကို လျှော့ထုတ်ပြီး ကျနော်တို့ ရောင်းချထားပါတယ်။”
တကယ်လို့ ဝယ်လိုအား များနေရင်တော့ အရန်ထီထုတ်မယ်လို့လည်း သူက ပြောပါတယ်။
နှစ်စဉ် ဧပြီလနဲ့ မေလတွေမှာ အောင်ဘာလေရုံးက ထီလက်မှတ်တွေကို လျှော့ထုတ်နေတဲ့အတွက် ဒီနှစ်လို ထီရောင်းအား ကောင်းချိန်မှာတော့ ထီကိုယ်စားလှယ်တွေအနေနဲ့ ထီလက်မှတ်ဝယ်ယူတဲ့အခါ ခွဲတမ်းရတာတွေ နည်းတယ်လို့ ထီကိုယ်စားလှယ်တွေက ပြောပါတယ်။ ဒါကြောင့် ဒီနှစ် ဧပြီလမှာတော့ ထီဝယ်ယူသူတွေ များနေတဲ့အတွက် ထီကိုယ်စားလှယ်တွေက အရန်ထီကို ပိုပြီး ဝယ်ယူနေရပါတယ်။
