ဦးကိုနီနဲ့ ဦးနေ၀င်းတို့ဟာ အာဇာနည်သူရဲကောင်းတွေ နိုင်ငံ့သားကောင်းတွေဖြစ်တယ်လို့ ဒေါ်အောင်ဆန်းစုကြည်က ဂုဏ်ပြုပြောကြားလိုက်ပါတယ်။
အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်က ဦးကိုနီနဲ့ ဦးနေ၀င်းတို့လို အာဇာနည်သူရဲကောင်းတွေ နိုင်ငံ့သားကောင်းတွေ တိုင်းပြည်မှာ ရှိခဲ့တယ်ဆိုတာကို အမြဲတမ်းအောက်မေ့ပြီး အင်အားသစ်မွေးကြဖို့ ပြောပါတယ်။
ရန်ကုန်၊ ရွှေဂုံတိုင်ရှိ တော်ဝင်နှင်းဆီခန်းမမှာ ဒီနေ့ ပြုလုပ်တဲ့ ဦးကိုနီနဲ့ ဦးနေ၀င်းတို့ တလပြည့် အောက်မေ့ဖွယ်အခမ်းအနားမှာ ပြောခဲ့တာပါ။
“ကျမတို့ အဖွဲ့ချုပ်ရဲ့ အာဇာနည်သူရဲကောင်းများ၊ ကျမတို့အဖွဲ့ရဲ့ သားကောင်းများ၊ နိုင်ငံတော်ရဲ့ သားကောင်းများ ရှိခဲ့တယ်ဆိုတဲ့ အသိကို အမြဲပဲ အောက်မေ့ပြီးတော့ အင်အား ဖြစ်ကြပါစေလို့ ဆန္ဒပြုပါတယ်။”
အောက်မေ့ဖွယ် အခမ်းအနားကို နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ အန်အယ်လ်ဒီနာယက သူရဦးတင်ဦးတို့ ဦးဆောင် တက်ရောက်ချီးမြှင့်ခဲ့ကြပြီး ဦးကိုနီမိသားစုနဲ့ ဦးနေ၀င်းမိသားစုတို့လည်း တက်ရောက်ခဲ့ကြပါတယ်။
အမျိုးသားဒီမိုကရေစီအဖွဲ့ချုပ် ဥပဒေအထောက်အကူပြုအဖွဲ့ဝင် ရှေ့နေဦးကိုနီဟာ ပြီးခဲ့တဲ့ ဇန်န၀ါရီ ၂၉ ရက်နေ့က သေနတ်နဲ့ ပစ်ခတ်လုပ်ကြံသတ်ဖြတ်ခံရပြီး သတ်တဲ့သူကို လိုက်ဖမ်းတဲ့ တက္ကစီဆရာ ဦးနေ၀င်းလည်း သေနတ်ဒဏ်ရာနဲ့ သေဆုံးခဲ့ပါတယ်။
