ကြားဖြတ်ရွေးကောက်ပွဲကျင်းပမယ့် မြို့နယ်တွေမှာ မဲစာရင်းတွေကို လာမယ့် ဖေဖော်ဝါရီ ၁ ရက်နေ့မှာ စတင်ကပ်ထားပေးမှာဖြစ်လို့ မဲစာရင်းမှာ နာမည် ပါ၊ မပါ သွားကြည့်ပြီး မပါရင် တောင်းဆိုကြပါလို့ ရွေးကောက်ပွဲကော်မရှင်က ကြေညာပါတယ်။
ဖေဖော်ဝါရီ ၁ ရက်နေ့ကစလို့ ၂ ပတ်ကြာ ကပ်ထားပေးမယ့် မဲစာရင်းမှာ မိမိနာမည်မပါရင် ပုံစံ ၃ နဲ့ မဲစာရင်းမှာ နာမည်ထည့်ပေးဖို့ တောင်းဆိုကြပါလို့ ပြည်ထောင်စုရွေးကောက်ပွဲ ကော်မရှင်က မေတ္တာရပ်ခံ အသိပေးလိုက်တာ ဖြစ်ပါတယ်။
ဒါ့အပြင် မဲစာရင်းမှာ မပါသင့်သူတွေ ပါနေတာတွေ့ရင် ပုံစံ ၄ နဲ့ ကန့်ကွက်ပါ။ အချက်အလက်တွေ မှားယွင်းနေရင် ပုံစံ ၄ - ဂ အရ ပြင်ဆင်လွှာတင်သွင်းပါ။ လိုအပ်တဲ့ပုံစံတွေကို ရပ်ကျေးကော်မရှင်တွေထံမှာ အခမဲ့ တောင်းယူပါလို့ ကြေညာချက်မှာ ဖော်ပြထားပါတယ်။
မဲစာရင်းတွေကို အဲ့ဒီလို ပြင်ဆင်ဖြည့်စွက် ပယ်ဖျက်ပြီးရင် ကြားဖြတ်ရွေးကောက်ပွဲမှာ မဲပေးနိုင်တဲ့ မဲဆန္ဒရှင်စာရင်းကို ကော်မရှင်က မတ် ၁၇ ရက်မှာ ကြေညာပေးမှာ ဖြစ်ပါတယ်။
ပြည်ထောင်စုရွေးကောက်ပွဲကော်မရှင်ဟာ ၂၀၁၅ ရွေးကောက်ပွဲ မဲစာရင်းကို အခြေခံပြီး ကြားဖြတ်အတွက် တအိမ်တက်ဆင်း မဲစာရင်းကောက်ယူ ကြေညာတာ ဖြစ်ပါတယ်။
ဧပြီ ၁ ရက် ကျင်းပ ပြုလုပ်မယ့် ကြားဖြတ်ရွေးကောက်ပွဲမှာ မဲဆန္ဒနယ် ၁၉ ခုအတွက် ပါတီပေါင်း ၂၄ ခုက ကိုယ်စားလှယ်ပေါင်း ၉၅ ဦး ဝင်ရောက်ယှဉ်ပြိုင်ကြမှာ ဖြစ်ပါတယ်။
