စစ်ကိုင်းတိုင်းဒေသကြီး၊ ကသာခရိုင်၊ အင်းတော်မြို့နယ် ကွင်းချောင်းကျေးရွာမှာ ဖယောင်းတိုင်မီးကတဆင့် နေအိမ်တလုံး မီးလောင်ကျွမ်းမှု ဒီဇင်ဘာ ၁၅ ရက်နေ့မှာ ဖြစ်ပွားခဲ့ပါတယ်။
ဒီဇင်ဘာ ၁၅ ရက်ည ၉နာရီကျော်လောက် ကွင်းချောင်းကျေးရွာနေ မသန်းနွဲ့ (ခ) မသန်းနွဲ့လေးရဲ့ နေအိမ်မီးလောင်မှု ဖြစ်ပွားခဲ့ရာမှာ မီးသတ်ဌာနက သွားရောက်ငြှိမ်းသတ်ခဲ့လို့ ည ၉ နာရီ ၃၅ မိနစ်အချိန်မှာ မီးငြိမ်းသွားခဲ့ပါတယ်။
မီးလောင်ကျွမ်းမှုကြောင့် သက်ငယ်မိုး၊ ထရံကာ နေအိမ် ၁ လုံး မီးလောင်ကျွမ်းခဲ့ပြီး ငွေ ၇ သောင်းဖိုးခန့် ပျက်စီးဆုံးရှုံးသွားတယ်လို့ အင်းတော်မြို့နယ် မီးသတ်ဦးစီးမှူး ဦးလှမျိုးလွင်က ပြောပါတယ်။
“မီးလောင်ရတဲ့ အကြောင်းရင်းက နေအိမ် အိပ်ခန်းအပြင်ဘက် ခေါင်းရင်းထရံကာအနီး ကြမ်းပြင်ပေါ်မှာရှိတဲ့ ဖယောင်းတိုင်မီးကတဆင့် ထရံကို မီးကူးစက်လောင်ကျွမ်းရခြင်း ဖြစ်ပါတယ်။ ကျနော်တို့ သန္ဓေအရန်မီးသတ်အင်အား ၁၂ ဦး၊ မီးသတ်ယာဉ် ၂ စီး၊ ရွာသူရွာသား ၅၀ ဦးခန့်နဲ့ မီးငြှိမ်းသတ်ခဲ့ရာ ည ၉ နာရီ ၃၅ မိနစ်အချိန်မှာ မီးငြှိမ်းသတ်နိုင်ခဲ့ပါတယ်” လို့ ပြောပါတယ်။
ပေါ့ဆမီးကြောင့် အိမ်ရှင်ကို အင်းတော်မြို့မရဲစခန်းက ရာဇသတ်ကြီးပုဒ်မ ၂၈၅ အရ အရေးယူထားပါတယ်။
သတင်းပေးပို့ - ကိုကိုလင်း(အင်းတော်)
