အရှေ့မြောက်ကုန်သွယ်ရာ လမ်းမကြီးပေါ်က ဂုတ်တွင်းတံတားရဲ့ ရေလယ်တိုင် ဩဂုတ် ၇ ရက် က ရေတိုက်စားသွားတာကြောင့် တန်ချိန်များတဲ့ကားတွေ ဖြတ်မရတော့ဘူးလို့ ဒေသခံတွေနဲ့ ယာဉ်မောင်းတွေဆီက သိရပါတယ်။

ဂုတ်တွင်း ယာယီတံတား အောက်ခြေတိုင်ပြုတ်သွားလို့ ကားတစီးချင်း ဖြတ်နေရပြီး ကားကြီး‌ တွေတော့ ရပ်ထားရတယ်လို့ ယာဉ်မောင်းတွေက ပြောပါတယ်။

ယာဉ်မောင်းတယောက်က “ကားကြီးက တန် ၄၀ နဲ့​အောက်ပဲ ​ပေးဖြတ်တယ်။ တွဲကားခါလီ ရတယ်။” လို့ ပြောပါတယ်။

မိုးများလို့ ဂုတ်တွင်း​ချောင်း​ရေ တက်​လာပြီး ရေစီးအရှိန်​ကြောင့် ဂုတ်တွင်း ယာယီတံတားရဲ့ ​ရေလယ်​ထောက်တိုင် နည်းနည်းပျက်စီးသွားတာလို့ သူက ပြောပါတယ်။

ဒေသခံ အမျိုးသားတယောက်က “အဆိုးကြီးတော့ မဟုတ်ပါဘူး။ ရေလယ်တိုင် ရေတိုက်စားပြီး ဖြစ်တာ။ နေ့လယ်လောက်က စဖြစ်တာ” လို့ ပြောပါတယ်။ 

ကျောက်မဲမှာတော့ မိုးကတိတ်သွားပြီဖြစ်ပေမဲ့ တောင်ပေါ်ဘက်တွေက မိုးဆက်ရွာနေတော့ တောင်ကျရေများနေတာလို့ သူက ပြောပါတယ်။

လတ်တ​လောမှာ ကားငယ်​တွေ ပုံမှန်အတိုင်းသွားလာနိုင်​ပေမဲ့ ကုန်တင်ကား​တွေကို​တော့ တန်ချိန်​ လျှော့ချပြီး ဖြတ်ခိုင်းတာလို့ ဆိုပါတယ်။

ပုံမှန်ဆိုရင် ယာယီတံတား​ပေါ်ကနေ ကုန်နဲ့ယာဥ် တန် ၅၀ ဖြတ်ခွင့်ပြုထား​ပေမဲ့ အခုတော့ တန် ၄၀ အောက်ပဲ ဖြတ်ခွင့်ကန့်သတ်လိုက်တာလို့လည်း ဆိုပါတယ်။

ဒါ့အပြင် မိုးအဆက်မပြတ်ရွာနေတာကြောင့် ​နောင်ချိုကနေ ပြင်ဦးလွင်ဘက်အထွက် ကျောက်ကြမ်းနဲ့ အုမ္မခါး​ကြား ပြည်ထောင်စုလမ်းမကြီးပေါ်မှာ‌လည်း ရေ​ကျော်နေလို့ ကားငယ် တွေ သတိထားဖြတ်သန်းနေရတယ်လို့ ယာဉ်မောင်းတွေက ပြောပါတယ်။