မြန်အောင်မြို့နယ် သက္ကယ်ကုန်းအုပ်စု ကြံ့ခိုင်ရေးပါတီက တွဲဘက်စည်းရုံးရေးမှူးနဲ့ ညီမဖြစ်သူကို သတ်ပြီးထွက်ပြေးနေတဲ့ တရားခံတွေကို ဒီနေ့ မနက်ပိုင်းက ဖမ်းမိခဲ့ပါတယ်။
ဧရာဝတီတိုင်းဒေသကြီး မြန်အောင်မြို့နယ် အင်ပင်ရဲတပ်ဖွဲ့စခန်းအပိုင်းအတွင်းက သက္ကယ်ကုန်း အုပ်စုရှိသက္ကယ်ကုန်း ကျေးရွာတွင်နေထိုင်တဲ့ သက္ကယ်ကုန်းအုပ်စု ကြံ့ခိုင်ရေးပါတီက တွဲဘက်စည်းရုံးရေးမှူး ဦးသန်းဌေးနဲ့ ညီမဖြစ်သူ မခင်မာဝင်းတို့ကို သတ်ပြီး ထွက်ပြေးနေတဲ့ တရားခံ ၂ ဦးအနက် ၁ ဦးကို ဒီနေ့ နိုဝင်ဘာ ၂၂ ရက်နေ့ မနက် ၃ နာရီလောက် က ဖမ်းဆီးရမိခဲ့ပြီး ကျန်တဦးကို ၂၂ နေ့မနက် ၈ နာရီမှာ ဖမ်းမိခဲ့တာပါ။
အမှုဖြစ်စဉ်မှာ နိုဝင်ဘာလ ၂၁ ရက်နေ့ ညနေ ၅ နာရီလောက် သက္ကယ်ကုန်းအုပ်စု ကြံ့ခိုင်ရေးပါတီက တွဲဘက်စည်းရုံးရေးမှူးနဲ့ ညီမဖြစ်သူတို့ ရွာလယ် တာလမ်းမပေါ် လှည်းမောင်းတဲ့ကိစ္စနဲ့ အချင်းပွားပြီး ဦးအောင်ကျော် (၄၇ နှစ်)နဲ့ မင်းထက်ဦး (၂၀) နှစ်တို့က သတ်ဖြတ်တဲ့အထိ ဖြစ်ပေါ်ခဲ့တာပါ။ သေဆုံးသူ အုပ်ချုပ်ရေးမှူးဟောင်းရဲ့ လည်ပင်းမှာ ထိုးသွင်းဓားဒဏ်ရာတချက်နဲ့ နှမဖြစ်သူမှ လက်ဝဲဘက် နို့အုံအောက်မှာ ထိုးသွင်း ဓားဒဏ်ရာ ၂ ချက်နဲ့ အခင်းဖြစ်တဲ့ နေရာတင် သေဆုံးခဲ့တာဖြစ်ပါတယ်။
မြန်အောင်မြို့နယ် အင်ပင်နယ်မြေ ရဲတပ်ဖွဲ့စခန်းက တရားခံ ဦးအောင်ကျော် (၄၇)နှစ်နဲ့ မင်းထက်ဦး (၂၀)နှစ်တို့ကို ရာဇာသတ်ကြီးဥပဒေပုဒ်မ ၃၀၂/၃၂၃ /၁၁၄ တို့နဲ့ အမှုဖွင့်ကာ အရေးယူဆောင်ရွက်နေတယ် လို့ ပြောပါတယ်။
သတင်း - သန်းထိုက်မြင့်
