ရပ်ကွက်အတွင်း အများပြည်သူ နားမခံနိုင်လောက်တဲ့ ဆူညံသံတွေ ဖန်တီးတာဟာ ဥပဒေကြောင်းအရ အရေးယူနိုင်သလို ထောင် ၆ လအထိ ချခံရနိုင်ပါတယ်။

ရပ်ကွက် သို့မဟုတ် ကျေးရွာအုပ်စု အုပ်ချုပ်ရေးဥပဒေမှာ ရပ်ကွက်အတွင်း အသံချဲ့စက်လိုမျိုး ဆူညံမှုများ ပြုလုပ်မယ်ဆိုရင် ခွင့်ပြုချက်ယူရမယ့်အပြင် သတ်မှတ်စည်းကမ်းတွေကို မလိုက်နာပါက ငွေဒဏ်ဆောင်ရမယ်လို့ ဖော်ပြထားပါတယ်။

ဒါ့အပြင် သက်ဆိုင်ရာ အုပ်ချုပ်ရေးအာဏာပိုင်က တားမြစ်တာကို ဆက်လက်လုပ်မယ်ဆိုရင် ရာဇသတ်ကြီးပုဒ်မ ၂၉၁ အရ ထောင်ဒဏ် ၆ လအထိ ချမှတ်ခံရနိုင်သလို ရပ်ကွက် သို့မဟုတ် ကျေးရွာ အုပ်ချုပ်ရေးဥပဒေရဲ့ နည်းဥပဒေပါ ပြဋ္ဌာန်းချက်တွေအရ သက်ဆိုင်ရာ အုပ်ချုပ်ရေးပိုင်းကို ၃ ရက် ကြိုတင်ရမယ်လို့ ဖော်ပြထားပါတယ်။

“အရေးယူနိုင်တယ်ဆိုတဲ့ နေရာမှာ ပုဒ်မအရ ပထမတကြိမ်မှာတော့ သိပ်ပြီးတော့ ပြင်းပြင်းထန်ထန်တော့ မရှိဘူး။ တကယ်လို့များ Public စိတ်ငြိုငြင်စေတဲ့ အခြေအနေမျိုး ဖြစ်ခဲ့မယ်ဆိုရင်တော့ သက်ဆိုင်ရာ ရပ်ကွက်၊ ကျေးရွာကောင်စီကို သွားပြီးတော့ တိုင်တန်းဖို့ လိုတယ်။ ရဲစခန်းတွေ၊ မြို့နယ် အထွေထွေအုပ်ချုပ်ရေးတွေကို သွားတိုင်တန်းဖို့ လိုပါတယ်။ တိုင်တန်းမယ်ဆိုရင်လည်း ဒါ ရဲအရေးပိုင်တဲ့ကိစ္စရှိတယ်။ ရဲအရေးမပိုင်တဲ့ကိစ္စရှိတယ်။ တားမြစ်ထားတာမှ ဆက်လုပ်မယ်ဆိုရင်တော့ ရာဇသတ်ကြီး ဥပဒေပုဒ်မ-၂၉၁ အရ ထိထိရောက်ရောက် အရေးယူနိုင်တယ်။ အလုပ်မဲ့ထောင်ဒဏ် ၆ လအထိ ချမှတ်နိုင်တဲ့အထိ ရှိပါတယ်” လို့ တရားလွှတ်တော်ရှေ့နေ ဦးမောင်မောင်ဝင်းက ပြောပါတယ်။

သက်ဆိုင်ရာ အုပ်ချုပ်ရေးပိုင်းတွေအနေနဲ့ ရပ်ကွက်အတွင်း ဆူညံမှုတွေကြောင့် ပြည်သူလူထု စိတ်အနှောင့်အယှက်မဖြစ်အောင် ထိန်းသိမ်းထားပေမယ့် နယ်ကျော်လာတဲ့ အလှူခံတွေ များလာတာကြောင့် ဆူညံမှုတွေ ပိုဖြစ်လာတယ်လို့ တာမွေမြို့နယ် ကျောက်မြောင်းကြီးရပ်ကွက် အုပ်ချုပ်ရေးမှူး ဦးစိုးမြင့်က ပြောပါတယ်။

“အရင်တုန်းနဲ့ မတူတော့ဘူးဗျ။ အခုနောက်ပိုင်း အရမ်းများလာလို့ ဒီပြဿနာတက်တာ။ ရပ်ပြီးတော့ အော်နေတယ်ဆိုရင် ဒါကတော့ ထိခိုက်တာပေါ့။ အခုက မဟုတ်ဘူး၊ များလို့။ အလှူခံအဖွဲ့တွေများလို့ မခံနိုင်တာ။ တဖွဲ့သွားပြီး မကြာသေးဘူး နောက်တဖွဲ့ဝင်လာတယ်။ ရန်ကုန်သူ ရန်ကုန်သားဆိုတာက တခါတလေကျတော့ အိပ်တာက ညဥ့်နက်တယ်။ ကျနော်တို့ဒေသတွေဆို တခါတလေကျတော့ မနက်အစောကြီး မထချင်ဘူး။ အဲဒီအချိန်မှာ ၆ နာရီကျော် ၇ နာရီလောက်ကတည်းက ဒီအသံတွေက စဉ်ဆက်မပြတ်လို ဖြစ်လာတယ်။ အဲလိုပြဿနာလေးတွေက ဖြစ်တာ။”

ဥပဒေပါပြဋ္ဌာန်းချက်တွေအရ ရပ်ကွက်အုပ်ချုပ်ရေးပိုင်း တာဝန်ရှိသူတွေကို ခွင့်တောင်းခံတာတွေ မရှိသလို ဘာသာရေးအရ နားလည်မှုတွေနဲ့ ရပ်ကွက်နေပြည်သူတွေ စိတ်အနှောင့်အယှက်မရှိအောင် ပြုလုပ်တာတွေတော့ ရှိပါတယ်။

ဒီလို အသံချဲ့စက် ဆူညံမှုတွေနဲ့ ပုံမှန်ထက်ပိုတဲ့ ဆူညံမှုတွေကြောင့် လူတွေရဲ့ စိတ်ပိုင်းဆိုင်ရာတွေကို ထိခိုက်နိုင်တဲ့အပြင် သွေးတိုးရောဂါ၊ အိပ်မပျော်တဲ့ရောဂါတွေအထိပါ ဖြစ်နိုင်တယ်လို့ ဆေးသုတေသန မှတ်တမ်းတွေမှာ ဖော်ပြထားပါတယ်။