တရုတ်သင်္ဘောသား ၁၃ ဦးကို ၂၀၁၁ ခုနှစ်က မဲခေါင်မြစ်ထဲမှာ မြန်မာမူးယစ်ရာဇာ စိုင်းနော်ခမ်းအဖွဲ့က သတ်ဖြတ်ခဲ့တဲ့အကြောင်း ဇာတ်အိမ်တည် ရိုက်ကူးထားတဲ့ ရုပ်ရှင် Operation Mekong ဇာတ်ကားကို ထိုင်းနိုင်ငံမှာ ပြသခွင့် ပိတ်ပင်နိုင်တယ်လို့ ဘန်ကောက်ပို့စ်သတင်းမှာ စက်တင်ဘာ ၂၈ ရက်က ဖော်ပြပါတယ်။

ထိုင်းနိုင်ငံဝန်ကြီးချုပ် ပရာယွတ် ချန်အိုချာက “ဒီဇာတ်ကားထဲမှာပါဝင်မယ့် အကြောင်းအရာတွေကို စစ်ဆေးဖို့ သက်ဆိုင်ရာ တာဝန်ရှိတဲ့သူတွေကို ကျနော် ညွှန်ကြားထားပါတယ်။ နိုင်ငံ့ပုံရိပ် ထိခိုက်မယ်ဆိုရင်တော့ ပြသခွင့်ကို ပိတ်ပင်မှာဖြစ်တယ်” လို့ စက်တင်ဘာ ၂၇ ရက်နေ့က ပြောလိုက်တာပါ။

ဒီဇာတ်ကားကို ဟောင်ကောင်ရုပ်ရှင်ဒါရိုက်တာ ဒန်တေးလန်က ဖြစ်ရပ်မှန်အခြေပြု ရိုက်ကူးခဲ့တာဖြစ်ပြီး ခုလာမယ့် သောကြာနေ့ ဟောင်ကောင်မှာ ရုံတင်ဖို့ စီစဉ်ခဲ့တာပါ။

ပြီးခဲ့တဲ့ ၂၀၁၁ ခုနှစ်၊ အောက်တိုဘာ ၅ ရက်နေ့မှာ မဲခေါင်မြစ်တွင်းရှိနေတဲ့ တရုတ်ကုန်တင်သင်္ဘော ၂ စီးပေါ်မှာ မူးယစ်ဆေးဝါးတွေ သယ်ဆောင်လာတယ်ဆိုပြီး သံသယရှိတဲ့အတွက် ထိုင်းလုံခြုံရေးတပ်ဖွဲ့တွေက စီးနင်းရှာဖွေချိန်မှာ သင်္ဘောသား ၁၃ ဦးဟာ လက်ပြန်ကြိုးတွေ တုပ်လျက်သား အနေအထားနဲ့ သေဆုံးနေတာကို တွေ့ရှိခဲ့ကြတာပါ။

ဒါဟာ မူးယစ်ရာဇာ စိုင်းနော်ခမ်းရဲ့လက်ချက် ဖြစ်တယ်လို့ ဆုံးဖြတ်ခဲ့ပြီးနောက်မှာ တရုတ်အစိုးရက ထိုင်း၊ လာအိုနိုင်ငံတွေနဲ့ ပူးပေါင်းပြီး ဖမ်းဆီးဖို့ ကြိုးစားခဲ့ကြတာပါ။

အဲဒီနောက် စိုင်းနော်ခမ်းကို လာအိုနိုင်ငံမှာ ၂၀၁၂ အစောပိုင်းက ဖမ်းဆီးရမိခဲ့တာဖြစ်ပြီး  ရုံးတင်စစ်ဆေးရာမှာ ဖြောင့်ချက်ပေးခဲ့တဲ့အတွက် ၂၀၁၂ နိုဝင်ဘာလဆန်းက သေဒဏ်စီရင်ခဲ့တာ ဖြစ်ပါတယ်။

ကနဦးပိုင်း ရဲစုံစမ်းဖော်ထုတ် တွေ့ရှိချက်တွေမှာတော့ စိုင်းနော်ခမ်းဟာ ဂိုဏ်းခေါင်းဆောင် တွေနဲ့အတူ ထိုင်းစစ်သား အနည်းငယ်လည်း ပါဝင်တဲ့အဖွဲ့က မဲခေါင်မြစ်ပေါ်မှာ ဟွာပင်းနဲ့ ယုဇင်း ၈ ကုန်သင်္ဘော ၂ စင်းကို တိုက်ခိုက်ပြန်ပေးဆွဲခဲ့တယ်လို့ သတင်းတွေမှာ ရေးခဲ့ပါတယ်။

အဲဒီနောက် တရုတ်၊ မြန်မာ၊ လာအိုနဲ့ ထိုင်းရဲတပ်ဖွဲ့ဝင်တွေ ပူးတွဲကြိုးပမ်းချက်နဲ့ လာအိုနိုင်ငံမှာ ၂၀၁၂ ခုနှစ် ဧပြီမှာ ဖမ်းဆီးရမိခဲ့ပြီး တရုတ်နိုင်ငံကို လွှဲပြောင်းပေးခဲ့တာပါ။

၂၀၁၃ ခုနှစ်၊ ဧပြီလမှာတော့ သူ့ကို တရုတ်နိုင်ငံ ပြည်သူ့တရားရုံးချုပ်က သေဒဏ်ချမှတ်ခဲ့ပြီး ကွပ်မျက်ခဲ့တာပါ။

စိုင်းနော်ခမ်းဟာ ဖမ်းဆီးမခံရခင် ထိုင်းနိုင်ငံအစိုးရက ၀ရမ်းထုတ်ပြန်တဲ့ မူးယစ်ရာဇာ စာရင်းမှာ ပါရှိခဲ့ပါတယ်။