ကရင်နီပြည်နယ်နဲ့ ကယန်းဒေသက နေရာ ၅ ခုထက်မနည်းကို အခုဇွန်လအတွင်း စစ်တပ်က လေကြောင်းကနေ ဗုံးကြဲတာ၊ ဒရုန်းနဲ့ဗုံးသီးချ တိုက်ခိုက်တာတွေလုပ်ခဲ့တယ်လို့ စစ်ဘေးရှောင် ပြည်သူတွေက ပြောပါတယ်။

ဇွန် ၁၈ ရက် ည ၁၁ နာရီကျော်မှာ ဖယ်ခုံမြို့နယ်၊ အလယ်ကယန်းဒေသ၊ ပြင်ဆောင်ကျေးရွာကို လေကြောင်းကနေ ဗုံးအလုံး ၃၀ လောက် ကြဲချတိုက်ခိုက်ခဲ့လို့ ဒေသခံ ၁ ယောက် ထိခိုက်မိပြီး နေအိမ်တချို့လည်း ပျက်စီးခဲ့ပါတယ်။

ဇွန် ၁၈ ရက် ညနေ ၆ နာရီကျော်ကလည်း မိုးဗြဲမြို့နယ် အနောက်ခြမ်းနဲ့ ဖရူဆိုမြို့နယ်ဘက်ကို လေကြောင်းကနေ ဗုံး ၃ ကြိမ်ထက်မနည်း ကြဲချတိုက်ခိုက်ခဲ့တယ်လို့ သိရပါတယ်။

စစ်ဘေးရှောင်အမျိုးသားတယောက်က “တိုက်ပွဲမဖြစ်ဘဲနဲ့ ဇွတ်လိုက်ကြဲနေတာလေ။ မနေ့ကဆို ကယန်းပြည်သစ်ခွင်ထဲ ကြဲတယ်။ ဖရူဆိုဘက်လည်း ကြဲတယ်ဗျာ၊ မိုးဗြဲဘက်ကိုလည်း ကြဲတယ်။ သူတို့ ဘာ plan နဲ့ ဘာ Target နဲ့ ကြဲလဲတော့ မသိဘူးဗျ” လို့ ​ပြောပါတယ်။

ဇွန် ၁၅ ရက်နေ့ မနက်ပိုင်းမှာ နန်းမယ်ခုံမြို့နယ်ကို ဒရုန်းနဲ့ ဗုံးကြဲတိုက်ခိုက်တာကြောင့် ဒေသခံ ပြည်သူ ၂ ယောက် ထိခိုက်မိတယ်လို့ သိရပါတယ်။

ဇွန် ၄ ရက် ညနေပိုင်းမှာ ဒီးမော့ဆိုအနောက်ခြမ်းကို လေကြောင်းကနေ ဗုံး ၃ ကြိမ်ထက်မနည်း ကြဲချတိုက်ခိုက်တာကြောင့် ဒေသခံအမျိုးသား ၁ ယောက် သေဆုံးပြီး ၂ ယောက် ထိခိုက် မိတယ် လို့ စစ်တမ်းတွေအရ သိရပါတယ်။

ဇွန် ၃ ရက်နေ့ မနက်ပိုင်းမှာလည်း နန်းမယ်ခုံမြို့နယ်ကို ဒရုန်းနဲ့ ဗုံးကြဲတိုက်ခိုက်တာကြောင့် စစ်ဘေးရှောင်အမျိုးသမီး ၁ ယောက် ထိခိုက်ဒဏ်ရာရခဲ့တယ်လို့ ဒေသခံတွေက ပြောပါတယ်။

စစ်တပ်ဟာ တိုက်ပွဲမဖြစ်တဲ့နေရာတွေကိုလည်း လေကြောင်းကနေ ဗုံးကြဲတိုက်ခိုက်တာ၊ ဒရုန်းနဲ့ ဗုံးသီးချတိုက်ခိုက်တာတွေကြောင့် ဒေသခံနဲ့ စစ်ဘေးရှောင်ပြည်သူတွေ စိုးရိမ်နေကြရတယ်လို့ သိရပါတယ်။